Danɩyɛlə 9

Danɩyɛlə yɩjʋnɩ

1 Asuerusə bìú Dariyusə, ʋ nə yɩ Medi lʋʋ lìù jìgə̀ Kaləde tɩ̀án payuu tə pɩ̀ʋ́, 2 yá ʋ pàrɩ̀ tə təntən bɩnɩ tə wa, à mʋ̀ Danɩyɛlə twá Yɩɩ saga tə nə, à ma lwarɩ də, Zwerizalɛmə dibwərən tə mɛ sə tə fwa bɩna sapwɩtwa də fugə, ndə Ba-Yígúrə́-Jə-Tiu nə swɩ̀n kʋ ʋ nii sʋ̀sʋ̀nʋ̀ Zweremi con nətʋ. 3 À viviri à yáá à te Yuu-Tiu Yɩɩ con, à vwa à nii, à zʋ ganlɔɔ gànʋ̀, à pɛ̀ tʋnan, à lwá à yuu wa, sə à ma jʋn wá, à ga lòrì wá pwəpwə. 4 À jʋn Ba-Yígúrə́-Jə-Tiu, à tíú Yɩɩ, à ga swɩ̀n ʋ con, də nə tʋn cʋna tə tə:

Yuu-Tiu, Yɩɩ tə nə wulə tə mɛ yuu wa, n nə ba kamandon jə, n zìlí n nimarʋ tə, də n wʋywaŋʋ* tə nii, lɩ̀à tə yɩrɩ ba nə swə mʋ́, ba ga zìlí n yìə̀n tə n nə pɩn nii tə yuu wa! 5 Nə tʋn cʋna, nə tʋn yolwana, nə yɩn wʋlʋnyɩna, nə vɩga n nii, nə vɩga n yìə̀n tə n nə pɩn nii tə yuu wa, də n coŋi tə. 6 N tʋ̀tʋ̀nà tə, ba nə yɩ n nii sʋ̀sʋ̀nà swɩ̀n nə pɛ̀gá tə, də nə yáá tɩ̀án tə, də nə nyɩna-ba, də lʋʋ nii tə wa lalʋʋ tə mama con, n yuu yɩrɩ, yá nə wà ba sʋgʋ cʋgʋ. 7 N mʋ̀ Yuu-Tiu nə yɩ cɩ́gá cwəŋə tíú! Nə mʋ̀ mɛ sə nə də́ cavɩra, kʋ mʋ̀ nə pɩn, kʋ ma yɩ nətʋ zə̀n, Zwida dwíí tə, də Zwerizalɛmə tɩ̀án, də Yɩzərayɛlə lɩ̀à tə mama yɩra, ba nə wulə bwə́lə́ bwə́lə́, də ba tə nə wulə yiŋʋnɩ, lʋʋ níə́ tə mama wa, n nə dɩŋɩ ba n kə, ba nə wà pùə́ nədʋ tɩ̀án yɩn n yáá con yɩrɩ. 8 Ba-Yígúrə́-Jə-Tiu, nə mʋ̀, də nə pɛ̀gá tə, də nə yáá tɩ̀án tə, də nə nɩbara-ba nə mɛ sə nə də́ cavɩra, nə nə tʋn cʋna nə zɩgɩ n nə yɩrɩ. 9 Yá Yuu-Tiu, nə tíú Yɩɩ dəri nə yinəgə, ʋ ga kwɛn nə cʋna ʋ lɩ, nə də wá pwə́rə́ wa, də nə nə vɩga ʋ nii tə mɛ. 10 Nə wà Ba-Yígúrə́-Jə-Tiu, nə tíú Yɩɩ nii zìlí, sə nə twá ʋ nii yìə̀n tə nə, ʋ nə twá də ʋ tʋ̀tʋ̀nà tə, ba nə yɩ ʋ nii sʋ̀sʋ̀nà, ʋ pa nəba. 11 Yɩzərayɛlə lɩ̀à tə mama vɩga, sə ba zìlí n nii yìə̀n tə, ba ga va yiŋʋnɩ də mʋ́, ba wà n sʋgʋ cʋgʋ. Yá zɩra tə də duri tə nə pʋ́pʋ́nɩ́ n nii sagɩ tə wa, n nə pɩn n tʋtʋnʋ Moyizə nə, dàń tʋa nə yuu wa, nə nə tʋn cʋna nə zɩgɩ n nə yɩrɩ. 12 N pɩn n sʋgʋ tə, n yà nə swɩ̀n n zɩgɩ nə də nə yáá tɩ̀án tə nə, ba nə ywàŋá nə yuu nə, nii sú. N pɩn lɛɛ nəfarʋ yí nəba, kʋ yiri tə nə wà tɩa yuu wa tʋn, ndə kʋ tə nə tʋn nətʋ Zwerizalɛmə wa. 13 Lɛɛ təntə mama yí nəba, ndə kʋ nə pʋ́pʋ́nɩ́ Yɩɩ nii sagɩ tə wa, ʋ nə pɩn Moyizə nə nətʋ. Yá nə wà Ba-Yígúrə́-Jə-Tiu, nə tíú Yɩɩ lòrì pwəpwə, nə wà nə yolwana tə fwaŋʋ nə yá, nə ga wà n cɩ́gá tə lwarɩ. 14 Ba-Yígúrə́-Jə-Tiu tanɩ lɛɛ təntə, ʋ pa tə yí nəba, Ba-Yígúrə́-Jə-Tiu, nə tíú Yɩɩ nə yɩ cɩ́gá tíú, ʋ yìə̀n mama wa yɩrɩ. Yá nə wà ʋ sʋgʋ cʋgʋ.

15 Yá sɩ́ʋ́n nə, Yuu-Tiu, nə tíú Yɩɩ, n mʋ̀ nə pɩn n lɩ̀à tə nan Ezwipətə lʋʋ nii tə wa, də n vàn dɩ̀àn, n ga pa n yɩrɩ nan, ndə kʋ nə yɩ nətʋ zə̀n. Nə tʋn cʋna, nə yɩn wʋlʋnyɩna. 16 Yuu-Tiu, nə lòrì mʋ́, sə n taa n tʋ̀tʋ̀nán tə yɩrɩ, tə nə tì cɩ́gá cwəŋə, n pa n lɩŋa tə nə nə fʋrɩ Zwerizalɛmə tɩʋ tə, də n culu paan tə yuu wa, pìí tə tʋ. Cɩ́gá, nə cʋna tə, də nə nɩbara-ba yolwana tə pɩn, lɩ̀à tə mama nə kɩkarɩ nəba, twɩ̀n Zwerizalɛmə tɩʋ tə, də n lɩ̀à tə. 17 Sɩ́ʋ́n nə, nə tíú Yɩɩ, à dàń lòrì mʋ́, sə n cʋgʋ à mʋ̀ n tʋtʋnʋ tə yɩjʋnɩ, də à lòrí tə, à nə lòrì mʋ́ pwəpwə. Taa n tətə Yuu-Tiu yɩrɩ, n pa n yáá poli n wúlú bwálɩ́ tə yuu wa, ba nə cʋ̀gʋ̀. 18 À tíú Yɩɩ, guni n zɩɩn, n cʋgʋ! Súrí n yɩ́á, n ywàń nə dibwərən tə, də tɩʋ tə, ba nə boŋə n yɩrɩ kʋ wa! Cɩ́gá, kʋ tà nə tʋ̀tʋ̀nán nə tì cɩ́gá cwəŋə yɩrɩ nə, nə lòrì mʋ́ pwəpwə, kʋ yɩ n nə dəri yinəgə zənzən yɩrɩ. 19 Yuu-Tiu, nə lòrì sə n cʋgʋ nə con! Yuu-Tiu, kwɛn nə cʋna n lɩ, nə də mʋ́ pwə́rə́ wa! Yuu-Tiu, cʋgʋ nə con zəni! À tíú Yɩɩ, taa n tətə sonu tə yɩrɩ, n tʋn yoo lala! Cɩ́gá, ba boŋə n yɩrɩ tə n tɩʋ tə wa, də n lalʋʋ tə wa.»

Máŋá dəkurən sapwɩtwa də fugə tə yoo

20 À yà tə wulə à swɩ̀n, à jʋnɩ Yɩɩ, à ga swɩ̀n à cʋna tə, də Yɩzərayɛlə lɩ̀à tə, ba nə yɩ à lʋʋ lɩ̀à cʋna tə, à bɩrɩ, yá à lòrì Ba-Yígúrə́-Jə-Tiu, à tíú Yɩɩ pwəpwə, à tíú Yɩɩ culu paan tə yɩrɩ. 21 À yà tə wulə à jʋnɩ Yɩɩ, də Gabərɩyɛlə, bɛɛ tə à nə dí yáá à na nɩʋn tə wa, piri lala, ʋ bà ʋ yí à yɩra. Kʋ yɩn didəni nii joŋi fwaŋʋ máŋá wa. 22 Ʋ kàrɩ̀ nə, ʋ ga swɩ̀n à con, ʋ wʋ́: «Danɩyɛlə, à twi sɩ́ʋ́n nə, sə à pa n nì yoo də̀ń. 23 Máŋá tə n nə sinti n lòrí tə, Yɩɩ pɩn nə kori, yá à twi sə à swɩ̀n kʋ, à bɩrɩ mʋ́, Yɩɩ nə swə mʋ́ tə yɩrɩ. Kə dɩ̀àn n nì sʋgʋ tə, də nɩʋn tə də̀ń. 24 Yɩɩ tún dapana sapwɩtwa də fugə n lʋʋ lɩ̀à tə, də n tɩʋ tə yɩrɩ, kʋ nə yɩ Yɩɩ nyiən, sə ba cʋna tə, də ba lwanɩ tə zwɛ̀, sə Yɩɩ kwɛn ba yolwana tə ʋ lɩ, ʋ də ba pwə́rə́ wa, ʋ ga pa ʋ cɩ́gá cwəŋə tə ya lá máŋá mama wuuu, ka pa nɩʋn də Yɩɩ nii sʋ̀ràn nii sú, sə ba ga lwá dun nʋga* Yɩɩ cɩcɩ dìyáá tə wa, ba ma tún ka ba pa Yɩɩ cɩcɩ nə. 25 N dàń yəni kʋ nətʋ tə, n ga nì kʋ də̀ń! Dapana barpɛ nə wulə máŋá tə ba nə swɩ̀n, sə ba pìí ba lwà Zwerizalɛmə tɩʋ tə, ba zɩgɩ, də pɩ̀ʋ́ tə Yɩɩ nə kúrí* pwə́rə́ wa. Dapana sapwɩtwa də bələ wa, ba wá pìí ba lwà tɩʋ tə, də biritaŋʋ tə, də kʋ dɩ̀àn dəkuu bwálá tə, yá kʋ dàń nə wá ya càn nəfarʋ máŋá wa. 26 Dapana sapwɩtwa də bələ təntə kwa nə, ba wá gʋ pɩ̀ʋ́ don, Yɩɩ nə kúrí, yá lìù mama bá jon wá. Pɩ̀ʋ́ don wá bà, yá ʋ lalʋʋ wá cʋ̀gʋ̀ tɩʋ tə, də Yɩɩ wúlú bwálɩ́ tə. Yá ʋ yígúrə́ wá ya ndə nɩ́á nə twi tə jon bwálɩ́. Yá cʋcʋran tə wá tʋn, kʋ va kʋ yí kʋ̀ʋ̀ tə yígúrə́, ndə Yɩɩ nə pɩn nii sə kʋ tʋn nətʋ. 27 Ʋ wá tún nimarʋ kʋ nə jə dɩ̀àn, də lɩ̀à kapʋpʋ, talɩkwa dapanɩ tə wa. Yá dapanɩ tə faan wa, ʋ wá pa ba yá jwəŋə tə, də zìlə́ wiən jwəŋə tə fwaŋʋ nə. Cʋcʋnyiən tə wá tʋn ʋ yobalwaran tə lala, kʋ va kʋ yí máŋá tə ʋ tətə nə wá cʋ̀gʋ̀, ndə Yɩɩ nə pɩn nii sə kʋ tʋn nətʋ.