Danɩyɛlə 1

Danɩyɛlə

Danɩyɛlə də ʋ twaduən wulə Babɩlɔnə nə

1 Zwida pɩ̀ʋ́ Yehoyakimə pàrɩ̀ tə batwa nii bɩnɩ tə wa, Babɩlɔnə pɩ̀ʋ́ Nebukadənezarə twi ʋ pú Zwerizalɛmə tɩʋ tə ʋ kə, də kʋ̀ʋ̀. 2 Yuu-Tiu ken Zwida pɩ̀ʋ́ Yehoyakimə, də Yɩɩ dìə̀ zɩla tə vàn don Nebukadənezarə jɩɩn wa. Ʋ jɩn zɩla tə ʋ va Babɩlɔnə, Swineyarə lʋʋ nii tə wa, ʋ kə ʋ yɩa tə jɩjə dìə̀ wa.

3 Pɩ̀ʋ́ tə swɩ̀n ʋ tʋ̀tʋ̀nà yuu tíú Aswəpenazə con, sə ʋ ja Yɩzərayɛlə lɩ̀à tə duən, ba nə yɩ pɛ̀gá dwíí, nə à yə̀ə́ dun tɩ̀án dwíí, ʋ kə lá ʋ bà. 4 Ba mɛ sə ba ya balandʋra, ba yɩra nə zurə, ba ga cé, ba nə yɩ nanʋnbara, ba nə jə wʋbʋŋa yiri mama, də yənu, pubʋŋa, ba nə wàá yìə̀n də̀ń ba nì, ba ga wàá padiə wa ba tʋŋa. Yá ba dàń wá kàrɩ̀ ba Kaləde tɩ̀án pʋpʋnbɩa, də ba sʋgʋ. 5 Pɩ̀ʋ́ tə pɩn nii, sə ba pa ba wodiu tə, ʋ nə də́, də divɛn tə ʋ nə nywɩn vàn don, dɩɩn mama. Ʋ pɩ̀à sə ʋ kʋna ba, bɩna batwa, sə ba dàń ga zɩgɩ lá, ba tʋn ba pa wá.

6 Danɩyɛlə, də Hananɩa, də Mikayɛlə, də Azarɩya yɩn Zwida dwíí lɩ̀à tə wa, ba nə kúrí. 7 Tʋ̀tʋ̀nà yuu tíú tə dɩga yɩra nədʋra, ʋ pa ba. Ʋ dɩga Danɩyɛlə yɩrɩ, Bɛlətəswasarə, ʋ dɩ Hananɩa yɩrɩ, Swadərakə, ʋ dɩ Mikayɛlə yɩrɩ, Meswakə, ʋ dɩ Azarɩya yɩrɩ, Abɛdə-Nego. 8 Danɩyɛlə kúrí ʋ tì, sə ʋ dàn ká kə ʋ tɩ̀àn durən wiən wa, kʋ twá də wodirən tə, pɩ̀ʋ́ tə nə də́, də divɛn tə ʋ nə nywɩn. Yá ʋ dàń lòrì tʋ̀tʋ̀nà yuu tíú tə, sə ʋ dàn ká kalɩ wá, ʋ kə durən wiən wa. 9 Yɩɩ pɩn Danɩyɛlə na yuywaŋʋ tʋ̀tʋ̀nà yuu tíú tə yáá con, kʋ pa ʋ dəri Danɩyɛlə yinəgə. 10 Tʋ̀tʋ̀nà yuu tíú tə swɩ̀n Danɩyɛlə con, ʋ wʋ́: «À dəri à yuu-tiu pɩ̀ʋ́ fən! Ʋ mʋ̀ nə bɩrɩ kʋ tə, á nə mɛ sə á də́, də kʋ tə, á nə mɛ sə á nyʋn. Ʋ nə nɩ də á bwànɩ́, á doni á suruduən ləzwəndʋn tə, ʋ wá goŋə à yuu á yɩrɩ.» 11 Danɩyɛlə dàń swɩ̀n tʋtʋnʋ tə con, tʋ̀tʋ̀nà yuu tíú tə nə ken ʋ tətə Danɩyɛlə, də Hananɩa, də Mikayɛlə, də Azarɩya ʋ jɩɩn wa, sə ʋ ywàń ba yuu, ʋ wʋ́: 12 «Dí yáá n dídə́n nə mʋ̀ n tʋ̀tʋ̀nà tə, dɩan fugə. Ba pɩan nəba dwavʋran cɩcɩ, sə nə də́, ba ga pa nəba nɩ́á, sə nə nyʋn. 13 Kʋ kwa nə, n dàń wá ywàń nə yatana nə yɩ nətʋ, də ləzwəndʋn tə nə də́ pɩ̀ʋ́ wodirən tə yatana nə yɩ nətʋ. Yá n dàń wá twá kʋ tə nə, n nə mɩ̀àn n na, n ma ja nəba.» 14 Bɛɛ tə sɛ̀ ba lòrí tə, yá ʋ dídə́n ba dɩan fugə. 15 Dɩan fugə tə nii nə, ba yɩra yà zurə, ba ga nu, ba lɩ pwìí, ba doni ləzwəndʋn tə mama, ba nə də́ pɩ̀ʋ́ wodirən tə. 16 Kʋ nə zɩgɩ máŋá təntə wa, tʋtʋnʋ tə yàá ja wodirən tə də divɛn tə, ba nə pɩn ba, ʋ vìí, ʋ ga pɩn ba dwavʋran. 17 Yɩɩ pɩn pubʋŋa, də pʋpʋnbɩa yiri mama yənu, də wʋbʋŋa balandʋra banɩa təntə nə. Yá Danɩyɛlə mʋ̀ yà gwìń yìə̀n tə mama də̀ń, ʋ nə nɩ nɩʋn wa, də pandwɩa wa, ʋ bɩrɩ.

18 Máŋá tə pɩ̀ʋ́ tə nə tún, sə ba ja ləzwəndʋn tə ba bà, ba pa wá nə yí, tʋ̀tʋ̀nà yuu tíú tə jɩn ba ʋ va pɩ̀ʋ́ Nebukadənezarə yáá con. 19 Pɩ̀ʋ́ tə ve də ba, yá lìù yà tə̀lə́ ləzwəndʋn təntə mama wa, ʋ nə jə yənu ndə Danɩyɛlə, də Hananɩa, də Mikayɛlə, də Azarɩya nə. Yá ba dàń yɩn pɩ̀ʋ́ tə con, ba tʋŋa ba pɩn wá. 20 Pɩ̀ʋ́ tə nə bwe ba yoo mama, kʋ nə yɩ wʋbʋŋa, nə à yə̀ə́ yənu yoo, ʋ yàá na də ba yənu dwə vʋra tə mama, də lɩ̀à tə mama nə ywàŋá lanworu, ba ma lwarɩ jwɩan yoo, ba nə wulə ʋ payuu tə mama wa.

21 Mə nətʋ nə Danɩyɛlə tʋn ʋ pa pɩ̀ʋ́ tə nə, kʋ va kʋ yí pɩ̀ʋ́ Sirusə pàrɩ̀ tə təntən bɩnɩ tə.