Habakukə boŋə ʋ kəni Yɩɩ nə, sə ʋ bà ʋ jon wa
3
1 Yɩɩ nii sʋ̀sʋ̀nʋ̀ Habakukə jʋn Yɩɩ,ʋ swɩ̀n sʋ̀ràn ndə lúə́ pucʋnɩ gwaran nə:
2 Ba-Yígúrə́-Jə-Tiu, à nì kʋ tə n nə swɩ̀n n bɩrɩ,
yá n tʋtʋnfaran tə fən jə nə, Ba-Yígúrə́-Jə-Tiu!
Tʋn tə, n pa tə nii sú, bɩna tə wa tə nə bɩ̀àn,
n ga pa ba lwarɩ tə, bɩna tə wa tə nə bɩ̀àn!
Yá máŋá tə n lɩŋa nə zaŋa,
sə n lìí də n yɩ Yɩɩ tə, n nə dəri ləzoni yinəgə!
3 Yɩɩ naŋa Teman nagwanaa wa ʋ bɩ̀àn,
Yɩɩ tə nə yɩ parɩ naŋa Paran pɛɛn tə wa, ʋ bɩ̀àn. Zɩgɩ sìí bwálɩ́.
ʋ dun pɩ̀rɩ̀ lanworu tə,
ʋ bʋra ga sú tɩa tə.
4 Ʋ yɩ ndə yɩcaʋ poni nə,
yɩcayana naŋa ʋ jɩɩn wa,
mə lá nə ʋ dɩ̀àn tə səgə.
5 Tɩan yayɩpwarʋ wulə ʋ yáá con, kʋ vəli,
yalɩŋa ga nan kʋ pú ʋ kwa.
6 Ʋ nə cən ʋ zɩgɩ, tɩa tə yàá sisigə.
Ʋ nə ywàŋá lʋʋ dwíə́ tə, ba yàá zəzəgə.
Pɛɛn tə nə wulə, kʋ máŋá nə ba yigə, lwe,
yá fuən dədwələn tə buburi duən yuu,
tə mʋ̀ yà ga nə yɩ ʋ coŋi fuən nə.
7 À na cʋcʋran Kuswan tɩ̀án gansilə də̀ń,
Madɩan lʋʋ nii yuu yikwala bwálá vuvugə.
8 Ba-Yígúrə́-Jə-Tiu lɩŋa tə yɩ
tə zaŋa mʋnɛɛ tə yuu wa naaa?
Mʋnɛɛ tə yuu wa nə n lɩŋa tə zaŋa,
mʋʋ tə yuu wa nə n lɩŋa tə pupwin,
máŋá tə wa, n nə dɩ̀gà n səsen yuu,
n jə̀ə́ n səsen kòrə̀n wa,
n nə ma də́ dɩ̀àn?
9 N tanɩ n twan,
n duri tə nə yɩ n sʋgʋ tə cɩan. Zɩgɩ sìí bwálɩ́.
N ja mʋnɛɛ n ma lwa tɩa tə.
10 Pɛɛn tə na mʋ́, yá tə vɩvaga,
dwafarʋ nɩ̀ŋà,
bʋʋ nəfarʋ tə kʋ də̀ń nə lu* fʋ̀rɩ̀,
kʋ ga zɩ̀n kʋ nakulə yɩɩ nə.
11 N cɩan tə n nə ta poni pɩn,
yɩcaʋ tə də cànà tə cən tə zɩga,
n cwiin tə pɩpɩlʋ yáá con.
12 N jírí tɩa tə mama də lɩŋa nəfarʋ,
n tɩtaga lʋʋ dwíə́ tə də lɩŋa.
13 N nan sə n jon n lalʋʋ tə,
sə n jon pɩ̀ʋ́ tə n nə kúrí.
N mà wʋlʋnyiən dəyuu, n dɩ,
n gwɛrɩ ʋ dìə̀, n ja cú n ja ka dəkuu nə. Zɩgɩ sìí bwálɩ́.
14 Dʋŋa tə yà dəri lala,
ba bɩ̀àn, ndə dwavʋʋ nə,
sə ba laga nəba duən yáá nə.
Ba yà mà pupwən cə̀rí, ndə lɩ̀à nə,
ba nə dí dɩ̀àn yinənyiən yuu wa, yisəgə bwálɩ́ wa.
Yá n jɩn ba tə tətə cwiən tə,
n ma zwa ba pɛ̀gá yuu, n pórí.
15 N súrí cwəŋə n pa n səsen nə, mʋʋ wa,
nakulə nəfaran titəŋi wa.
16 À nì zizigu təntə mama,
yá à pùə́ cʋ̀gʋ̀ zənzən.
Fən pɩn à nii vɩvaga,
à kurən ga pʋ́,
yá à nɛɛ tɩ, à zɩga à vɩvaga,
à ma dànɩ̀ jɩgwarʋ dɩɩn tə,
nə dʋŋa nə wá bà,
ba pú lalʋʋ tə ba kə, ba ta.
17 Cɩ́gá, kapɩrʋ kʋ́ʋ̀ bá pùnə̀,
divɛn tɩ̀án kʋ́ʋ̀ bá lənə,
yá olivə* tɩ̀ʋ́ də kʋ́ʋ̀ bá zɩn ləni.
Kárɩ́ won mama bá bɩ.
Vanmɩnɩ wá jɛ́n pətuu wa,
yá vanfarʋ mama kʋ́ʋ̀ bá ya najɩrɩ wa.
18 Yá à mʋ̀ wá jwɛ Ba-Yígúrə́-Jə-Tiu yɩrɩ,
à wá fwa pupwən, Yɩɩ tə yɩrɩ, ʋ nə yɩ à jonu.
19 Yuu-Tiu Ba-Yígúrə́-Jə-Tiu nə yɩ à dɩ̀àn:
Ʋ pɩn à nɛɛ ba sɩ̀rɩ́, ndə naŋa nɛɛ,
yá ʋ pɩn à vəli pɛɛn yuu wa.
Gwàgá yáá tíú gwaran, ba nə nuŋə də gwaran zɩla, ba nə sán də ŋoni.