Zwerizalɛmə tɩ̀án lòrì Ba-Yígúrə́-Jə-Tiu pubwanʋ tə
Lalʋʋ tə yɩjʋnɩ
5
1 Ba-Yígúrə́-Jə-Tiu, lìí n tɩ̀àn kʋ tə nə yí nəba yoo!Ywàń cavɩra nə yí nəba nətʋ!
2 Lʋʋ nii tə n nə pɩn nəba jìgə̀ vərə nyiən,
nə dìì ga jì lɩ̀à duən nyiən.
3 Nə jìgə̀ bitara, nə ba nyɩna,
nə ninə jìgə̀ ndə kadənə nə.
4 Nə nɩ́á yɩ nə yàá yə̀ də səbiu nə nywɩn,
yá nə dɛɛ yɩ nə yàá ŋwɩ́n ba ma ja bà.
5 Lɩ̀à tə nə fɩfɩn nəba, wulə nə kwa.
Nə gwàrɩ̀, ba ga nəba yá, ba pɩn nə sìí.
6 Nə larɩ jɩɩn Ezwipətə də Asiiri tɩ̀án con,
sə nə ma yə̀ wodiu, nə də́ nə sú.
7 Nə nyɩna-ba tʋn cʋna, yá ba kʋ́ʋ̀ tə̀lə́,
yá ba cʋna tə yoo pìí kʋ tʋ nə yuu wa.
8 Ywə́ŋə́ dí dɩ̀àn nə yuu wa,
yá lìù tə̀lə́ sə ʋ jon nəba ba jɩɩn wa.
9 Nə yàá dʋgʋ nə mɩɩ, sə nə ma na nə nii wodiu,
lagʋra yɩrɩ, ba nə wulə kasɔɔ lanworu tə wa.
10 Niən pɩn nə yɩra wiri,
ndə nə wulə líí mən wa.
11 Ba pə̀ń kana də dɩ̀àn, Siyon tɩʋ tə wa,
də kacɩan, Zwida tɩan tə wa.
12 Ba kùrí tʋ̀tʋ̀nán yun tɩ̀án də ba jɩɩn,
ba ba nəkwɩna zìlí.
13 Ləzwəndʋn zɩŋa nʋŋʋ,
yá bisɩmabarɩ zɩŋa dakuni,
tə dun pa ba tətəli.
14 Nəkwɩna tə kʋ́ʋ̀ ba duən jəri tɩʋ tə mimii nə,
yá ləzwəndʋn tə də kʋ́ʋ̀ ba bwana bwanɩ.
15 Nə kʋ́ʋ̀ ba pupwən jə,
nə sɩʋ tə lwàń kʋ jì lúə́ pucʋnɩ.
16 Nə dun yupuu tə súrí nə yuu nə, kʋ tʋ!
Lɛɛ yí nəba, nə nə tʋn cʋna yɩrɩ!
17 Nə̀ń yoo tə nə pɩn nə bɩcan ma yɩ̀,
nə̀ń kʋ tə nə pɩn nə yɩ́á ma bwànɩ̀:
18 Kʋ yɩ Siyon paan tə nə cʋ̀gʋ̀ yɩrɩ,
ka jìgə̀ cirəkuri yijirə bwálɩ́.
19 N mʋ̀ Ba-Yígúrə́-Jə-Tiu jə̀ə́ n padaʋ tə yuu,
n də́ pàrɩ̀ máŋá də máŋá mama wuuu.
20 N wá swɛ̀ɛ́ nə yoo máŋá mama wuuu naaa?
N wá vɩ nəba n dʋgʋ, nə lʋʋ wúlú tə mama wa naaa?
21 Ba-Yígúrə́-Jə-Tiu, pa nə pìí nə bà n con,
yá nə wá pìí nə bà n con!
Pìí n pa nəba mɩɩ, ndə dí yáá tə nə!
22 N yɩ n vɩga nəba n dʋgʋ mɩ́ámɩ́án naaa?
N lɩŋa wá zàn nə yuu wa, tə ja lɛ tɩa nə naaa?