6
1 Dariyusə, ʋ nə yɩ Medi lʋʋ lìù jìgə̀ pɩ̀ʋ́, də ʋ jə bɩna sapwɩtwa də bələ.Danɩyɛlə dʋŋa zɩga ʋ nə
2 Dariyusə nɩ də kʋ ziən, sə ʋ tún lɩ̀à bíí də sapʋa, ʋ yuu yɩrɩ, payuu tə mama wa. 3 Ʋ tún lɩ̀à batwa ba yuu wa, sə ba ya yun tɩ̀án. Danɩyɛlə yà yɩ lɩ̀à batwa təntə wa lìù don, lɩ̀à tə pɩ̀ʋ́ nə tún ʋ yuu yɩrɩ nə mɛ sə ba tún ba nii ba con, sə lɩ̀à dàn ká gɩgɩrɩ pɩ̀ʋ́ tə. 4 Danɩyɛlə tətə yà dwə yun tɩ̀án tə duən tə, də lɩ̀à tə pɩ̀ʋ́ nə tún ʋ yuu yɩrɩ, siŋu yà nə wulə də wá, kʋ nə yɩ kʋ cɩcɩ yɩrɩ. Yá pɩ̀ʋ́ tə dàń yà bʋŋa sə ʋ tún wá ʋ yuu yɩrɩ, payuu tə mama yuu wa. 5 Yun tɩ̀án tə, də lɩ̀à tə pɩ̀ʋ́ nə tún ʋ yuu yɩrɩ dàń yà pɩ̀à payuu tə yɩra yoo, sə ba nyɩ́n kʋ yuu wa, ba ma swɩ̀n ba zɩgɩ Danɩyɛlə nə. Yá ba wà yoo mama nɩ, ba nə wá nyɩn kʋ yuu wa, ba ma swɩ̀n ba zɩgɩ ʋ nə. Ba wà yolwan mama nɩ ʋ yuu wa, ʋ nə yɩ pùə́ nədʋ tíú, ʋ tutʋŋɩ wa ga ba yolwan mama jə yɩrɩ. 6 Bara təntə dàń swɩ̀n, ba wʋ́: «Nə bá na yoo mama, nə nyɩ́n kʋ yuu wa, nə ma swɩ̀n nə zɩgɩ Danɩyɛlə nə, də kʋ nə tà nə wá twárɩ́ kʋ yoo tə, ʋ Yɩɩ tə nii yìə̀n tə wa.»
7 Yun tɩ̀án təntə, də lɩ̀à tə pɩ̀ʋ́ nə tún ʋ yuu yɩrɩ dàń vəli ba yí pɩ̀ʋ́ tə, ba swɩ̀n ʋ con, ba wʋ́: «Pɩ̀ʋ́ Dariyusə, Yɩɩ wá pa mʋ́ mɩdarɩ! 8 Payuu tə yun tɩ̀án tə mama, də lɩ̀à tə mama nə ywàŋá payuu tə jɩjə yuu nə, də lɩ̀à tə mama pɩ̀ʋ́ nə tún ʋ yuu yɩrɩ, də kwenə tə mama, də nagwanaa yáá tɩ̀án tə mama nii yɩn nədʋ, sə pɩ̀ʋ́ tə pa nii yoo kʋ tə yuu wa, ʋ ga pa ba bòrì kʋ ba bɩrɩ, «də dɩan fitwa tə wa, tə nə bɩ̀àn, lìù tə mama ʋ nə pɩn dun yɩɩ don, nə à yə̀ə́ ləzwənə nə, də kʋ nə tà n mʋ̀ nə nyɩna pɩ̀ʋ́, sə ba dɩ kʋ tíú gərən bʋʋ wa. 9 Sɩ́ʋ́n nə, nə nyɩna pɩ̀ʋ́, n dàń bɩrɩ də n dùə̀ súú kʋ yoo tə yuu wa, n ga tún n jɩɩn nii sagɩ tə yuu wa, sə kʋ dàn ká kwɩ̀án, ndə Medi də Pɛrəsə tɩ̀án nii yoo nə wàrɩ̀ kʋ kwànɩ́ nətʋ.» 10 Yá pɩ̀ʋ́ Dariyusə dàń tún ʋ jɩɩn nii sagɩ tə yuu wa, kʋ nə dwì súú tə.
Ba dɩga Danɩyɛlə gərən bʋʋ wa
11 Máŋá tə Danɩyɛlə nə lwarɩ də, pɩ̀ʋ́ tə tún ʋ jɩɩn nii sagɩ tə yuu wa, ʋ dɩ̀gà ʋ dəyuu dìə̀ wa, ka təkuri yà nə súrí tə te Zwerizalɛmə con. Ʋ yàá tʋ ʋ nadwana yuu, ʋ jʋn ʋ Yɩɩ tə, ʋ ga bʋ ʋ nə, nɛɛ batwa dɩɩn mama, ndə ʋ yà nə tʋŋa kʋ nətʋ fuən nə. 12 Ʋ dʋŋa tə zʋa ba yí wá, də ʋ wulə ʋ jʋnɩ ʋ Yɩɩ tə, ʋ lòrì wá pwəpwə. 13 Kʋ kwa nə, ba vəli ba swɩ̀n pɩ̀ʋ́ tə con, súú tə yuu wa, ʋ nə dùə̀, ba wʋ́: «Nə nyɩna pɩ̀ʋ́, n wà n jɩɩn tún nii sagɩ yuu wa, n ma dù súú də dɩan fɩtwa tə wa, lìù tə mama ʋ nə pɩn dun yɩɩ don nə, nə à yə̀ə́ ləzwənə nə, də kʋ nə tà n mʋ̀ nə nyɩna pɩ̀ʋ́, ba wá dɩ kʋ tíú gərən bʋʋ wa naaa?» Pɩ̀ʋ́ tə le, ʋ wʋ́: «Awoo, kʋ yoo tə yɩ cɩ́gá, ndə Medi də Pɛrəsə tɩ̀án nii yoo nə wàrɩ̀ kʋ kwànɩ́ nətʋ.» 14 Ba kʋ́ʋ̀ swɩ̀n pɩ̀ʋ́ tə con, ba wʋ́: «Danɩyɛlə, Zwida lʋʋ lɩ̀à tə wa lìù don, ba nə ja nan Zwida lʋʋ nii ba bà, wà n mʋ̀ pɩ̀ʋ́, nə à yə̀ə́ nii sagɩ tə n nə tún n jɩɩn kʋ yuu wa, n ma dù súú jələ mancɩn tətə. Ʋ tə jʋnɩ ʋ Yɩɩ tə, nɛɛ batwa dɩɩn mama.»
15 Máŋá tə pɩ̀ʋ́ tə nə nì sʋ̀ràn təntə, ʋ pùə́ cʋ̀gʋ̀ zənzən. Yá ʋ dàń yà pɩ̀à cwəŋə, sə ʋ ma jon Danɩyɛlə, yɩɩ kori kʋ zʋ. 16 Yá bara təntə kʋ́ʋ̀ pìí ba va pɩ̀ʋ́ tə con, ba swɩ̀n, ba wʋ́: «Nə nyɩna pɩ̀ʋ́, n yə̀ə́ də Medi də Pɛrəsə tɩ̀án nii yìə̀n tə bɩrɩ də, pɩ̀ʋ́ nə dùə̀ súú, nə à yə̀ə́ ʋ nə pɩn nii yoo yuu wa, kʋ kʋ́ʋ̀ wàrɩ̀ kʋ kwànɩ́.» 17 Pɩ̀ʋ́ tə dàń pɩn nii, sə ba ja Danɩyɛlə ba va ba dɩ gərən bʋʋ tə wa. Pɩ̀ʋ́ tə swɩ̀n Danɩyɛlə con, ʋ wʋ́: «N tíú Yɩɩ tə, n nə tʋŋa n pɩn wá də n kajaŋa mama, wá jon mʋ́!» 18 Ba ja kapan nəfarʋ, ba ma sun gərən bʋʋ tə nii. Pɩ̀ʋ́ tə jɩn ʋ tətə jɩfɩlɩ, də ʋ dun tɩ̀án tə jɩfɩla, ʋ ma tún mɩmɩnʋ kapan tə yɩra, sə lìù mama dàn ká wànɩ́ ʋ lwàń kʋ tə nə wá yí Danɩyɛlə. 19 Kʋ kwa nə, pɩ̀ʋ́ tə vəli ʋ padiə tə wa, ʋ pə̀ń niən. Ʋ yà wàrɩ̀ ʋ dwɛ̀, yá ʋ wà pɩn ʋ kabiə mama zʋ ʋ con.
Danɩyɛlə nan gərən bʋʋ tə wa, də won mama wà wá fwa
20 Pɩ̀ʋ́ tə zàn jɩjʋ fuən fuən, ʋ va gərən bʋʋ tə nii nə, də bɩbarʋ. 21 Máŋá tə ʋ nə bwə́lə́ bʋʋ tə nii, ʋ bon Danɩyɛlə də pucʋnɩ, ʋ wʋ́: «Danɩyɛlə, n mʋ̀ lìù tə nə yɩ Yɩɩ tə nə nəŋə tʋtʋnʋ, n tíú Yɩɩ tə, n nə tʋŋa n pɩn wá də n kajaŋa mama, wànɩ́ ʋ jon mʋ́ gərən tə jɩɩn wa?» 22 Yá Danɩyɛlə swɩ̀n pɩ̀ʋ́ tə con, ʋ wʋ́: «À nyɩna pɩ̀ʋ́, Yɩɩ wá pa mʋ́ mɩdarɩ! 23 À tíú Yɩɩ tə tʋn ʋ malɩka, ʋ pa ka pú gərən tə níə́, yá tə wà nə yolwan mama fwa. Cɩ́gá, à tíú Yɩɩ nɩ də à wà yoo cʋ̀gʋ̀ ʋ yáá con, à ga wà yolwan mama tʋn, n mʋ̀ à nyɩna pɩ̀ʋ́ də yáá con.» 24 Pɩ̀ʋ́ tə súə́ də pupwən, ʋ ga pa nii, sə ba pìí ba lɩ Danɩyɛlə gərən bʋʋ tə wa. Ba lɩ Danɩyɛlə gərən bʋʋ tə wa, də won mama wà wá fwa, ʋ yà nə ken ʋ waa ʋ tíú Yɩɩ tə nə yɩrɩ. 25 Pɩ̀ʋ́ tə pɩn nii, sə ba ja lɩ̀à tə nə swɩ̀n ba zɩgɩ Danɩyɛlə nə, də ba bɩ̀á, də ba kana, ba bà ba dɩ gərən bʋʋ tə wa. Ba yà tə wà bʋʋ tə də̀ń yí, də gərən tə jəri ba tə ja, tə nyʋnyʋgʋ ba kurən mama.
26 Kʋ kwa nə, pɩ̀ʋ́ Dariyusə pʋ́pʋ́nɩ́ sagɩ, ʋ pa lalʋʋ yiri mama lɩ̀à nə, də dwíə́ yiri mama lɩ̀à nə, də nandələ sʋ̀ràn yiri mama lɩ̀à nə, ba nə wulə tɩa yuu mama wa, ʋ wʋ́:
«Yɩɩ wá pa aba sìə́ nəfarʋ!
27 À pɩn nii sə ba zìlí, ba ga dəri Danɩyɛlə Yɩɩ tə fən, à payuu tə mama wa.
Cɩ́gá, ʋ yɩ Yɩɩ tə ʋ nə nəŋə,
ʋ ga wulə máŋá mama wuuu!
Ʋ payuu tə wàrɩ̀ kʋ cʋ̀gà də mama,
ʋ pàrɩ̀ dɩ̀àn tə wulə máŋá də máŋá mama wuuu!
28 Ʋ mʋ̀ nə joŋə lìù ʋ yá,
ʋ tʋŋa dɩ̀àn mɩmɩnan də yogwaran
lanworu wa, də tɩa yuu wa.
Ʋ mʋ̀ nə jon Danɩyɛlə
gərən tə nafʋran wa.»
29 Danɩyɛlə tətə dàń yɩn dun bwálɩ́ nə, Dariyusə pàrɩ̀ tə máŋá wa, də Sirusə, ʋ nə yɩ Pɛrəsə lʋʋ lìù pàrɩ̀ tə máŋá wa.