Yala tə wulə
Yala, jɩgwarʋ máŋá wa
3
1 À yɩ lìù tə fʋfʋlʋ nə yí nə,Yuu-Tiu lɩŋa daʋ tə də̀ń nə.
2 Ʋ ken nə cwəŋə wa,
ʋ pɩn à va yikunu wa,
ʋ wà pɩn à va poni wa.
3 À mʋ̀ cɩcɩ yuu wa nə,
ʋ zɩ̀n ʋ jɩɩn də ʋ bwɛ́, máŋá mama.
4 Yuu-Tiu pɩn à yatanaŋʋ tə də à tànʋ̀ tə pɩ̀nɩ̀,
ʋ ga nyʋnyʋgʋ à kurən tə.
5 Ʋ ja pucʋnɩ də jɩgwarʋ,
ʋ ma kɩkarɩ nə, ndə biritaŋʋ nə.
6 Ʋ pɩn à wulə yikunu wa,
ndə lɩ̀à tə nə, ba nə tɩga fuən mama.
7 Yuu-Tiu lwə̀ bírə́, ʋ ja kɩkarɩ nə,
sə à dàn ká wànɩ́ à nan.
Ʋ pɩn banzala dun jə nə.
8 À nə swə à bubwi, à lòrì sáŋʋ́,
ʋ yàá cɩ̀, à yɩjʋnɩ tə ba wá yí.
9 Ʋ sun à cwəŋə də kapana nəfaran,
kʋ pa à yori à tì cwəmɩnɩ.
10 Yuu-Tiu yɩn ndə kənyenkuru nə,
kʋ nə səgə sə kʋ pùrì nə,
nə à yə̀ə́ ndə gəru nə, kʋ yisəgə bwálɩ́ nə.
11 Ʋ pɩn à dʋgʋ cwəŋə, ʋ cʋ̀gʋ̀ nə,
ʋ ga kə nə pucʋnɩ wa.
12 Ʋ dɩ̀gà ʋ twan, ʋ ga tún nə
ndə won nə, ʋ tɛ də ʋ cɩan tə.
13 Yuu-Tiu ta ʋ cwan tə cɩan,
ʋ kə à cicerə wa.
14 À jìgə̀ mʋmʋn won à pa à lalʋʋ tə mama nə,
dɩɩn mama, à yɩ ba nii nuŋə.
15 Ʋ pɩn à sú də vʋran cɩ́càrán,
ʋ nyɩn nə də vàá.
16 Yuu-Tiu pɩn à lwa kafɩna də à yelə,
ʋ gùrì nə pùrú wa.
17 À bɩcan ba sìə́ jə,
yá à swɛ̀ɛ́ kʋ tə nə yɩ ywánɩ́.
18 Yá à swɩ̀n, à wʋ́: «À kwɩ̀n à yala tə nə,
à nə ken Ba-Yígúrə́-Jə-Tiu nə,
à kʋ́ʋ̀ ba ʋ yuu wa jələ!»
*
19 Lìí n tɩ̀àn à fʋfʋlʋ tə də à ywaŋʋ tə yoo,
tə yɩ ndə vàá də fwanan nə.
20 À lìí tə yoo zəni,
à pùə́ ga cʋ̀gʋ̀ zənzən.
21 Nə̀ń kʋ tə à nə wá pìí à lìí kʋ yoo,
kʋ tə à nə jə kʋ yala:
22 Ba-Yígúrə́-Jə-Tiu wʋywaŋʋ* tə wà zwɛ̀,
yá ʋ sonu nəfarʋ tə də wà kʋ yígúrə́ yí.
23 Tə pìí tə bwin jɩjʋ mama.
Cɩ́gá, ʋ yɩ pùə́ nədʋ tíú zənzən!
24 À swɩ̀n à waa con, à wʋ́:
«Ba-Yígúrə́-Jə-Tiu yɩ à tori,
kʋ mʋ̀ nə pɩn, à jələ ʋ yuu wa.»
25 Ba-Yígúrə́-Jə-Tiu ziən ʋ pa lìù tə nə,
ʋ nə jələ ʋ yuu wa.
Ʋ ziən ʋ pa lìù tə nə, ʋ nə pɩ̀à wá.
26 Kʋ ziən sə lìù ja ʋ tɩ̀án sənbwen,
ʋ ga jələ Ba-Yígúrə́-Jə-Tiu jonu yuu wa.
27 Kʋ ziən sə ləzwənə sɛ̀ nii, ʋ də́ càn,
kʋ nə zɩgɩ ʋ zandʋan máŋá wa.
28 Ʋ mɛ sə ʋ sɛ̀, ʋ jə̀ń kwa sənbwen,
máŋá tə wa Yuu-Tiu nə kəni càn ʋ nə.
29 Ʋ mɛ sə ʋ cú ʋ tɩ̀àn tɩa, Yɩɩ yáá con,
kʋ wàá də yala wá ya lá.
30 Ʋ mɛ sə ʋ te ʋ pɩpara lìù tə con,
ʋ nə mà wá, ʋ ga sɛ̀ fʋfʋlʋ yiri mama.
31 Cɩ́gá, Yuu-Tiu
ba lìù vɩ ʋ dʋga mɩ́ámɩ́án.
32 Yá ʋ nə ken càn lìù nə,
ʋ yàá dəri kʋ tíú yinəgə,
kʋ twá də ʋ wʋywaŋʋ nəfarʋ tə.
33 Cɩ́gá, kʋ tà ʋ sɩnɩ ʋ fʋfʋlɩ ləzoni,
ʋ ga kəni ba càn wa.
*
34 Ba nə nɩŋɩ lʋʋ nii
bandiə lɩ̀à mama də nɛɛ,
35 ba nə ba kʋ tə mɛ də ləzwənə zìlí,
Baan Yɩɩ yáá con,
36 ba nə fwa ləzwənə con, bʋra bwálɩ́ nə,
Yuu-Tiu ba kʋ na naaa?
37 Wàà nə yàá swɩ̀n yá kʋ ga jì?
Kʋ tà Yuu-Tiu nə yàá pa nii naaa?
38 Kʋ tà Baan Yɩɩ nii wa nə
lwanɩ də zəni naŋa naaa?
39 Bɛ̀ɛ̀ nə pɩn ləzwənəŋu ma ŋʋŋwɩn?
Ʋ mɩɩ tə wulə lʋʋ wa, də ʋ yɩ yolwafwanʋ tə mɛ.
40 Nə zəŋə nə tʋtʋnɛɛ tə, nə na tə nə yɩ nətʋ,
nə ga pìí nə bà Ba-Yígúrə́-Jə-Tiu con.
41 Nə súrə́ nə bɩcan nə bɩrɩ Yɩɩ nə,
ndə nə nə zɩ̀n nə jɩ̀àn nə tə Yɩɩ con nətʋ,
ʋ nə wulə lanworu tə wa.
42 Cɩ́gá mama, nə mʋ̀ tʋn cʋna nə zɩgɩ n nə,
yá n mʋ̀ wà nə cʋna tə kwɛn, n lɩ nə də mʋ́ pwə́rə́ wa.
43 N púə́ nə kwá, n dɩŋa də lɩŋa,
n ja n gʋ, n wà nə yinəgə dəri.
44 N ja bakwan n ma kwálɩ́ n tɩ̀àn nə,
sə nə yɩjʋnɩ dàn ká wànɩ́ kʋ yí mʋ́.
45 N pɩn nə jì ndə ywərən nə,
nə jìgə̀ ndə durən nə, dwíə́ nəkaran* tə titəŋi wa.
46 Nə dʋŋa tə mama swɩ̀n,
ba zɩga nə nə.
47 Bɩcapuri də tɩan bʋʋ,
də cʋcʋran kapʋpʋ nə yɩ nə tori.
48 À yinɩa pàlɩ̀ ndə nacoŋi nə,
cʋcʋran tə yɩrɩ, tə nə yí à lɩ̀à tə tɩzəŋu tə.
49 À yinɩa pàlɩ̀ tə ba zɩga,
kʋ pa à yɩ́á ba warɩ,
50 kʋ ja vələ máŋá tə Ba-Yígúrə́-Jə-Tiu nə wá
zuri ʋ yɩra, ʋ zɩgɩ lanworu tə wa ʋ ywàń, ʋ na.
51 À yɩ́á pɩn à na càn,
kʋ tə nə yí à tɩʋ tə nii tɩbii tə mama yɩrɩ.
*
52 Lɩ̀à tə nə dʋŋa nə tʋtʋ,
púə́ nə ba kə, ba dɩŋɩ ndə zuŋə nə.
53 Ba ken nə nɩ́á gwàlʋ́ nəfarʋ wa, sə ba gʋ,
yá ba ja kapan ba sun à nii nə.
54 Nɩ́á piri à yuu nə,
yá à yà swɩ̀n, à wʋ́: «À jɛ́n!»
55 Nɩ́á gwàlʋ́ nəfarʋ tə wa,
à bon à kə n yɩrɩ tə nə, Ba-Yígúrə́-Jə-Tiu.
56 N nì à bubwiə tə: «Dàn ká swɩn n zɩan,
máŋá tə à nə boŋə à kəni n nə, à lòrì n sáŋʋ́!»
57 Dɩɩn tə nə à nə bon à kə n nə, n yí à yɩra,
n ga swɩ̀n à con, n wʋ́: «Dàn ká pa fən ja mʋ́!»
58 Yuu-Tiu, n bʋ̀rɩ̀ n pa nə,
n jon à mɩɩ n kə lʋʋ wa.
59 Ba-Yígúrə́-Jə-Tiu, n nɩ ba nə fwa à con nətʋ:
bʋ̀rɩ̀ à bʋra n pa nə!
60 N nɩ nətʋ tə ba nə fwi ba lɩŋa à yuu wa,
ba táná tə mama ba nə tanɩ ba ja zɩga à nə.
61 Ba-Yígúrə́-Jə-Tiu, n nì ba tʋran tə,
ba táná tə mama ba nə tanɩ ba ja zɩga à nə.
62 Lɩ̀à tə nə zɩga à nə sʋ̀ràn,
ba táná tə yɩ ka zɩga à nə máŋá mama.
63 Ba nə jə̀ə́ tɩa, nə à yə̀ə́ ba nə zɩga yɩɩ nə,
ywàń: à mʋ̀ nə yɩ ba nii nuŋə.
64 Ba-Yígúrə́-Jə-Tiu, à lòrì mʋ́
sə n ŋwɩ́n ba tʋtʋnɛɛ tə jɩŋɩ ba yɩra.
65 Yala ba,
n pa ba bɩcan tɩ.
66 Pú ba kwa, n dɩŋa də lɩŋa, n ga cʋ̀gʋ̀ ba
mɩ́ámɩ́án, n lanworu tə də̀ń nə, Ba-Yígúrə́-Jə-Tiu!