Danɩyɛlə batwa nii nɩʋn tə yɩ bɛɛ, ʋ nə zʋa ganbʋa
10
1 Pɛrəsə pɩ̀ʋ́ Sirusə pàrɩ̀ tə batwa nii bɩnɩ tə wa, Yɩɩ swɩ̀n sʋgʋ don, ʋ bɩrɩ Danɩyɛlə nə, ba nə boŋə Bɛlətəswasarə. Kʋ sʋgʋ tə yɩ cɩ́gá: Kʋ̀ʋ̀ nəfarʋ wá ya lá. Danɩyɛlə nì sʋgʋ təntə də̀ń, ʋ ga lwarɩ yoo tə, nɩʋn tə nə bɩrɩ. 2 Kʋ máŋá təntə wa, à mʋ̀ Danɩyɛlə yɩn lúə́ pucʋnɩ wa, dapana batwa. 3 À yà ba wodiywaŋʋ də́, nàŋʋ́ də divɛn wà à nii zwɩ, à ga wà tɩralɩ ken à yɩra nə, dapana batwa tə nii kori tə sú. 4 Təntən cànà tə dɩan sapʋa də banɩa dɩɩn nə, à yà wulə mʋnaa nəfarʋ tə nii nə, ba nə boŋə Hidekɛləa. 5 À zɩ̀n à yáá yɩɩ nə, yá à nɩ bɛɛ, ʋ nə zʋa ganbʋa, ʋ ga vwa Ufazə tɩ̀án sɩ́án voru, ʋ tàŋá nə. 6 Ʋ yɩra yà yɩ ndə kapan cɩ́nʋ́ cɩcɩlʋ sagʋ nɩ́á pʋ̀pɔ́ nə, ʋ yáá yà yɩ ndə dwà pɩpɩlʋ nə, ʋ yɩ́á yà yɩ ndə mənvwə nə, ʋ vànà də ʋ nɛɛ yà yɩ ndə cɩnɩan nə, kʋ nə pɩpɩlɩ, ʋ kori ga yɩ ndə lɩ̀à kapʋpʋ kori nə. 7 À mʋ̀ Danɩyɛlə cɩcɩ nə nɩ nɩʋn təntə. Lɩ̀à tə yà nə wulə də nə wà nɩʋn təntə nɩ, yá fən zʋa ba zənzən, ba ga dəri ba səgə. 8 À cɩcɩ nə zɩgɩ lá, à ywàń nɩʋn təntə. Dɩ̀àn mama yà kʋ́ʋ̀ tə̀lə́ à yɩra. À yáá lwàń, ka cʋ̀gʋ̀, à dɩ̀àn mama ga zwɛ̀. 9 À nì bɛɛ tə kori, yá ʋ kori tə pɩn à vɩvaga, à ga tʋ, à jɛ, à pú à yáá tɩa. 10 Yá jɩɩn dwen à yɩra, kʋ pa à zàn à zi à nadwana də à jɩpɩra yuu, à ga vɩvaga. 11 Bɛɛ tə swɩ̀n à con, ʋ wʋ́: «Danɩyɛlə, n mʋ̀ bɛɛ tə Yɩɩ nə swə, kə dɩ̀àn n nì sʋ̀ràn tə də̀ń, à nə wá swɩ̀n n con. Zàn zɩgɩ yɩɩ nə, bwálɩ́ tə wa n nə wulə. Cɩ́gá, à yɩ ba tʋn n con sɩ́ʋ́n nətən.» Ʋ nə swɩ̀n sʋgʋ təntə à con, à zàn à zɩgɩ à nɛɛ yuu, à ga vɩvaga. 12 Ʋ swɩ̀n ʋ súrí lá, ʋ wʋ́: «Danɩyɛlə, dàn ká pa fən ja mʋ́! Kʋ nə zɩgɩ təntən dɩɩn tə nə, n nə pɩ̀à sə n nì yoo də̀ń, n ga mun n tɩ̀àn, n tíú Yɩɩ tə yáá con, Yɩɩ nì n sʋ̀ràn tə, yá n sʋ̀ràn tə yɩrɩ nə à twi. 13 Pɛrəsə payuu tə dɩ̀àn tíúb tə cɩ̀gà à yáá nə, dɩan sapʋa də nədʋ. Yá Miswɛləc, ʋ nə yɩ Yɩɩ kwatara yáá tíú nəfarʋ don, twi ʋ san nə. Yá à dàń yɩn pɛrəsə pɛ̀gá tə səpuni nə. 14 À twi sɩ́ʋ́n nə, sə à pa n lwarɩ kʋ tə nə wá yí n lʋʋ lɩ̀à tə, máŋá tə wa ka nə bɩ̀àn. Cɩ́gá, nɩʋn tə wulə, dɩan təntə yɩrɩ.»15 Máŋá tə ʋ nə wulə ʋ swɩ̀n sʋ̀ràn təntə à con, à ken à yáá tɩa, à ga pú à nii. 16 Yá lìù, ʋ nə nyən ndə ləzwənə, dwen à nii nə. Yá à dàń súrí à nii, à swɩ̀n lìù tə con, ʋ yà nə zɩga à yáá con, à wʋ́: «À yuu-tiu, nɩʋn tə yɩ̀gà nə, kʋ pa dɩ̀àn mama kʋ́ʋ̀ tə̀lə́ à yɩra. 17 Nətə nə, à mʋ̀ n tʋtʋnʋ tə wá wànɩ́ à swɩ̀n də mʋ́, à Yuu-Tiu? Sɩ́ʋ́n nə, dɩ̀àn mama kʋ́ʋ̀ tə̀lə́ à yɩra, à siŋu ga ba zəni twi.» 18 Lìù tə nə nyən ndə ləzwənə tə kʋ́ʋ̀ dwen à yɩra, ʋ ga pa à pìí à na dɩ̀àn. 19 Yá ʋ swɩ̀n à con, ʋ wʋ́: «N mʋ̀ bɛɛ tə Yɩɩ nə swə, dàn ká pa fən ja mʋ́, ja bɩcan sìə́! Pa n jɩɩn dàn, pa n jɩɩn dàn!» Yá máŋá tə ʋ nə wulə ʋ swɩ̀n à con, à pìí à na dɩ̀àn, à ga swɩ̀n, à wʋ́: «Swɩn, à yuu-tiu! Cɩ́gá, n pìí n pa nə dɩ̀àn.» 20 Ʋ swɩ̀n à con, ʋ wʋ́: «N yə̀ə́ won tə nə pɩn à bà n con? Sɩ́ʋ́n nə, à wá pìí à va à ta Pɛrəsə payuu tə dɩ̀àn tíú tə, yá à viru kwa nə, Yavan payuu tə dɩ̀àn tíúd tə wá bà. 21 Yá à wá swɩ̀n kʋ tə nə pʋ́pʋ́nɩ́ cɩ́gá sagɩ tə wa, à bɩrɩ mʋ́. Lìù tə̀lə́ ʋ nə saŋa à nə, ʋ tɛ də kʋ nə tà á kwatara yáá tíú Miswɛlə.