Nebukadənezarə təntən pandwɩa tə yoo
2
1 Nebukadənezarə pàrɩ̀ tə bələ nii bɩnɩ tə wa, ʋ dwɛ̀ pandwɩa. Ʋ pùə́ cʋ̀gʋ̀, dwiən ga nan ʋ yɩ́á wa. 2 Ʋ pɩn ba bon vʋra tə, də lɩ̀à tə nə ywàŋá lanworu, ba ma lwarɩ jwɩan yoo, də cɩra tə, də Kaləde tɩ̀ána tə, sə ba bɩrɩ wá ʋ pandwɩa tə. Ba twi ba zɩga ʋ yáá con. 3 Pɩ̀ʋ́ tə swɩ̀n ba con, ʋ wʋ́: «À dwɛ̀ pandwɩa, yá tə pɩn à pùə́ cʋ̀gʋ̀, à nə kəni cɩ́gá sə à pìí à lìí tə yɩrɩ.» 4 Kaləde tɩ̀án tə le pɩ̀ʋ́ tə də Aramə tɩ̀án sʋgʋ, ba wʋ́: «Yɩɩ wá pa mɩdarɩ nə nyɩna pɩ̀ʋ́ nə! Swɩ̀n pandwɩa tə, n bɩrɩ nə mʋ̀ n tʋ̀tʋ̀nà tə nə, yá nə wá gwìń tə də̀ń, nə bɩrɩ mʋ́.» 5 Pɩ̀ʋ́ tə kʋ́ʋ̀ swɩ̀n Kaləde tɩ̀án tə con, ʋ wʋ́: «Nəŋə kʋ tə à nə wá ma tʋn aba, də á nə wà pandwɩa tə man á bɩrɩ nə, á ga gwìń tə də̀ń: À wá pa ba ca aba, à ga pa ba mà á dìì tə, ba buburi duən yuu. 6 Yá á nə man à pandwɩa tə, á ga gwìń tə də̀ń, á bɩrɩ nə, à wá pa aba zìlə́ wiən tə nə jə funə, də dun nəfarʋ. Kʋ mʋ̀ yɩrɩ, á swɩan pandwɩa tə, á ga gwìń tə də̀ń, á bɩrɩ nə.»7 Ba kʋ́ʋ̀ le pɩ̀ʋ́ tə nɛɛ bələ nii nə, ba wʋ́: «Nə nyɩna pɩ̀ʋ́, swɩ̀n n pandwɩa tə, n bɩrɩ nə mʋ̀ n tʋ̀tʋ̀nà tə nə, yá nə wá gwìń tə də̀ń, nə bɩrɩ mʋ́.» 8 Pɩ̀ʋ́ tə kʋ́ʋ̀ swɩ̀n, ʋ wʋ́: «À yə̀ə́ də kʋ yɩ á pɩ̀à sə á na máŋá, á nə yə̀ə́ yoo tə à nə wá ma tʋn aba yɩrɩ. 9 Á nə wà à pandwɩa tə man á bɩrɩ nə, càn nədʋ təntə nə wá yí á mama. Á vʋrɩ duən nə, sə á swɩ̀n kʋ̀nkʋ̀n də gɩgara sʋ̀ràn à con, á ma dànɩ̀ də yoo tə máŋá lwànɩ́. Kʋ mʋ̀ yɩrɩ, á maŋa à pandwɩa tə, á bɩrɩ nə, yá à wá lwarɩ də, á wàá tə də̀ń də á gwìń, á bɩrɩ nə.» 10 Kaləde tɩ̀án tə le pɩ̀ʋ́ tə, ba wʋ́: «Ləzwənə tə̀lə́ tɩa yuu wa, ʋ nə wàá kʋ tə pɩ̀ʋ́ tə nə pɩ̀à, ʋ maŋa. Kʋ mʋ̀ nə pɩn, pɩ̀ʋ́ wà lá yɩn, ʋ nə yɩn ləzwənfarʋ, nə à yə̀ə́ dɩ̀àn tíú, ʋ nə kalɩ vʋra, də lɩ̀à tə nə ywàŋá lanworu, ba ma lwarɩ jwɩan yoo, də Kaləde tɩ̀án, sə ba swɩ̀n kʋ yoo tə yiri, ba bɩrɩ wá. 11 Kʋ tə pɩ̀ʋ́ tə nə pɩ̀à cà, yá lìù tə̀lə́ ʋ nə wàá kʋ ʋ swɩ̀n ʋ con, də kʋ nə tà yɩa tə, tə ga tə̀lə́ ləzoni titəŋi wa!» 12 Kʋ sʋgʋ təntə pɩn pɩ̀ʋ́ tə lɩŋa kwɛn tə zàn zənzən. Ʋ pɩn nii sə ba gʋ Babɩlɔnə wʋbʋnyɩna tə mama. 13 Ba bòrì pɩ̀ʋ́ nii təntə ba bɩrɩ, də ba wá gʋ wʋbʋnyɩna tə. Yá ba dàń twarɩ Danɩyɛlə də ʋ twaduən tə, sə ba gʋ ba də.
Yɩɩ bɩrɩ pɩ̀ʋ́ tə pandwɩa tə Danɩyɛlə nə
14 Danɩyɛlə zùrì ʋ yɩra ʋ twá də wʋbʋŋa, ʋ swɩ̀n Arɩyɔkə con, ʋ nə yɩ lɩ̀à tə nə cɩ̀ pɩ̀ʋ́ nə yuu tíú, ʋ yà nə nan sə ʋ gʋ Babɩlɔnə wʋbʋnyɩna tə. 15 Ʋ bwe Arɩyɔkə, ʋ wʋ́: «Bɛ̀ɛ̀ nə pɩn pɩ̀ʋ́ tə ma pa nii, kʋ nə cà nətən?» Yá Arɩyɔkə dàń man yoo tə, ʋ bɩrɩ Danɩyɛlə nə. 16 Yá Danɩyɛlə vəli, ʋ lòrì pɩ̀ʋ́ tə, sə ʋ pa wá máŋá, yá ʋ wá gwìń pandwɩa tə də̀ń, ʋ bɩrɩ wá. 17 Kʋ kwa nə, Danɩyɛlə pìí ʋ va ʋ sàń, yá ʋ man yoo tə ʋ bɩrɩ Hananɩa, də Mikayɛlə, də Azarɩya nə, ba nə yɩ ʋ twaduən. 18 Ʋ swɩ̀n ba con, sə ba lòrì Yɩɩ tə, ʋ nə wulə lanworu wa, ʋ nə dəri ləzoni yinəgə, kʋ yosəgu təntə yɩrɩ, sə ba dàn ká gʋ ʋ mʋ̀ Danɩyɛlə, də ʋ twaduən tə, də Babɩlɔnə wʋbʋnyɩna tə duən tə. 19 Yá tɩtɩn nə, Yɩɩ gwìń yosəgu tə də̀ń, ʋ bɩrɩ Danɩyɛlə nə, nɩʋn wa. Yá Danɩyɛlə dàń bʋ̀à Yɩɩ tə nə, ʋ nə wulə lanworu wa. 20 Danɩyɛlə swɩ̀n, ʋ wʋ́:
«Yɩɩ yɩrɩ tə mɛ də bʋra,
máŋá də máŋá mama wuuu!
Wʋbʋŋa də dɩ̀àn yɩ ʋ mʋ̀ nə tɩ.
21 Ʋ mʋ̀ nə lwànɩ́ máŋá, də yìə̀n tə nə tʋŋa,
ʋ mʋ̀ nə pɩn pɛ̀gá twɩ,
ʋ mʋ̀ ga nə túŋə́ pɛ̀gá, pàrɩ̀ yuu wa.
Ʋ mʋ̀ nə pɩn wʋbʋŋa wʋbʋnyɩna nə,
ʋ ga pɩn yənu pubʋŋa tɩ̀án nə.
22 Ʋ mʋ̀ nə yàá gwìń yìə̀n tə,
tə də̀ń nə lu, tə ga səgə də̀ń.
Ʋ yə̀ə́ kʋ tə nə səgə yikunu wa,
yá poni wulə də wá.
23 À nyɩna-ba Yɩɩ, à səni mʋ́, à ga bwɩ n nə,
wʋbʋŋa tə də dɩ̀àn tə yɩrɩ, n nə pɩn nə.
Cɩ́gá, n pɩn à lwarɩ kʋ tə, nə nə lòrì n con,
yá n pɩn nə lwarɩ pɩ̀ʋ́ tə yojanʋ tə!»
24 Kʋ kwa nə, Danɩyɛlə vəli Arɩyɔkə con, pɩ̀ʋ́ tə yà nə pɩn wá nii, sə ʋ gʋ Babɩlɔnə wʋbʋnyɩna tə. Ʋ vəli ʋ swɩ̀n ʋ con, ʋ wʋ́: «Dàn ká gʋ Babɩlɔnə wʋbʋnyɩna tə. Ja nə n va pɩ̀ʋ́ tə yáá con, yá à wá gwìń pandwɩa tə də̀ń, à bɩrɩ wá.» 25 Lala də Arɩyɔkə ja Danɩyɛlə ʋ va pɩ̀ʋ́ tə yáá con, ʋ ga swɩ̀n pɩ̀ʋ́ tə con, ʋ wʋ́: «À nɩ bɛɛ lɩ̀à tə wa, ba nə ja nan Zwida lʋʋ nii, ʋ nə wá gwìń pandwɩa tə də̀ń, ʋ bɩrɩ n mʋ̀ à nyɩna pɩ̀ʋ́ nə.»
Lugu ləzwənə nyɩnyɩga tə, ka nɛɛ nə ba dɩ̀àn jə
26 Pɩ̀ʋ́ tə bwe Danɩyɛlə, ba nə boŋə Bɛlətəswasarə, ʋ wʋ́: «Cɩ́gá mama, n wàá à pandwɩa tə, n maŋa n bɩrɩ nə, n ga gwìń tə də̀ń?» 27 Danɩyɛlə zɩgɩ pɩ̀ʋ́ tə yáá con, ʋ le, ʋ wʋ́: «Yosəgu tə à nyɩna pɩ̀ʋ́ nə pɩ̀à sə ʋ lwarɩ, tà wʋbʋnyɩna, də lɩ̀à tə nə ywàŋá lanworu, ba ma lwarɩ jwɩan yoo, də vʋra, də lɩ̀à tə nə tʋŋa cɩrɩ yìə̀n nə wàá kʋ ba bɩrɩ à nyɩna pɩ̀ʋ́ nə. 28 Yá Yɩɩ wulə lanworu tə wa, ʋ nə gwìń yìə̀n tə nə səgə də̀ń. Ʋ mʋ̀ nə pɩn n mʋ̀ à nyɩna pɩ̀ʋ́ Nebukadənesarə lwarɩ kʋ tə nə wá bà, máŋá wa ka nə bɩ̀àn. Nə̀ń n pandwɩa tə, də nɩʋn tə Yɩɩ nə bɩrɩ mʋ́, n sapaa wa. 29 Ooo à nyɩna pɩ̀ʋ́, n sapaa wa, n nɩ yìə̀n n pubʋŋa wa, tə nə yɩ yìə̀n tə nə wá bà, máŋá wa ka nə bɩ̀àn. Yá Yɩɩ tə nə gwìń yìə̀n tə nə səgə də̀ń, pɩn n lwarɩ kʋ tə nə wá bà. 30 Yɩɩ nə gwìń yosəgu təntə də̀ń, ʋ bɩrɩ nə, kʋ tà kʋ pɩ̀à kʋ bɩrɩ də, à mʋ̀ jə wʋbʋŋa, ka nə dwə ləzoni mama wʋbʋŋa. Yá kʋ dàń nə yɩ, sə n mʋ̀ à nyɩna pɩ̀ʋ́ wànɩ́ n lwarɩ n pandwɩa tə də̀ń, n ga lwarɩ pubʋŋɩ tə nə wulə n bɩcan wa. 31 À nyɩna pɩ̀ʋ́, Yɩɩ bɩrɩ mʋ́ won n nɩʋn wa, kʋ nə yɩ ləzwənə nyɩnyɩga nəfarʋ. Ləzwənə nyɩnyɩga təntə yà yɩ nəfarʋ zənzən, kʋ ga jə fɩra zənzən. Kʋ yà zɩga n yáá con, yá kʋ yiri tə yà jə fən zənzən, kʋ pa mʋ́. 32 Ləzwənə nyɩnyɩga təntə yuu yà yɩ sɩ́án, tə nə ba durən jə. Kʋ nyʋnɩ də kʋ jɩ̀àn yà yɩ wárʋ́. Kʋ pùə́ də kʋ ciən yà yɩ cɩnɩan. 33 Kʋ nakoli yà yɩ lugu. Kʋ napɩra tə yà yɩ lugu də daʋ nə gùlí duən wa. 34 N yà wulə n ywàŋá kʋ, də nə̀ń kapan nə kʋ twi, kʋ mà ləzwənə nyɩnyɩga tə nɛɛ tə nə yɩ lugu də daʋ tə, kʋ pʋpʋgʋ, yá kapan təntə yà tà lìù nə dɩlɩ. 35 Yá lugu tə, də daʋ tə, də cɩnɩan tə, də wárʋ́ tə, də sɩ́án tə dàń pʋpʋgʋ, tə jì ndə wopulə nə, vʋʋ nə jànɩ̀ tʋa wa, fʋʋ wa. Vʋʋ tə jàn tə kʋ ja kɛ̀ń, yá tə jɛ́n mɩ́ámɩ́án. Yá kapan tə nə mà ləzwənə nyɩnyɩga tə jìgə̀ paan nəfarʋ, ka sú tɩa yuu mama. 36 Mə n pandwɩa tə nə nətʋ, à nyɩna pɩ̀ʋ́, yá nə dàń wá gwìń tə də̀ń, nə bɩrɩ mʋ́. 37 À nyɩna pɩ̀ʋ́, n mʋ̀ nə yɩ pɛ̀gá tə mama pɩ̀ʋ́. Cɩ́gá, Yɩɩ tə nə wulə lanworu wa pɩn mʋ́ pàrɩ̀, də wànʋ́, də dɩ̀àn, də dun. 38 Ʋ ken tɩa yuu ləzoni tə, də vàná tə, də lanworu zuŋi tə n jɩɩn wa, ʋ ga pa n də́ dɩ̀àn tə mama yuu wa. N mʋ̀ nə yɩ yuu tə nə yɩ sɩ́án tə. 39 Yá n mʋ̀ kwa nə, payuu don wá bà, kʋ nə wà n nyiən tə yí. Kʋ kwa nə, batwa nii payuu wá bà, kʋ mʋ̀ nə yɩ cɩnɩan tə, kʋ ga wá də́ dɩ̀àn tɩa yuu mama wa. 40 Yá banɩa nii payuu, kʋ nə jə dɩ̀àn ndə lugu nə wá bà. Payuu təntə wá pʋpʋgʋ payun tə duən tə mama, kʋ pa tə mumuni, ndə lugu nə yàá pʋpʋgʋ won, kʋ pa kʋ mama mumuni nətʋ. 41 N nɩ də ləzwənə nyɩnyɩga tə napɩra, də kʋ nafwɩ vàn don yɩ nəkənmarʋ daʋ, tə vàn don ga yɩ lugu: Kʋ nətʋ bɩrɩ də payuu təntə wá pwɛ̀, yá dɩ̀àn tə wulə kʋ wa ndə lugu nə, ndə n nə nɩ lugu tə, kʋ gùlí daʋ tə wa nətʋ. 42 Kʋ nafwɩ tə vàn don nə yɩ lugu, tə vàn don ga yɩ daʋ tə bɩrɩ, də payuu təntə vàn don wá ja dɩ̀àn, kʋ vàn don ga bá ja dɩ̀àn. 43 N nɩ lugu də daʋ, tə gùlí duən wa: Kʋ nətʋ bɩrɩ də, payuu təntə pɛ̀gá wá twá də kasweri, ba ma tún nimarʋ də duən, yá ba bá marɩ duən nə, ndə lugu də daʋ nə wàrɩ̀ duən nə tə marɩ nətʋ. 44 Pɛ̀gá təntə máŋá wa, Yɩɩ tə nə wulə lanworu wa wá tún payuu don, kʋ nə wàrɩ̀ kʋ cʋ̀gà də mama, yá dwíí don bá də́ dɩ̀àn kʋ yuu wa də mama. Kʋ payuu təntə wá pʋpʋgʋ payun tə duən tə mama nə dí yáá tə wulə, kʋ pa tə jɛ́n mɩ́ámɩ́án, yá kʋ mʋ̀ tətə wá ya lá, máŋá mama wuuu. 45 Mə kʋ mʋ̀ nə yɩ kapan tə, n nə nɩ də kʋ nan paan tə yɩra, yá lìù wà kʋ yɩra jɩn, kʋ bà kʋ mà lugu tə, də cɩnɩan tə, də daʋ tə, də wárʋ́ tə, də sɩ́án tə, kʋ pʋpʋgʋ. Yɩɩ tə nə wulə tə mɛ yuu wa pɩn à nyɩna pɩ̀ʋ́ lwarɩ yoo tə nə wá tʋn, máŋá wa ka nə bɩ̀àn. Yoo tə pandwɩa tə nə bɩrɩ cɩ́gá wá tʋn, kʋ ba tʋ́tʋ̀ná jə, yá tə də̀ń gwiun tə də twá cɩ́gá nə, ndə kʋ nə mɛ nətʋ.»
46 Pɩ̀ʋ́ Nebukadənesarə dàń tʋa ʋ nadwana yuu, ʋ pú ʋ yáá tɩa, Danɩyɛlə yáá con, ʋ ga pa nii sə ba fwa zìlə́ wiən jwəŋə, də wusinə jwəŋə, ba pa Danɩyɛlə nə. 47 Pɩ̀ʋ́ tə swɩ̀n Danɩyɛlə con, ʋ wʋ́: «Cɩ́gá mama, á Yɩɩ tə nə wulə yɩa tə mɛ yuu wa, ʋ ga yɩ pɛ̀gá tə mɛ Yuu-Tiu. Ʋ mʋ̀ nə gwìń yìə̀n tə nə səgə də̀ń, yá ʋ mʋ̀ nə pɩn, n wànɩ́ n gwìń yosəgu kʋ tə də̀ń.» 48 Kʋ kwa nə, pɩ̀ʋ́ tə ken Danɩyɛlə dun bwálɩ́ nə, ʋ ga pa wá zìlə́ wiən kapʋpʋ, tə nə jə funə. Pɩ̀ʋ́ tə tún wá, sə ʋ ywàń Babɩlɔnə nagwanaa tə mama yuu nə, sə ʋ ga ya Babɩlɔnə wʋbʋnyɩna tə mama yuu tíú. 49 Danɩyɛlə lòrì, sə pɩ̀ʋ́ tə pa Babɩlɔnə nagwanaa tə yuu ywàŋʋ́ tə Swadərakə, də Meswakə, də Abɛdə-Nego nə. Yá Danɩyɛlə tətə dàń yɩn pɩ̀ʋ́ dəwoo wa.