Danɩyɛlə 8

Bələ nii nɩʋn tə wa, Danɩyɛlə nɩ pabɩʋ də bʋtɩlʋ

1 Bɛləswasarə pàrɩ̀ tə batwa nii bɩnɩ tə wa, à mʋ̀ Danɩyɛlə nɩ won à nɩʋn wa, yìə̀n tə kwa nə, à nə dí yáá à na. 2 Nɩʋn təntə wa, à nɩ də à yà wulə Suzə nə, kʋ nə yɩ dɩ̀àn dəkuu bwálɩ́ tɩʋ, Elamə nagwanaa tə wa. À nɩ də à wulə Ulayi nacwəŋə tə nii nə. 3 À zɩ̀n à yáá yɩɩ nə, yá à nɩ pabɩʋ də kʋ zɩga nacwəŋə tə nii nə. Kʋ yà jə nyʋran bələ, tə nədara, yá nyʋʋ tə don danɩ yà dwə kʋ don. Kʋ tə kʋ danɩ nə dwə kʋ don tə nə talɩkwa kʋ pɛ́n. 4 À nɩ pabɩʋ tə, də kʋ ja kʋ nyʋran tə kʋ mà yɩɩ yizwɩa con, də jɩzən saparʋ con, də jɩgwiə saparʋ con. Vànɩ́ don mama yà wàrɩ̀ kʋ yáá nə kʋ zɩga, yá lìù mama wàrɩ̀ won ʋ joŋə kʋ jɩɩn wa. Kʋ yà tʋŋa kʋ fɩra, kʋ ga bori wuuu.

5 À yà wulə à bʋŋa yìə̀n təntə yuu wa, də nə̀ń bʋtɩlʋ nə, kʋ nan yɩɩ yizwɩa con kʋ bɩ̀àn. Kʋ kɩkarɩ tɩa tə mama, yá kʋ ba ka yɩra dwen. Bʋtɩlʋ təntə yà jə nyʋʋ nədarʋ kʋ yɩ́á tə pwə́rə́ wa. 6 Kʋ twi kʋ yí pabɩʋ tə nə jə nyʋran bələ tə, à yà nə nɩ də kʋ zɩga nacwəŋə tə nii nə. Bʋtɩlʋ tə dəri kʋ va pabɩʋ tə nə, də kʋ dɩ̀àn mama. 7 À nɩ də kʋ yí pabɩʋ tə yɩra də lɩŋa, kʋ mà pabɩʋ tə. Kʋ mà pabɩʋ tə, kʋ kɛ́n kʋ nyʋran bələ tə, yá pabɩʋ tə wà wànɩ́ kʋ yáá nə kʋ zɩgɩ. Bʋtɩlʋ tə dɩga pabɩʋ tə tɩa, kʋ nɩŋa kʋ, yá lìù mama wà lá yɩn, sə ʋ jon pabɩʋ tə bʋtɩlʋ tə jɩɩn wa. 8 Bʋtɩlʋ tə bori, kʋ jì nəfarʋ. Yá máŋá tə kʋ nə nɩ dɩ̀àn zənzən, kʋ nyʋʋ nəfarʋ tə kɛ́n. Nyʋran nədaran banɩa duən dàń pɛ́n kʋ don tə bwálɩ́ nə, tə te lanworu sapara banɩa tə con. 9 Nyʋʋ nəmanbiə pɛ́n nyʋran təntə don yɩra, kʋ bori zənzən, kʋ ga te jɩgwiə saparʋ con, də yɩɩ yipɩan con, də lʋʋ nii tə con, kʋ nə ziən kʋ doni lʋʋ níə́ tə mama. 10 Kʋ dɩ̀gà kʋ yí lanworu tə waa wiən* tə, kʋ lɩ wiən təntə vàn don, də kacɩlacɛɛ, kʋ dɩ tɩa, kʋ ga nɩŋa tə. 11 Kʋ tə kɛ̀ń kʋ dɩ̀ kʋ yí lanworu wiən Pɩ̀ʋ́ tə, kʋ pa ba yá joŋi tə fwaŋʋ nə, ba nə fwa ba pɩn wá máŋá mama, kʋ ga kə durən ʋ wúlú bwálɩ́ tə wa. 12 Kʋ dí dɩ̀àn lanworu wiən tə, də máŋá mama joŋi tə yuu wa, cʋna tə yɩrɩ. Nyʋʋ tə dɩga cɩ́gá tɩa, kʋ ga wànɩ́ kʋ tʋn kʋ tə kʋ nə swə. 13 À nì də malɩka swɩ̀n. Yá malɩka don bwe ka tə nə swɩ̀n tə, ka wʋ́: «Nɩʋn tə máŋá mama joŋi tə yuu wa, də cʋna tə nə cʋ̀gà mɩ́ámɩ́án yuu wa, də Yɩɩ wúlú bwálɩ́ tə yuu wa, də lanworu wiən tə, kʋ nə dí dɩ̀àn tə yuu wa, kʋ ga nɩŋa tə, wá dán kʋ mɛ nətə?» 14 Yá ʋ swɩ̀n à con, ʋ wʋ́: «Kʋ wá dán kʋ yí didəni də jɩjʋ 2 300. Kʋ kwa nə, Yɩɩ wúlú bwálɩ́ tə wá pìí kʋ ya kʋ bwálɩ́ nə.»

Danɩyɛlə bələ nii nɩʋn tə də̀ń gwiun

15 À mʋ̀ Danɩyɛlə nə nɩ nɩʋn təntə, à yà twarɩ sə à lwarɩ kʋ də̀ń, də nə̀ń lìù nə, ʋ nə nyən ndə babɩʋ nə, ʋ twi ʋ zɩga à yáá con. 16 Yá à dàń nì ləzwənə kori, kʋ nan Ulayi nacwəŋə tə con, kʋ bòrì, kʋ wʋ́: «Gabəriyɛlə, gwìń nɩʋn tə də̀ń, n bɩrɩ bɛɛ wà tə nə.» 17 Gabəriyɛlə dàń twi, ʋ yí à yɩra, bwálɩ́ tə wa, à yà nə zɩga. Máŋá tə ʋ nə yí à yɩra, fən zʋa nə, à ga tʋ, à pú à yáá tɩa. Ʋ swɩ̀n à con, ʋ wʋ́: «N mʋ̀ ləzwənə bìú, lwarɩ də nɩʋn tə yɩ kʋ wá tʋn máŋá tə yígúrə́ wa.» 18 Máŋá tə ʋ nə wulə ʋ swɩ̀n à con, à yáá ga pú tɩa, à jɛ. Ʋ dwen à yɩra, ʋ ga pa à zàn à zɩga bwálɩ́ tə wa, à yà nə wulə. 19 Yá ʋ swɩ̀n à con, ʋ wʋ́: «À wá pa n lwarɩ kʋ tə nə wá bà, máŋá tə wa Yɩɩ lɩŋa tə nə wá zwɛ̀. Cɩ́gá, máŋá lɩ ka tún, tə nə wá zwɛ̀. 20 Pabɩʋ tə n nə nɩ də kʋ nyʋran bələ tə yɩ Medi də Pɛrəsə tɩ̀án pɛ̀gá tə. 21 Bʋtɩlʋ tə nə jə kʋran tə yɩ Yavan lʋʋ nii pɩ̀ʋ́ tə. Nyʋʋ nədarʋ tə nə wulə kʋ yɩ́á tə pwə́rə́ wa yɩ təntən pɩ̀ʋ́ tə. 22 Nyʋran banɩa tə nə pɛ́n təntən nyʋʋ tə bwálɩ́ nə, kʋ nə kɛ́n, yɩ payun banɩa, tə nə wá jon payuu təntə bwálɩ́, yá tə dɩ̀àn bá yí kʋ. 23 Ba pàrɩ̀ tə yígúrə́ wa, máŋá tə cʋna lɩ̀à tə nə wá tʋn ba cʋna tə, ba ja lɛ tɩa nə, pɩ̀ʋ́ don, ʋ nə jə yigwənə, ʋ ga yɩ gɩgɩrɩnyiən wá ya lá. 24 Ʋ pàrɩ̀ dɩ̀àn wá súrí, kʋ ga tà ʋ tətə nə pɩn tə súrí. Ʋ wá cʋ̀gʋ̀ cʋcʋran kapʋpʋ, ʋ ga wá tʋn kʋ tə ʋ nə swə, ʋ pa kʋ nii sú. Ʋ wá cʋ̀gʋ̀ dɩ̀àn tɩ̀án, də Yɩɩ lɩ̀à tə. 25 Ʋ nə jə swɩan zənzən tə pɩn, ʋ wá wànɩ́ ʋ gɩgarɩ lɩ̀à kapʋpʋ, yá ʋ bɩcan wá sú də fwìə́. Ʋ wá cʋ̀gʋ̀ lɩ̀à kapʋpʋ sìə́ máŋá wa, ʋ ga zàn ʋ zɩgɩ pɛ̀gá tə mama Pɩ̀ʋ́ tə nə. Yá ʋ wá kɛ́n ʋ tʋ, də lìù jɩɩn wà ʋ yɩra jɩn. 26 Didəni də jɩjʋ yuu wa nɩʋn təntə yɩ cɩ́gá cɩcɩ. N mʋ̀ dàń ja nɩʋn təntə n bɩcan wa. Cɩ́gá, máŋá tə kʋ nə wá tʋn tə ŋʋ́ná.» 27 À mʋ̀ Danɩyɛlə dɩ̀àn zwɛ̀, à ga tʋ yɩŋa dɩan kapʋpʋ. Kʋ kwa nə, à zàn à tʋŋa pɩ̀ʋ́ tə tʋ̀tʋ̀nán tə. Nɩʋn tə yà pɩn à jɩ̀àn gwàrɩ̀ zənzən, à yà nə ba kʋ də̀ń nə̀ń yɩrɩ.