Dʋŋa cʋ̀gʋ̀ Zwerizalɛmə tɩʋ tə
Zwerizalɛmə cʋ̀gʋ̀
4
1 Haya! Sɩ́án tə yà nə cɩcɩlɩ, kʋ́ʋ̀ ba cɩcɩlɩ!Sɩ́án tə yà nə ba durən jə, dàń zʋa durən!
Kapana tə yà nə yɩ Yɩɩ nyiən
laga tə sú coŋi yuu mama!
2 Siyon tɩ̀án yà jə funə,
ndə sɩ́án nə, tə nə ba durən jə.
Kʋ twá nətə ba dàń ma jələ ba ndə daʋ nəkənə nə,
nəkənmarʋ nə fwa də ʋ jɩ̀àn?
3 Cirəkuri tətə pɩn yɩlɩ tə bɩ̀á nə, tə ŋʋ̀à.
Yá à tɩzəŋu tə mʋ̀ lɩ̀à tə waa lɩŋa,
ndə kasɔɔ lanworu tɛɛtɛɛ nə.
4 Nanyʋnɩ yàá pa bìsɩ̀ná nəndəli marɩ ʋ nipaa nə,
bìsɩ́ná lòrì wodiu, yá lìù mama ba ba pɩn.
5 Lɩ̀à tə yà nə də́ wodizəŋə dàń tɩ coŋi yuu,
yá lɩ̀à tə, ba nə kʋ̀nɩ̀ jɩjə wa, bɛ̀ɛ́ ywərən púrí yuu.
6 À tɩzəŋu tə lɩ̀à tə cʋna dwə Sodɔmə tɩ̀án cʋna,
tɩʋ təntə ga buburi duən yuu naa nədʋ,
yá lìù mama wà ʋ jɩɩn zɩ̀n ʋ ma mà kʋ.
7 Kʋ lɩ̀à tə nə yɩ Yɩɩ cɩcɩ nyiən*,
yà yɩ parɩ ba doni gunmuən,
ba poni yà dwə nayɩla,
ba yɩra sɩnɩ yà dwə kapan cɩ́nʋ́ cɩcɩlʋ nəsɩan don,
ba yáá ga tùŋə̀ ndə kapan cɩ́nʋ́ cɩcɩlʋ bʋla nə.
8 Yá sɩ́ʋ́n nə, ba yáá jìgə̀ nəzonu ka doni kəsənbini.
Ba kʋ̀ʋ́ yəri ba swɩan coŋi tə yuu.
Ba yatana tə marɩ ba kurən yɩra,
ka kʋ̀ ndə dàʋ̀ nə.
9 Lɩ̀à tə kwatara sɩ̀ʋ́ nə gʋa,
kʋkwa lɩ̀à tə niən nə gʋa.
Ba bwànɩ́, ba dɩ̀àn zwɛ̀,
vàrʋ́ càlɩ̀ nə mùrì ba yɩrɩ.
10 Kana təntə ba nə swə ba bɩ̀á zənzən,
tì ba də ba tətə jɩ̀àn, ba sàn,
ba pa ba jì ba nii wodiu,
máŋá tə wa cʋcʋran nə tʋa à lɩ̀à tə tɩzəŋu tə wa.
11 Ba-Yígúrə́-Jə-Tiu fwi ʋ lɩŋa tə nə pupwin, tə yí tə yígúrə́,
ʋ fwi ʋ lɩŋa nəfarʋ tə.
Ʋ sʋ̀rɩ́ mən Siyon tɩʋ tə wa,
tə də́ kʋ, tə cú tə ja kʋ dəkurən nə.
12 Tɩa yuu pɛ̀gá tə,
də lʋʋ ləzoni tə lìù mama yà wà bʋ́n,
də jarɩdon tə, də dʋŋʋ tə dɩɩn don
wá twá Zwerizalɛmə mimien tə,
ʋ zʋ kʋ wa.
13 Kʋ nətʋ tə tʋn,
cʋna tə yɩrɩ Yɩɩ nii sʋ̀sʋ̀nà tə nə tʋn,
də yolwana tə yɩrɩ Yɩɩ joŋwana tə nə tʋn.
Cɩ́gá, Yɩɩ joŋwana tə lwá cɩ́gá tɩ̀án jana, tɩʋ tə wa.
14 Ba twá lá ba tɩtɛ ndə lilirən nə, coŋi yuu.
Ba lwá lɩ̀à jana, ba ma kə tɩ̀àn durən wa,
kʋ pa lìù wà mɛ sə dwen ba gànàn yɩra.
15 Ba nə bɩ̀àn, lɩ̀à yàá cèrí ba wʋ́:
«Á naŋa kwa, ba yɩ durən lɩ̀à!
«Á naŋa kwa, á naŋa kwa,
á dànà ká dwen ba yɩra!»
Ba dəri, ba ywaŋa tɩa mama,
yá dwíə́ nəkaran* tə də dàń swɩ̀n, ba wʋ́:
«Ba kʋ̀ʋ́ wàrɩ́ nə con ba yanɩ!»
16 Ba-Yígúrə́-Jə-Tiu tətə nə laga ba duən yáá nə,
ʋ yà ba pɩ̀à sə ʋ pìí ʋ na ba.
Lìù mma yà kʋ́ʋ̀ ba Yɩɩ joŋwanʋ zìlí,
ʋ yáá də ga tə̀lə́ də nəkwɩa.
17 Nə kʋ́ʋ̀ kwi, nə yɩ́á ŋʋnɩ,
nə ma dànɩ̀ sáŋʋ́, yá nə ba sáŋʋ́ na.
Nə dànɩ̀, nə dànɩ̀ sə lʋʋ nii don jon nəba,
yá lʋʋ nii mama wà nəba jon.
18 Ba ywàŋá nə napɩrɩ vəli nə,
sə ba ma cɩ̀ nə nə,
nə dàn ká va nə bwálá nə.
Nə yígúrə́ bwə́lə́, nə dɩan cé.
Nə yígúrə́ yí.
19 Lɩ̀à tə nə fɩfɩn nəba lɩŋa
ba doni lanworu kayɩlan.
Ba púə́ nəba ba kə ba dɩŋɩ, pɛɛn yuu wa.
Ba səgə sə kasɔɔ lanworu wa, sə ba pùrì nəba.
20 Ʋ mʋ̀ lìù tə yà nə yɩ nə mɩɩ,
ʋ nə yɩ Ba-Yígúrə́-Jə-Tiu nə kúrí,
tʋa ba jɩɩn wa.
Ʋ mʋ̀ lìù tə, nə yà nə swɩ̀n ʋ yoo, nə wʋ́:
«Ʋ mʋ̀ yuu yɩrɩ, nə wá ya dwíə́ nəkaran tə wa.»
21 Fwaga pupwən, á ga jwɛ, Edomə tɩ̀án-ba,
á mʋ̀ lɩ̀à tə nə wulə Usə lʋʋ nii tə wa.
Ba wá pa Yɩɩ lɩŋa wùrú zʋŋa tə á də nə,
á nyʋn á sú, á bʋbʋnɩ,
á ga kʋ̀rɩ̀ á gànàn, á yá yaswələ.
22 N yolwan tə yí kʋ yígúrə́, Siyon bʋ̀áa.
Ba kʋ́ʋ̀ ba ja mʋ́ ba va yongaʋ.
Edomə tɩ̀án-ba, á mʋ̀ nə
Yuu-Tiu dàń wá kə càn wa, á yolwan tə yɩrɩ.
Ʋ wá pa lʋʋ mɛ na á yolwana tə.