Habakukə
1
1 Nə̀ń bʋra tə Yɩɩ nə bɩrɩ ʋ nii sʋ̀sʋ̀nʋ̀ Habakukə nə, nɩʋn wa.Habakukə bon ʋ kə Yɩɩ nə, ʋ pɩ̀à ʋ sáŋʋ́
2 Ba-Yígúrə́-Jə-Tiu, à wá bon à kə n nə,
à lòrì n sáŋʋ́, yá n ba à con taŋa,
kʋ dán kʋ mɛ nətə?
À bubwi, à wʋ́: «Wʋlʋŋʋ!»
Yá n ba nəba joŋə!
3 Bɛ̀ɛ̀ nə pɩn n pa à na yolwan,
n ga ywàŋá fɩfɩan tə, yá n ba yoo swɩ̀n?
Cʋcʋran də wʋlʋŋʋ nə à na à yáá con.
Jara də tʋ́tʋ̀ná súə́ tɩa mama.
4 Kʋ mʋ̀ nə pɩn ba ba Yɩɩ nii tə zìlí,
yá ba ba bʋra bʋ̀rɩ̀, kʋ twá cɩ́gá cwəŋə nə.
Cɩ́gá, wʋlʋnyiən də́ dɩ̀àn cɩ́gá tíú yuu wa,
yá bʋra yɩ kʋ̀nkʋ̀n bʋra ba bʋ̀rɩ̀.
Yɩɩ pɩn Kaləde tɩ̀án bɩ̀àn də kʋ̀ʋ̀
5 Ywàŋá, á ywàŋá lʋʋ níə́ tə wa,
á ga pa kʋ jì yokəlu, kʋ kələ aba.
Cɩ́gá, yoo wulə kʋ tʋŋa
á lʋʋ wúlú máŋá tə wa,
yá ba yà nə wá man kʋ ba bɩrɩ aba,
á yà bá sɛ̀ kʋ.
6 Nə̀ń, à pɩn Kaləde tɩ̀án bɩ̀àn,
ba yɩ lalʋʋ ba nə jə dɩ̀àn zənzən,
ba ga ba lɩ̀à yinəgə dəri.
Ba vəli lʋʋ mama wa,
ba ta ba jon bwálá,
tə nə tà ba nyiən, ba tɩnɩ.
7 Ba jə bɩcapuri, ba ga ba kamandon jə.
Kʋ tə ba tətə nə swə nə ba yàá fwa,
ba ma bɩrɩ ba dɩ̀àn.
8 Ba səsen dəri lala tə doni gwiə,
tə nɛɛ ga lɩŋa tɩa,
tə doni didəni nii buyurən nyankwen.
Ba səsədɩra tə dəri
ba naŋa yiŋʋnɩ ba bɩ̀àn,
ba faŋa ba cwi, ndə zənpuu nə piri,
kʋ cwi nàŋʋ́ yuu wa.
9 Ba mama yɩ ba bɩ̀àn,
sə ba tʋn dɩ̀àn lɩ̀à yɩra.
Ba yáá te mənəmənə, ba vələ.
Ba ken ywə́ŋə́ duən yáá, ndə kasɩlʋ nə.
10 Ba mʋ̀ lɩ̀à təntə fʋfʋlɩ pɛ̀gá,
ba də́ bɩyɩrɩ yáá tɩ̀án yɩra.
Ba yáá tə̀lə́ də dɩ̀àn dəkuu bwálá:
Ba yàá lwà kukurə nacanɩ nəfarʋ tə yɩra,
ba ma ta ba jon tə ba tɩnɩ.
11 Yá ba dàń yàá kɛ̀ń ndə kùlì nə,
ba va yáá don wa, ba tʋn lwanɩ.
Ba dɩ̀àn tə nə yɩ ba Yɩɩ.
Habakukə kʋ́ʋ̀ bon ʋ kə Yɩɩ nə
12 Kʋ tà n mʋ̀ nə yɩ Ba-Yígúrə́-Jə-Tiu,
à tíú Yɩɩ tə nə yɩ parɩ, n nə ba tɩ,
kʋ máŋá nə ba yigə naaa?
Ba-Yígúrə́-Jə-Tiu, n kúrí dʋŋa təntə,
sə n ma bʋ̀rɩ̀ nə bʋra.
N mʋ̀ Yɩɩ tə nə cɩ̀ à nə ndə pɩʋ nə,
n tún ba, sə ba kə nəba càn wa.
13 N yɩ́á yɩ parɩ zənzən də tə ywàń lwanɩ,
n wàrɩ̀ fɩfɩan tə n ywàŋá.
Bɛ̀ɛ̀ dàń nə pɩn n ywàŋá
níə́ bələ tɩ̀án tə tʋ̀tʋ̀nán tə,
yá n ba yoo swɩ̀n?
Bɛ̀ɛ̀ nə pɩn n ba yoo swɩ̀n,
də wʋlʋnyiən nə cʋ̀gà cɩ́gá tíú?
14 N ja ləzoni n ma jì ndə mʋʋ wa filə nə,
n ja ba n jì ndə wonənən nə,
tə nə ba yuu-tiu jə.
15 N pɩn Kaləde tɩ̀án tə janɩ ba mama də gwala,
ba vaŋa ba, ba kəni ba gəgəlu wa,
ba lɩ ba, ba kəni ba sɔ́ɔ́ wa,
yá ba dàń jwɛ, ba wulə pupwən wa.
16 Ba dàń fwa joŋi ba pa ba gəgəlu nə,
ba ga sʋ̀rɩ́ wusinə ba pa ba sɔ́ɔ́ nə.
Cɩ́gá, tə mʋ̀ nə pɩn ba nə̀ń ba ywánɩ́,
ba ga də́ wodiu nəzəŋu.
17 Kʋ mʋ̀ yɩrɩ,
kʋ dàń yɩ ba wá van ba kwatara sɩ̀ʋ́ tə,
ba cʋ̀rɩ̀ máŋá mama wuuu,
ba ma gwɩ lʋʋ dwíə́,
ba bá dəri yinəgə naaa?