Danɩyɛlə
Danɩyɛlə sagɩ tə yuu wa sʋgʋ
Danɩyɛlə sagɩ tə yɩ ba pʋ́pʋ́nɩ́, máŋá tə wa lʋʋ lɩ̀à pɛ̀gá tə nə fɩfɩn Zwifə-ba tə, ba ga keni ba càn wa. Kʋ twá də yomanan də nɩʋn, lìù tə ʋ nə pʋ́pʋ́nɩ́ sagɩ tə ma daŋa lalʋʋ tə jɩɩn, sə ba kə ba waa Yɩɩ nə.
Sagɩ tə pwɛ̀ bwálá bələ.
- Sagɩ tə təntən bwálɩ́ tə (1-6) maŋa nətʋ tə balandʋrʋ don, ʋ yɩrɩ nə yɩ Danɩyɛlə də ʋ dabara batwa ba nə ja va yongaʋ, nə jìgə̀ tʋ̀tʋ̀nán yun tɩ̀án, ba nə jə dun, Babɩlɔnə lʋʋ nii tə wa. Ba zɩgɩ kankan ba waa tə wa, ba nə ken Yɩɩ nə, də ba nə swə ba wá kwɩ̀n ba mɩɩ tə nə (gərən bʋʋ wa, də mən bʋʋ wa).
- Sagɩ tə bələ nii bwálɩ́ tə nə, Yɩɩ bɩrɩ nɩʋn duən də̀ń nə, Danɩyɛlə nə, tə nə bɩrɩ payun kapʋpʋ yáá vəlu də tə tʋrɩ yoo. Máŋá don wa, malɩkɛ yàá nə gwìń nɩʋn təntə də̀ń tə bɩrɩ wá.
Sagɩ kʋ tə daŋa Yɩɩ lɩ̀à tə jɩɩn, sə ba va yáá yojanan də càn máŋá wa. Danɩyɛlə nɩʋn tə wa, nə na də kʋ nə yɩ yiri mama, Yɩɩ tə yàá nə də́ dɩ̀àn.
Sagɩ swapitərə 7, vɛrəse 13 də 14 wa, Danɩyələ swɩ̀n, ʋ wʋ́: «À tɩtɩn nɩʋn tə wa, à nɩ lìù ʋ nan bakwan tə wa ʋ bà, ʋ nyən ndə ləzwənə nə. Ʋ te ʋ yáá bazʋnʋ tə con, ʋ vələ, yá ba pɩn ʋ va ʋ yí bazʋnʋ tə yɩra. Ba pɩn wá dɩ̀àn, də dun, də pàrɩ̀, yá lʋʋ níə́ tə mama lɩ̀à, də dwíə́ tə mama lɩ̀à, də nandələ sʋ̀ràn tə mama lɩ̀à dàń wá tʋn ba pa wá. Ʋ pàrɩ̀ dɩ̀àn tə wá ya lá máŋá mama, tə bá ja yígúrə́, yá ʋ pàrɩ̀ tə bá cʋ̀gʋ̀ də mama».
Sagɩ tə sʋyun
Təntən bwálɩ́
Danɩyɛlə də ʋ dabara dí dɩ̀àn 1
Danɩyɛlə gwìń Nebukadənezarə pandwɩa də̀ń 2
Yɩɩ jon Danɩyɛlə dabara batwa tə 3
Nebukadənezarə kwɩ̀n ʋ payuu nə 4
Pɩ̀ʋ́ Bɛləswasarə nɩ sʋgʋ 5
Yɩɩ jon Danɩyɛlə gərən jɩɩn wa 6
Bələ nii bwálɩ́
Danɩyɛlə nɩ ganaŋa banɩa 7
Danɩyɛlə nɩ pabɩʋ də bʋtɩlʋ 8
Danɩyɛlə jʋn Yɩɩ ʋ pa ʋ lɩ̀à tə nə 9
Danɩyɛlə nɩ nɩʋn mʋnaa tə nii nə 10-12