Pɩ̀ʋ́ Bɛləswasarə pɩn ba də́ cànà
5
1 Dɩɩn don nə, pɩ̀ʋ́ Bɛləswasarə tanɩ cànà diŋə nəfarʋ, ʋ pa ʋ payuu tə dun tɩ̀án mʋ̀rʋ̀ nə, yá ʋ dàń nyʋan divɛn, lɩ̀à mʋ̀rʋ̀ təntə yáá con. 2 Bɛləswasarə nə fùń divɛn tə kwa nə, ʋ pɩn nii sə ba tì sɩ́án də wárʋ́ wùrú zwɩɩn tə, ʋ nyɩna Nebukadənezarə nə pɛ̀ Zwerizalɛmə Yɩɩ dìə̀ tə wa, ba ja bà, sə pɩ̀ʋ́ tə, də ʋ payuu tə dun tɩ̀án, də ʋ kana, də ʋ kabii ma nyʋn divɛn tə. 3 Ba dàń tì sɩ́án wùrú zwɩɩn tə, ba yà nə pɛ̀ Yɩɩ dìə̀ tə wa, Zwerizalɛmə nə, ba ja bà, yá pɩ̀ʋ́ tə, də ʋ payuu tə dun tɩ̀án tə, də ʋ kana, də ʋ kabii dàń jɩn tə ba ma nyʋn divɛn tə. 4 Ba nyʋan divɛn tə, ba ga bʋ yɩa tə nə, ba nə fwa də sɩ́án, də wárʋ́, də cɩnɩan, də lugu, də dàʋ̀ də kapan.5 Kʋ máŋá təntə tətə wa, ləzwənə jɩɩn nan, kʋ pʋ́pʋ́nɩ́ canzɩlʋ tə yáá con, padiə tə bírə́ tə yɩra, ba nə ja pɩra ba ma pɩ̀rɩ̀. Pɩ̀ʋ́ tə nɩ jɩɩn tə nə pʋ́pʋ́nɩ́. 6 Pɩ̀ʋ́ tə yáá dàń lwàń, ʋ pubʋŋɩ ga pa fən gən wá. Ʋ bɩcan zàn zənzən, ʋ nadwana ga mà duən nə. 7 Pɩ̀ʋ́ tə baa də dɩ̀àn, sə ba pa lɩ̀à tə nə ywàŋá lanworu, ba ma lwarɩ jwɩan yoo, də Kaləde tɩ̀án tə, də vʋra tə bà. Yá ʋ swɩ̀n Babɩlɔnə wʋbʋnyɩna tə con, ʋ wʋ́: «Lìù tə ʋ nə kàrɩ̀ pʋ́pʋ́ná tə tə, ʋ ga gwìń tə də̀ń, ʋ bɩrɩ nə, à wá pa ba ja ganmʋlɩ ba ma zʋ kʋ tíú, ba kə sɩ́án zàŋʋ́ ʋ bɩan nə, yá ʋ wá ya batwa nii yáá tíú payuu tə wa.» 8 Pɩ̀ʋ́ tə wʋbʋnyɩna tə mama zʋa, yá ba wà wànɩ́ ba kàrɩ̀ pʋ́pʋ́ná tə, ba ga gwìń tə də̀ń, ba bɩrɩ pɩ̀ʋ́ tə nə. 9 Kʋ nətʋ pɩn fən kwɛn tə gən pɩ̀ʋ́ Bɛləswasarə. Ʋ yáá lwàń, ʋ payuu tə dun tɩ̀án tə pwìí ga cʋ̀gʋ̀.
Danɩyɛlə gwìń pʋ́pʋ́ná tə yosəgu tə də̀ń
10 Pɩ̀ʋ́ tə nuu nì pɩ̀ʋ́ tə, də ʋ dun tɩ̀án tə sʋ̀ràn tə, yá ʋ zʋa cànà diŋə dìə̀ tə wa, ʋ swɩ̀n, ʋ wʋ́: «À nyɩna pɩ̀ʋ́, Yɩɩ wá pa mʋ́ mɩdarɩ! Dàn ká pa n pubʋŋɩ pa fən gən mʋ́, kʋ ga pa n yáá lwàń! 11 Bɛɛ don wulə n payuu tə wa, yɩa tə nə yɩ parɩ siŋu tə nə wulə də wá. Yá n nyɩna máŋá wa, ba nɩ pubʋŋa ka nə pɩn poni, də yənu, də wʋbʋŋa ka nə yɩ ndə yɩa tə nə yɩ parɩ wʋbʋŋa nə, bɛɛ təntə con. Kʋ mʋ̀ nə pɩn, n nyɩna pɩ̀ʋ́ Nebukadənezarə tún wá, sə ʋ ya vʋra tə, də lɩ̀à tə nə ywàŋá lanworu, ba ma lwarɩ jwɩan yoo, də Kaləde tɩ̀án tə, də lɩ̀à tə nə tʋŋa cɩrɩ yìə̀n yuu tíú. N nyɩna pɩ̀ʋ́ nə tʋn kʋ yoo təntə. 12 Cɩ́gá, ba nɩ də ʋ mʋ̀ Danɩyɛlə təntə, pɩ̀ʋ́ nə dɩga ʋ yɩrɩ Bɛlətəswasarə, jə siŋu, kʋ nə yɩ kʋ cɩcɩ, də yənu, də pubʋŋa. Ʋ wàá pandwɩa də̀ń ʋ gwìń, ʋ wàá yosəgu də̀ń ʋ lwarɩ, ʋ ga wàá yìə̀n tə nə cà yáá ʋ lɩ. N dàń pa ba bon Danɩyɛlə, yá ʋ wá gwìń pʋ́pʋ́ná tə də̀ń, ʋ bɩrɩ mʋ́.»
13 Ba dàń jɩn Danɩyɛlə ba bà pɩ̀ʋ́ tə yáá con, yá pɩ̀ʋ́ tə bwe wá, ʋ wʋ́: «N mʋ̀ cɩ́gá nə yɩ Danɩyɛlə, Zwida lʋʋ lɩ̀à tə wa lìù don, à nyɩna pɩ̀ʋ́ nə ja nan Zwida lʋʋ nii tə? 14 À nì də ba swɩ̀n n yoo, ba wʋ́ yɩa tə siŋu wulə də mʋ́, n ga jə pubʋŋa ka nə pɩn poni, də yənu, də wʋbʋŋa ka nə yɩ ka cɩcɩ. 15 Ba ja wʋbʋnyɩna tə, də lɩ̀à tə nə ywàŋá lanworu, ba ma lwarɩ jwɩan yoo, ba bà à yáá con sɩ́ʋ́n sɩ́ʋ́n, sə ba kàrɩ̀ pʋ́pʋ́ná tə tə, ba ga gwìń tə də̀ń, ba bɩrɩ nə, yá ba wà wànɩ́ ba gwìń tə sʋ̀ràn tə də̀ń. 16 À nì də n wàá yìə̀n də̀ń n gwìń, n ga wàá yìə̀n tə nə cà yáá n lɩ. Sɩ́ʋ́n nə, n nə wànɩ́ n kàrɩ̀ pʋ́pʋ́ná tə tə, n ga gwìń tə də̀ń, n bɩrɩ nə, à wá pa ba ja ganmʋlɩ ba ma zʋ mʋ́, ba kə sɩ́án zàŋʋ́ n bɩan nə, n ga wá ya batwa nii yáá tíú, payuu tə wa.»
17 Danɩyɛlə ma le pɩ̀ʋ́ tə, ʋ wʋ́: «Ja n zìlə́ wiən tə, nə à yə̀ə́ pa tə lìù don nə. Yá à mʋ̀ tə wá kàrɩ̀ pʋ́pʋ́ná tə, à ga gwìń tə də̀ń, à bɩrɩ mʋ́. 18 À nyɩna pɩ̀ʋ́, Baan Yɩɩ yà pɩn pàrɩ̀ nəfarʋ, də dɩ̀àn, də zìlə́, də dun n nyɩna Nebukadənezarə nə. 19 Dɩ̀àn təntə yɩrɩ, Yɩɩ nə pɩn wá, lalʋʋ yiri mama lɩ̀à, də dwíə́ yiri mama lɩ̀à, də nandələ sʋ̀ràn yiri mama lɩ̀à yà dəri ʋ fən, ba ga vɩvaga ʋ yáá con. Pɩ̀ʋ́ tə yà pɩn ba gwɩ lìù tə ʋ nə swə, ʋ ga yá lìù tə ʋ nə swə, ʋ pɩn kʋ tíú mɩɩ yanɩ lʋʋ wa. Ʋ yà zɩ̀n lìù tə ʋ nə swə, ʋ ga muŋə lìù tə ʋ nə swə. 20 Yá máŋá tə ʋ bɩcan nə súə́ də fwìə́, ʋ pubʋŋa ga yigu wá ka kə yɩrʋ wa, Yɩɩ yigu wá ʋ lɩ ʋ padaʋ tə yuu, ʋ dɩ, ʋ ga jon ʋ dun tə, ʋ ga yá wá. 21 Ba dɩŋɩ wá ba lɩ ləzoni wa, ʋ bɩcan jìgə̀ ndə vàná bɩcan nə, ʋ ga va ʋ wulə də gaʋ bɩnɛ. Ba yà pɩn wá gaʋ ʋ də́, ndə nɩan nə, lanworu nyʋ̀nʋ̀ ga vwə ʋ yɩra, kʋ va kʋ yí máŋá tə, ʋ nə lwarɩ də Baan Yɩɩ nə yɩ ləzoni pàrɩ̀ Yuu-Tiu, yá ʋ túŋə́ lìù tə ʋ nə swə, padaʋ yuu wa. 22 N mʋ̀, ʋ bìú Bɛləswasarə yə̀ə́ yìə̀n təntə mama, yá n wà n tɩ̀àn mun. 23 N zàn n zɩgɩ Yuu-Tiu tə nə, ʋ nə wulə lanworu wa, n pa ba ja ʋ dìə̀ wùrú zwɩɩn tə, ba bà n yáá con, yá n də n payuu tə dun tɩ̀án, də n kana, də n kabii ja tə á nyʋn divɛn. N bʋ̀à yɩa tə nə, ba nə fwa də wárʋ́, də sɩ́án, də cɩnɩan, də lugu, də dàʋ̀, də kapan. Tə yɩ yɩa, tə yɩ́á nə ba na, tə zɩ̀án ba nə̀ń, tə ga ba pubʋŋa jə. N wà dun pɩn Yɩɩ tə nə, n mɩɩ tə də n yìə̀n tə mama nə wulə ʋ jɩɩn wa. 24 Kʋ mʋ̀ nə pɩn, Yɩɩ ma pa jɩɩn təntə bà, kʋ bɩ̀rɩ̀ pʋ́pʋ́ná təntə. 25 Nə̀ń sʋ̀ràn tə, pʋ́pʋ́ná tə nə swɩ̀n: Mene, Mene, Tekɛlə, Parəsin. 26 Yá n dàń nə̀ń sʋ̀ràn təntə də̀ń: “Mene” də̀ń nə yɩ, Yɩɩ jələ n pàrɩ̀ tə bɩna nii, yá ʋ pɩn nii, sə kʋ zwɛ̀. 27 “Tekɛlə” də̀ń nə yɩ, ba kəri mʋ́ də səkəri, yá ba nɩ də n ba du. 28 “Parəsin” də̀ń nə yɩ, ba wá pwɛ̀ n payuu tə, ba pa Medi də Pɛrəsə tɩ̀án nə.»