Pɩ̀ʋ́ tə pɩn nii, sə ba pa dun sɩ́án ləzwənə nyɩnyɩga nə
3
1 Pɩ̀ʋ́ Nebukadənezarə pɩn ba fwa sɩ́án ləzwənə nyɩnyɩga, kʋ yuu tɩa zɩgʋ nə yɩ jɩvaŋɩ yiə sapwitwa, kʋ wanɩ ga yɩ jɩvaŋɩ yiə bardʋ. Ʋ zɩgɩ kʋ Dura vara tə wa, Babɩlɔnə nagwanaa tə wa. 2 Pɩ̀ʋ́ Nebukadənezarə pɩn ba bon lɩ̀à tə, ʋ nə tún ʋ yuu yɩrɩ, də lɩ̀à tə nə ywàŋá payuu tə jɩjə yuu nə, də nagwanɛɛ yáá tɩ̀án tə, də lɩ̀à tə nə bʋ̀rɩ̀ bʋra yáá tɩ̀án tə, də lɩ̀à tə nə ywàŋá payuu tə səbiu yuu nə, də kwenə tə, də lɩ̀à tə nə bʋ̀rɩ̀ bʋra, də nagwanɛɛ yáá tɩ̀án tə mama, ʋ kə duən yáá, sə ba bà ba də́ ləzwənə nyɩnyɩga tə cànà, pɩ̀ʋ́ Nebukadənezarə nə fwa ʋ zɩgɩ. 3 Lɩ̀à tə ʋ nə tún ʋ yuu yɩrɩ, də lɩ̀à tə nə ywàŋá payuu tə jɩjə yuu nə, də nagwanɛɛ yáá tɩ̀án tə, də lɩ̀à tə nə bʋ̀rɩ̀ bʋra yáá tɩ̀án tə, də lɩ̀à tə nə ywàŋá payuu tə səbiu yuu nə, də kwenə tə, də lɩ̀à tə nə bʋ̀rɩ̀ bʋra, də nagwanɛɛ yáá tɩ̀án tə mama dàń twi ba kun duən nə, sə ba də́ ləzwənə nyɩnyɩga tə cànà, pɩ̀ʋ́ Nebukadənezarə nə fwa ʋ zɩgɩ. Ba vəli ba zɩga ləzwənə nyɩnyɩga tə yáá con, Nebukadənezarə nə fwa ʋ zɩgɩ yɩɩ.4 Lìù tə nə bòrì bwə̀rə́, baa də dɩ̀àn, ʋ wʋ́: «Nəŋə kʋ tə ba nə pɩn aba nii kʋ yuu wa, á mʋ̀ lalʋʋ yiri mama, də dwíə́ yiri mama, də nandələ sʋ̀ràn yiri mama lɩ̀à-ba! 5 Máŋá tə á nə nì nabwanvunu, də wúə́, də kwànʋ́, də bànʋ́, də vankaan, də nabwanpuri, də gwaran zɩla yiri duən mama kori, á mɛ sə á tʋ á nadwana yuu, á pa dun sɩ́án ləzwənə nyɩnyɩga tə nə, pɩ̀ʋ́ Nebukadənezarə nə fwa ʋ zɩgɩ. 6 Lìù tə mama ʋ nə wà ʋ nadwana yuu twɩ, ʋ pa kʋ dun, kʋ máŋá təntə tətə wa, ba wá dɩlɩ wá mənvwəsɩʋn bʋʋ wa.»
7 Kʋ mʋ̀ nə pɩn, máŋá tə lalʋʋ tə mama nə nì nabwanvunu tə, də wúə́ tə, də kwànʋ́ tə, də bànʋ́ tə, də vankaan tə, də gwaran zɩla yiri duən tə mama kori, lalʋʋ yiri mama, də dwíə́ yiri mama, də nandələ sʋ̀ràn yiri mama lɩ̀à tʋa ba nadwana yuu, sə ba pa dun sɩ́án ləzwənə nyɩnyɩga tə nə, pɩ̀ʋ́ Nebukadənezarə nə fwa ʋ zɩgɩ.
Daniyɛlə dabara tə yɩn pùə́ nədʋ tɩ̀án də Yɩɩ
8 Kʋ kwa nə, Kaləde tɩ̀ána duən dəri lala, ba bà ba swɩ̀n, ba zɩgɩ Zwida lʋʋ lɩ̀à tə nə. 9 Ba swɩ̀n pɩ̀ʋ́ Nebukadənezarə con, ba wʋ́: «Nə nyɩna pɩ̀ʋ́, Yɩɩ wá pa mʋ́ mɩdarɩ! 10 Nə nyɩna pɩ̀ʋ́, n pɩn nii, lìù mama nə nì nabwanvunu, də wúə́, də kwànʋ́, də bànʋ́, də vankaan, də nabwanpuri, də gwaran zɩla yiri duən mama kori, sə ʋ tʋ ʋ nadwana yuu, ʋ pa dun sɩ́án ləzwənə nyɩnyɩga tə nə. 11 Yá nii tə bɩrɩ də, lìù nə vɩga sə ʋ tʋ ʋ nadwana yuu, ʋ pa kʋ dun, ba wá dɩlɩ kʋ tíú mənvwəsɩʋn bʋʋ wa. 12 Yá nə̀ń Swadərakə, də Meswakə, də Abɛdə-Nego, ba mʋ̀ Zwida lʋʋ lɩ̀à təntə, n tətə nə tún, sə ba ywàń Babɩlɔnə nagwanaa tə yuu nə, ba nii tə n nə pɩn jələ mancɩn tətə, nə nyɩna pɩ̀ʋ́! Ba ba tʋŋa ba pɩn n yɩa tə nə, yá ba vɩga sə ba pa dun sɩ́án ləzwənə nyɩnyɩga tə nə, n nə fwa n zɩgɩ!»
13 Nebukadənezarə lɩŋa zàn zənzən, tə fʋrɩ, ʋ ga pa nii sə ba ja Swadərakə, də Meswakə, də Abɛdə-Nego ba bà ʋ yáá con. Ba ja bara təntə ba bà pɩ̀ʋ́ tə yáá con. 14 Nebukadənezarə bwe ba, ʋ wʋ́: «Kʋ yɩ cɩ́gá, Swadərakə, də Meswakə, də Abɛdə-Nego, də á ba tʋŋa á pɩn à yɩa tə nə, yá á vɩga sə á pa dun sɩ́án ləzwənə nyɩnyɩga tə nə, à nə fwa à zɩgɩ? 15 Sɩ́ʋ́n nə, á dàń kənə á siri! Máŋá tə á nə nì nabwanvunu tə, də wúə́ tə, də kwànʋ́ tə, də bànʋ́ tə, də vankaan tə, də nabwanpuri tə, də gwaran zɩla yiri duən tə mama kori, sə á tʋ á nadwana yuu, á pa dun ləzwənə nyɩnyɩga tə nə, à nə fwa. Á nə wà kʋ dun pɩn, kʋ máŋá təntə tətə wa, ba wá dɩlɩ aba mənvwəsɩʋn bʋʋ wa. Yá yɩɩ kwà nə wá jon aba à jɩɩn wa?» 16 Swadərakə, də Meswakə, də Abɛdə-Nego le pɩ̀ʋ́ Nebukadənezarə, ba wʋ́: «Nə bá le mʋ́ yoo təntə yuu wa. 17 Də yoo təntə nə wá yí nəba, nə tíú Yɩɩ tə, nə nə tʋŋa nə pɩn wá, wàá nəba ʋ joŋə, yá ʋ wá jon nəba mənvwəsɩʋn bʋʋ tə wa, də n mʋ̀ pɩ̀ʋ́ jɩɩn wa. 18 Yá kʋ nə tà nətʋ də, nə nyɩna pɩ̀ʋ́, yəni də nə bá tʋn nə pa n yɩa tə nə, nə ga bá pa dun sɩ́án ləzwənə nyɩnyɩga tə nə, n nə fwa n zɩgɩ.»
19 Nebukadənezarə lɩŋa dàń kwɛn tə zàn zənzən, tə fʋrɩ, ʋ yáá ga lwàń Swadərakə, də Meswakə, də Abɛdə-Nego yáá con. Ʋ pɩn nii sə ba lɩŋɩ mənvwəsɩʋn bʋʋ tə nɛɛ barpɛ, ba doni kʋ dɩan mɛ nə yàá lɩŋɩ nətʋ. 20 Kʋ kwa nə, ʋ pɩn nii ʋ kwatara tə wa kwatara babɩran tə nə, sə ba vwa Swadərakə, də Meswakə, də Abɛdə-Nego, ba dɩlɩ mənvwəsɩʋn bʋʋ tə wa. 21 Yá ba vwə bara təntə, də ba yɩra gànàn tə, ba ganbii də ba ganfaran, də ba yɩra gànàn tə duən, ba dɩlɩ mənvwəsɩʋn bʋʋ tə wa. 22 Pɩ̀ʋ́ tə yà pɩn nii də lɩŋa, ʋ pa ba lɩŋɩ mənvwəsɩʋn bʋʋ tə, ba ja lɛ. Kʋ nətʋ pɩn mənvwə tə gʋ bara tə nə dɩlɩ Swadərakə, də Meswakə, də Abɛdə-Nego mən tə wa. 23 Yá bara batwa təntə mʋ̀, Swadərakə, də Meswakə, də Abɛdə-Nego tʋa mənvwəsɩʋn bʋʋ tə titəŋi wa, də ba yɩra ŋoni tə.
Yɩɩ jon dabara batwa tə
24 Fən dàń zʋa pɩ̀ʋ́ Nebukadənezarə, ʋ ga nyɩ́n ʋ zàn lala. Ʋ bwe ʋ kwenə tə, ʋ wʋ́: «Kʋ tà bara batwa nə nə vwə, nə dɩlɩ mən tə wa naaa?» Ba le pɩ̀ʋ́ tə, ba wʋ́: «Awoo, mə nətʋ nə, nə nyɩna pɩ̀ʋ́!» 25 Pɩ̀ʋ́ tə pìí ʋ swɩ̀n, ʋ wʋ́: «À mʋ̀ na bara banɩa, ba nə wà ba vwe, ba wulə mən tə titəŋi wa, ba vəli, yá won mama ba ba jə. Yá banɩa nii lìù tə nyən ndə yɩa bìú nə.» 26 Nebukadənezarə dàń bólí mənvwəsɩʋn bʋʋ tə nii, ʋ ga swɩ̀n, ʋ wʋ́: «Swadərakə, də Meswakə, də Abɛdə-Nego, á mʋ̀ Baan Yɩɩ tʋ̀tʋ̀nà tə, á naŋa, á bà yəbə!» Yá Swadərakə, də Meswakə, də Abədə-Nego dàń nan mən tə wa. 27 Lɩ̀à tə pɩ̀ʋ́ tə nə tún ʋ yuu yɩrɩ, də lɩ̀à tə ywàŋá payuu tə jɩjə yuu nə, də nagwanɛɛ yáá tɩ̀án tə, də pɩ̀ʋ́ kwenə tə twi duən yáá. Ba nɩ də mən tə wà yoo mama fwa bara təntə yɩra: Mən tə wà ba yukʋran dí, tə wà ba gànàn cʋ̀gʋ̀, yá mən lwán tətə tə̀lə́ ba yɩra. 28 Nebukadənezarə swɩ̀n, ʋ wʋ́: «Swadərakə, də Meswakə, də Abədə-Nego Yɩɩ tə mɛ də bʋra! Ʋ mʋ̀ nə tʋn ʋ malɩka, ʋ pa ka jon ʋ tʋ̀tʋ̀nà tə. Cɩ́gá, ba ken ba waa ba Yɩɩ tə nə. Ba vɩga nii tə, à mʋ̀ pɩ̀ʋ́ nə pɩn, ba ga sɛ̀ sə ba kwɩ̀n ba mɩɩ nə, ba doni, ba nə wá tʋn ba pa yɩɩ don nə, kʋ nə tà ba Yɩɩ tə, ba pa kʋ dun. 29 Kʋ mʋ̀ yɩrɩ, nəŋə nii tə, à nə pɩn sɩ́ʋ́n nə: “Ləzwənə tə mama, ʋ nə yɩ lʋʋ nii yiri tə mama, nə à yə̀ə́ dwíí yiri tə mama, nə à yə̀ə́ nəndəli yiri tə mama lìù, ʋ nə wà swɩ̀n, ʋ zɩgɩ Swadərakə, də Meswakə, də Abədə-Nego Yɩɩ tə nə, ba wá ca kʋ tíú duən wa, ba ga buburi ʋ dìə̀ duən yuu, ba pa ka jì diboo. Cɩ́gá, Yɩɩ don tə̀lə́, ʋ nə wàá lìù ʋ joŋə, ndə ʋ nə.”» 30 Kʋ kwa nə, pɩ̀ʋ́ tə ken Swadərakə, də Meswakə, də Abədə-Nego dun bwálá nə, Babɩlɔnə nagwanaa tə wa.
Pɩ̀ʋ́ Nebukadənezarə bələ nii pandwɩa
31 Pɩ̀ʋ́ Nebukadənezarə pɩn ba swɩ̀n lalʋʋ yiri mama, də dwíə́ yiri mama, də nandələ sʋ̀ràn yiri mama lɩ̀à con, ba nə wulə tɩa yuu wa, ʋ wʋ́:
«Yɩɩ wá pa aba sìə́ nəfarʋ!
32 À nɩ də kʋ ziən, sə à bɩrɩ dɩ̀àn mɩmɩnan tə, də yogwaran tə, Baan Yɩɩ nə tʋn ʋ pa nə.
33 Ʋ dɩ̀àn mɩmɩnan tə yɩ yofaran!
Ʋ yogwaran tə jə dɩ̀àn!
Ʋ də́ pàrɩ̀ máŋá mama wuuu,
yá ʋ pàrɩ̀ dɩ̀àn tə wulə
máŋá də máŋá mama wuuu!