Danɩyɛlə 7

Təntən nɩʋn tə Danɩyɛlə nə nɩ

1 Babɩlɔnə pɩ̀ʋ́ Bɛləswasarə pàrɩ̀ tə təntən bɩnɩ tə wa, Danɩyɛlə dwɛ̀ pandwɩa, ʋ ga na nɩʋn ʋ pubʋŋa wa, ʋ sapaa wa. Kʋ kwa nə, ʋ pʋ́pʋ́nɩ́ ʋ pandwɩa tə. Nə̀ń tə nə yɩn nətʋ: 2 Danɩyɛlə swɩ̀n, ʋ wʋ́: «À tɩtɩn nɩʋn tə wa, à nɩ vʋʋ, kʋ nyɩ́n kʋ zàn lanworu sapara banɩa tə wa, kʋ fuli mʋʋ nəfarʋ tə yuu wa. 3 Yá ganaŋa nəfaran banɩa nyɩ́n tə nan mʋʋ tə wa, kʋ nədʋ mama nə ba nyən də kʋ don. 4 Təntən ganaŋʋ tə yà yɩ ndə gəru nə, kʋ ga jə vànà, ndə zənpuu nə. À yà ywàŋá kʋ, yá à nɩ də ba mùrí kʋ vànà tə, ba ga zɩ̀n kʋ ba zɩgɩ kʋ nɛɛ yuu, ndə ləzwənə nə, ba ga pa kʋ ləzwənə bɩcan. 5 Kʋ kwa nə, à nɩ bələ nii ganaŋʋ, kʋ nə nyən ndə kənyenkuru nə, kʋ zɩ̀n kʋ naa don, kʋ ga jə sadɩan kurən batwa, kʋ yelə wa. Yá ba swɩ̀n kʋ con, ba wʋ́: “Zàn n də́ nàŋʋ́ zənzən!” 6 Kʋ kwa nə, à nɩ ganaŋʋ don, kʋ nə nyən ndə gwiə nə. Kʋ yà jə zuŋə vànà banɩa, kʋ dəkoru wa, kʋ ga jə yun banɩa. Yá ba pɩn kʋ nii, sə kʋ də́ dɩ̀àn. 7 Kʋ kwa nə, à nɩ banɩa nii ganaŋʋ, à tɩtɩn nɩʋn tə wa, kʋ nə jə fən zənzən, kʋ ga jə dɩ̀àn zənzən. Kʋ yà jə lugu yelə nəfaran. Kʋ yà də́ wodirən, kʋ nyʋnyʋga tə, kʋ ga nɩŋɩ tə tə kʋ nə dí kʋ ga, də kʋ nɛɛ. Kʋ yà ba nyən də ganaŋa tə duən tə mama, à nə dí yáá à na. Kʋ yà jə nyʋran fugə. 8 À ywàń nyʋran tə, yá à nɩ nyʋʋ nəmanbiə don, də ka pɛ́n ka nan tə titəŋi wa. Yá ka pɩn təntən nyʋran tə batwa gəri tə tʋ. Nyʋʋ təntə yà jə yɩ́á, ndə ləzwənə yɩ́á nə, kʋ ga jə nii, kʋ ma swɩ̀n fwìə́ sʋ̀ràn.»

Yɩɩ bʋra tə yoo

9 «À yà tə ywàŋá, yá à nɩ padaran ba nə tún, bazʋnʋ ga bà ʋ jə̀ə́ padaʋ tə don yuu. Ʋ gànʋ̀ tə yà yɩ nəpon ndə gunən nə, ʋ yukʋran ga yɩ parɩ, ndə vàná bɔɔ nə. Ʋ padaʋ tə yà yɩ ndə mənvwə nə, kʋ ga jə nɛɛ tə nə bəbəli, tə nə yɩ ndə mənvwə sɩan nə. 10 Mən yà pàlɩ̀ tə naŋa ʋ yáá con, ndə mʋnaa nə. Lɩ̀à mʋ̀rʋ̀ dəkurən mʋ̀rʋ̀ yà tʋŋa ba pɩn wá, lɩ̀à mʋ̀rʋ̀ kapʋpʋ ga zɩga ʋ yáá con. Lɩ̀à tə nə bʋ̀rɩ̀ bʋra dàń twi ba jə̀ə́, yá ba súrí saga.

11 À yà tə ywàŋá, fwìə́ sʋ̀ràn tə yɩrɩ nyʋʋ nəmanbiə tə nə swɩ̀n. Yá à nə ywàŋá máŋá tə wa, ba gʋa ganaŋʋ tə, ba cʋ̀gʋ̀ kʋ yatana tə, ba dɩlɩ mən wa, sə mən də́ kʋ. 12 Ba jon ganaŋa tə duən tə pàrɩ̀ dɩ̀àn tə, ba ga yá tə. Yá ba təni tə mɩɩ danɩ, sə tə ya lá, kʋ va kʋ yí máŋá, ba nə lɩ ba tún.

13 À tɩtɩn nɩʋn tə wa, à nɩ lìù ʋ nan bakwan tə wa ʋ bà, ʋ nyən ndə ləzwənə nə. Ʋ te ʋ yáá bazʋnʋ tə con, ʋ vələ, yá ba pɩn ʋ va ʋ yí bazʋnʋ tə yɩra. 14 Ba pɩn wá dɩ̀àn, də dun, də pàrɩ̀, yá lʋʋ níə́ tə mama lɩ̀à, də dwíə́ tə mama lɩ̀à, də nandələ sʋ̀ràn tə mama lɩ̀à dàń wá tʋn ba pa wá. Ʋ pàrɩ̀ dɩ̀àn tə wá ya lá máŋá mama, tə bá ja yígúrə́, yá ʋ pàrɩ̀ tə bá cʋ̀gʋ̀ də mama.»

Təntən nɩʋn tə Danɩyɛlə nə nɩ də̀ń gwiun

15 «À mʋ̀ Danɩyɛlə pùə́ cʋ̀gʋ̀ yìə̀n tə yɩrɩ, à nə nɩ à nɩʋn tə wa, tə ga pa fən gən nə. 16 À yí lɩ̀à tə wa lìù don yɩra, ba yà nə wulə kʋ bwálɩ́ tə wa, à bwe wá sə à jə́n, də yìə̀n təntə mama nə yɩ cɩ́gá. Ʋ man kʋ, ʋ ga gwìń kʋ də̀ń, ʋ bɩrɩ nə, ʋ wʋ́: 17 “Ganaŋa nəfaran banɩa tə yɩ pɛ̀gá banɩa, ba nə wá ya tɩa yuu wa, nə tə bɩrɩ. 18 Yá Baan Yɩɩ lɩ̀à* tə wá jon payuu tə ba tɩnɩ, máŋá də máŋá mama wuuu, kʋ nə ba zwɛ̀.” 19 Kʋ kwa nə, à yà sóní sə à yəni yoo tə, banɩa nii ganaŋʋ tə nə bɩrɩ. Kʋ mʋ̀ yà ba nyən də tə duən tə mama. Kʋ yà jə fən zənzən. Kʋ yà jə lugu yelə də cɩnɩan jɩfʋran. Kʋ yà də́ wodirən, kʋ nyʋnyʋga tə, kʋ ga nɩŋɩ tə tə kʋ nə dí kʋ ga, də kʋ nɛɛ. 20 À yà sóní sə à yəni yoo tə də, nyʋran fugə tə yà nə wulə ganaŋʋ təntə yuu wa, nə bɩrɩ, də nyʋʋ nəmanbiə tə nə pɛ́n ka nan, ka ga pa təntən nyʋran tə batwa gùrì tə tʋ tə, nə bɩrɩ. Nyʋʋ nəmanbiə təntə yà jə yɩ́á, də nii kʋ nə swɩ̀n fwìə́ sʋ̀ràn, ka ga nyən ndə ka dɩ̀àn dwə tə duən tə. 21 À yà ywàŋá nyʋʋ təntə nə tɛ kʋ̀ʋ̀ də Yɩɩ lɩ̀à tə, yá kʋ dí dɩ̀àn ba yuu wa, 22 kʋ va kʋ yí máŋá tə, bazʋnʋ tə nə twi, sə ʋ bʋ̀rɩ̀ ʋ pa Baan Yɩɩ lɩ̀à tə nə. Yá máŋá dàń yí, Yɩɩ lɩ̀à tə nə jon pàrɩ̀ tə ba tɩnɩ.

23 Ʋ kʋ́ʋ̀ swɩ̀n à con, ʋ wʋ́: “Banɩa nii ganaŋʋ tə yɩ banɩa nii payuu, kʋ nə wá ya tɩa yuu wa. Kʋ bá nyən də payun tə duən tə mama, yá kʋ wá də́ tɩa tə mama, kʋ nɩŋa ka də kʋ nɛɛ, kʋ ga nyʋnyʋgʋ ka. 24 Nyʋran fugə tə yɩ pɛ̀gá fugə, ba nə wá ya payuu təntə wa, nə tə bɩrɩ. Yá ba kwa nə, pɩ̀ʋ́ don wá bà, ʋ nə bá ya ndə təntən pɛ̀gá tə nə, yá ʋ wá pa pɛ̀gá batwa tʋ. 25 Ʋ wá swɩ̀n sʋ̀ràn ʋ zɩgɩ Baan Yɩɩ nə, ʋ ga wá fɩfɩn Baan Yɩɩ lɩ̀à tə. Ʋ wá dídə́n sə ʋ lwàń máŋá tə, də Yɩɩ nii tə, ʋ ga wá tɩnɩ Yɩɩ lɩ̀à tə, bɩna batwa də faan. 26 Kʋ kwa nə, Yɩɩ bʋra tə dàń wá bà, yá ba wá jon ʋ pàrɩ̀ dɩ̀àn tə ʋ con, ba pa tə cʋ̀gʋ̀, tə jɛ́n mɩ́ámɩ́án. 27 Yá ba dàń wá pa pàrɩ̀ tə, də pàrɩ̀ dɩ̀àn tə, də dun tə nə wulə tɩa yuu payun tə mama wa, Baan Yɩɩ lɩ̀à tə nə. Pɩ̀ʋ́ təntə pàrɩ̀ tə wá ya lá máŋá mama wuuu, yá dɩ̀àn tɩ̀án tə mama wá tʋn ba pa wá, ba ga zìlí ʋ nii.” 28 Mə yoo təntə yígúrə́ nə yəbə. Yìə̀n təntə à nə nɩ à pubʋŋa wa, pɩn fən gən à mʋ̀ Danɩyɛlə. À yáá lwàń, à ga tún yìə̀n təntə à bɩcan wa.»