4
1 À mʋ̀ Nebukadənezarə yà wulə à padiə wa sənbwen də pupwən. 2 Yá tɩtɩn don nə, à pə̀ń pandwɩa, tə nə pɩn fən zʋ nə. Yìə̀n twi à pubʋŋa wa, à ga na nɩʋn, tə nə wʋwalɩ nə zənzən, à sapaa wa, tə ga pa fən gən nə. 3 À pɩn nii, sə Babɩlɔnə wʋbʋnyɩna tə mama bà à yáá con, ba gwìń pandwɩa tə də̀ń, ba bɩrɩ nə. 4 Yá vʋra tə, də lɩ̀à tə nə ywàŋá lanworu, ba ma lwarɩ jwɩan yoo, də Kaləde tɩ̀án tə, də lɩ̀à tə nə tʋŋa cɩrɩ yìə̀n dàń twi à con. À man à pandwɩa tə à bɩrɩ ba, yá ba wà wànɩ́ ba gwìń tə də̀ń, ba bɩrɩ nə. 5 Kʋ kwa nə, Danɩyɛlə twi à yáá con. Ʋ yɩrɩ don nə yɩ Bɛlətəswasarə, kʋ nə bɩrɩ də, à yɩɩ tə yɩrɩa tə nə seri wa. Yɩa tə nə yɩ parɩ siŋu tə yà wulə də wá. À man pandwɩa tə, à bɩrɩ wá, à wʋ́: 6 «Bɛlətəswasarə, vʋra yáá tíú, à yə̀ə́ də, yɩa tə nə yɩ parɩ siŋu tə wulə də mʋ́, yá yosəgu mama wà n yáá nə səgə. Gwìń nɩʋn tə də̀ń à nə nɩ à pandwɩa tə wa, n bɩrɩ nə. 7 Nə̀ń yìə̀n tə à nə nɩ à pubʋŋa nɩʋn wa, à sapaa wa:À nɩ tɩ̀ʋ́ nəfarʋ kʋ zɩga tɩa tə titəŋi wa.
8 Tɩ̀ʋ́ təntə bori, kʋ jì nəfarʋ, kʋ ga jə dɩ̀àn,
kʋ yuu yà dɩ̀gà kʋ yí lanworu wa,
yá lìù nə wulə tɩa yuu bwálɩ́ mama nə, ʋ na kʋ.
9 Kʋ vʋran yà ziən,
kʋ ga jə lənə kapʋpʋ.
Kʋ yà pɩn wodiu lɩ̀à mama nə.
Ganaŋa yà pə̀ní kʋ ywárɩ́ wa,
lanworu zuŋi ga kəni tə pwalan kʋ nɛɛ tə wa.
Wonəŋu mama yà na wodiu kʋ yɩra.
10 Nə̀ń yìə̀n tə à nə nɩ à pubʋŋa nɩʋn wa, à sapaa wa, kʋ kwa nə: À nɩ Yɩɩ tʋntʋnʋ, ʋ nə ywàŋá yìə̀n yuu, ʋ nan yɩɩ nə, ʋ cú. 11 Tʋntʋnʋ tə baa də dɩ̀àn, ʋ wʋ́:
“Á goŋə tɩ̀ʋ́ tə á dɩ, á ga goŋə kʋ nɛɛ tə.
Á pʋ̀rá kʋ vʋran tə, á ga laga kʋ lənə tə duən wa!
Vàná tə dərə tə nan kʋ də̀ń,
zuŋi tə naŋa tə yá kʋ nɛɛ tə nə!
12 Yá á yaga kʋ dəkuu tə, də kʋ ŋʋnan tə mʋ̀ tɩa tə wa,
á ga vwa kʋ də lugu də cɩnɩan banzala,
á yá kárɩ́ gaʋ tə titəŋi wa.
Á yaga á pa lanworu nyʋ̀nʋ̀ vwa kʋ,
sə gaʋ nə ya kʋ nii wodiu, ndə vàná nə.
13 Kʋ ləzwənə bɩcan tə wá lwàń,
yá ba wá pa kʋ vànɩ́ bɩcan.
Yá kʋ nətʋ tə wá dán, máŋá dəkurən barpɛ.”
14 Yoo təntə yɩ Yɩɩ tʋntʋna tə nə ywàŋá yìə̀n yuu, nə pɩn nii kʋ yuu wa, sə ləzoni lwarɩ də Baan Yɩɩ yɩ ləzoni pàrɩ̀ Yuu-Tiu, yá ʋ pɩn pàrɩ̀ lìù tə nə, ʋ nə swə, ʋ ga wàá ləzoni wa talɩkwa lìù ʋ zɩ̀n, ʋ kəni dun bwálɩ́ nə.
15 Mə à mʋ̀ pɩ̀ʋ́ Nebukadənezarə pandwɩa tə yɩn nətʋ. N mʋ̀ Bɛlətəswasarə, gwìń pandwɩa təntə də̀ń, n bɩrɩ nə. Cɩ́gá, à payuu tə wa wʋbʋnyɩna tə mama wà wànɩ́ ba gwìń tə də̀ń, ba bɩrɩ nə. Yá à yə̀ə́ də n mʋ̀ wàá kʋ n tʋŋa, yɩa tə nə yɩ parɩ siŋu tə nə wulə də mʋ́ yɩrɩ.»
Danɩyɛlə gwìń Nebukadənezarə pandwɩa tə də̀ń
16 Yoo tə pɩn fən gən Danɩyɛlə, ʋ yɩrɩ don nə yɩ Bɛlətəswasarə, ʋ jɩ̀àn gwàrɩ̀ máŋá mancɩn wa, ʋ pubʋŋa ga gugurə. Yá pɩ̀ʋ́ tə swɩ̀n ʋ con, ʋ wʋ́: «Bɛlətəswasarə, dàn ká pa pandwɩa tə, də tə də̀ń gwiun fən ja mʋ́!» Bɛlətəswasarə le, ʋ wʋ́: «À nyɩna pɩ̀ʋ́, kʋ yà nə wàá, sə pandwɩa tə ya n dʋŋa nyiən, sə tə də̀ń gwiun tə ga ya n jarɩduən nyiən! 17 N nɩ tɩ̀ʋ́ nəfarʋ, kʋ nə jə dɩ̀àn, kʋ yuu nə dɩ̀gà kʋ yí lanworu wa, yá lìù nə wulə tɩa yuu bwálɩ́ mama nə, ʋ na kʋ! 18 Tɩ̀ʋ́ təntə vʋran tə yà ziən, kʋ ga jə lənə kapʋpʋ, yá kʋ pɩn wodiu lɩ̀à mama nə! Ganaŋa yà pə̀ní kʋ ywárɩ́ wa, lanworu zuŋi ga kəni tə pwalan kʋ nɛɛ wa! 19 Tɩ̀ʋ́ təntə yɩ n mʋ̀ à nyɩna pɩ̀ʋ́ nə jìgə̀ nəfarʋ, n ga jə dɩ̀àn. N dun tə dɩ̀gà tə yí lanworu wa, yá n pàrɩ̀ dɩ̀àn tə larɩ kʋ sú tɩa yuu, bwálɩ́ mama. 20 Kʋ kwa nə, à nyɩna pɩ̀ʋ́ nɩ Yɩɩ tʋntʋnʋ, ʋ nə ywàŋá yìə̀n yuu, ʋ nan yɩɩ nə, ʋ cú, ʋ ga swɩ̀n, ʋ wʋ́: “Á goŋə tɩ̀ʋ́ tə á dɩ, á ga cʋ̀gʋ̀ kʋ! Yá á yaga kʋ dəkuu tə, də kʋ ŋʋnan tə mʋ̀ tɩa tə wa, á ga vwa kʋ də lugu də cɩnɩan banzala, á yá kárɩ́ gaʋ tə titəŋi wa! Á yaga á pa lanworu nyʋ̀nʋ̀ vwa kʋ, sə gaʋ nə ya kʋ nii wodiu, ndə vàná nə, yá kʋ nətʋ tə wá dán, máŋá dəkurən barpɛ!”
21 À nyɩna pɩ̀ʋ́, nə̀ń n pandwɩa tə də̀ń gwiun! Nə̀ń yoo tə Baan Yɩɩ nə pɩn nii, sə kʋ yí mʋ́: 22 Ba wá dɩŋa mʋ́ ba lɩ ləzoni wa, n də ganaŋa nə wá ya bwálɩ́ nədʋ, yá gaʋ nə ba wá pa mʋ́ n də́, ndə nɩan nə, lanworu nyʋ̀nʋ̀ ga vwa n yɩra. Yá kʋ ya nətʋ kʋ pa mʋ́, máŋá dəkurən barpɛ, kʋ ja va kʋ yí máŋá tə, n nə wá lwarɩ də Baan Yɩɩ nə yɩ ləzoni pàrɩ̀ Yuu-Tiu, ʋ ga pɩn pàrɩ̀ lìù tə nə, ʋ nə swə. 23 Nii tə nə pɩn, sə ba yá tɩ̀ʋ́ tə dəkuu tə də kʋ ŋʋnan tə bɩrɩ də, n wá pìí n na n pàrɩ̀ tə, máŋá tə wa n nə wá lwarɩ də, Yɩɩ tə nə wulə lanworu wa nə yɩ Yuu-Tiu. 24 Kʋ mʋ̀ yɩrɩ, à nyɩna pɩ̀ʋ́, à lòrì mʋ́ sə n cʋgʋ à kwìə̀: Twá cɩ́gá cwəŋə nə, yá n cʋna tə wá zwɛ̀, n ga dəri lalaŋa yinəgə, yá n yolwana tə wá zwɛ̀. Kʋ nətʋ wá pa n ya sìə́ wa, kʋ dán.»
Pandwɩa tə jìgə̀, ndə Danɩyɛlə nə swɩ̀n nətʋ
25 Yìə̀n tə mama Danɩyɛlə nə swɩ̀n pɩ̀ʋ́ Nebukadənezarə con nii súə́. 26 Cànɩ̀ fugə də bələ nii nə, pɩ̀ʋ́ tə yà wulə ʋ jírí padiə tə dəyuu gárɩ́ tə yuu wa, Babɩlɔnə nə. 27 Pɩ̀ʋ́ tə swɩ̀n, ʋ wʋ́: «Kʋ tə yɩ Babɩlɔnə patɩʋ nəfarʋ tə, à nə lwə̀. À dɩ̀àn nəfarʋ tə nə à ma lwà kʋ, sə kʋ bɩrɩ à pàrɩ̀ tə dun nə dáá tə mɛ nətʋ.» 28 Pɩ̀ʋ́ tə yà tə wà swɩ̀n, ʋ zwɛ̀, də kori nan lanworu wa, kʋ swɩ̀n, kʋ wʋ́: «Kʋ yɩ n mʋ̀ pɩ̀ʋ́ Nebukadənezarə con nə, kori kʋ tə swɩ̀n! N pàrɩ̀ tə gwɩ̀n kʋ jon n con! 29 Ba wá dɩŋa mʋ́ ba lɩ ləzoni wa, yá n də ganaŋa nə wá ya bwálɩ́ nədʋ. Gaʋ nə ba wá pa mʋ́ n də́, ndə nɩan nə! Yá n wá ya nətʋ kʋ pa mʋ́, máŋá dəkurən barpɛ, kʋ ja va kʋ yí máŋá tə, n nə wá lwarɩ də, Baan Yɩɩ nə yɩ ləzoni pàrɩ̀ Yuu-Tiu, yá ʋ mʋ̀ nə pɩn pàrɩ̀ lìù tə nə, ʋ nə swə.» 30 Kʋ máŋá təntə tətə wa, də kʋ sʋgʋ tə nii súə́ Nebukadənezarə yɩra. Ba dɩŋɩ wá ba lɩ ləzoni wa, ʋ va ʋ də́ gaʋ, ndə nɩan nə, lanworu nyʋ̀nʋ̀ ga vwa ʋ yɩra. Ʋ yukʋran jìgə̀ nədaran, ndə zənpuu kʋran nə, ʋ jɩfʋran ga jì ndə zuŋi nafʋran nə.
Nebukadənezarə pìí ʋ na yazurə
31 Tə mʋ̀ yìə̀n təntə kwa nə, Nebukadənezarə swɩ̀n, ʋ wʋ́: «Kʋ máŋá təntə nə kɛ̀ń kwa nə, à mʋ̀ Nebukadənezarə zɩ̀n à yáá yɩɩ nə, yá à pubʋŋa pìí ka bà. À ken Baan Yɩɩ lɛ̀ɛ̀. À siən Yɩɩ tə nə wulə máŋá mama wuuu, à ga bʋ ʋ nə. Ʋ pàrɩ̀ dɩ̀àn tə wulə máŋá mama wuuu, ʋ ga də́ pàrɩ̀ máŋá də máŋá mama wuuu, kʋ ba zwɛ̀. 32 Tɩa yuu ləzoni tə mama tà won mama, ʋ yáá con. Ʋ ja wiən tə nə wulə lanworu wa, də tɩa yuu ləzoni, ʋ ma tʋŋa kʋ tə ʋ nə swə. Yá lìù tə̀lə́ ʋ cɩ̀ ʋ tʋ̀tʋ̀nán tə yáá nə, nə à yə̀ə́ ʋ cɩ́cágá ʋ nii nə, ʋ wʋ́: “Bɛ̀ɛ̀ nə n fwa nətʋ?” 33 Kʋ máŋá tə wa, à pubʋŋa pìí ka bà. Yá à pìí à na dun də bʋra, tə nə zɩ̀n à pàrɩ̀ tə yuu yɩɩ nə. À kwenə tə, də à payuu tə dun tɩ̀án tə pìí ba twarɩ nə. Ba pìí ba tún nə à pàrɩ̀ tə wa, yá à dun dàń kwɛn tə súrí. 34 Sɩ́ʋ́n nə, à mʋ̀ Nebukadənezarə bwɩ, də à səni, də à pɩn dun lanworu pɩ̀ʋ́ tə nə. Ʋ tʋ̀tʋ̀nán tə mama yɩ cɩ́gá, tə ga tì cɩ́gá cwəŋə. Ʋ mʋ̀ nə wàá ʋ pɩn lɩ̀à tə nə fwa fwìə́ keni ba yuu tɩa.»