Ba-Yígúrə́-Jə-Tiu yà yɩ ndə Yɩzərayɛlə lɩ̀à dʋŋʋ nə
Ba-Yígúrə́-Jə-Tiu cʋ̀gʋ̀ Zwerizalɛmə də Yɩɩ dìə̀ tə
2
1 Haya! Yuu-Tiu lɩŋa tə wa,ʋ púə́ Siyon bʋ̀á*a tə yuu nə də bakwan!
Ʋ zɩgɩ lanworu tə wa,
ʋ yigu Yɩzərayɛlə dun tə, ʋ dɩ tɩa!
Ʋ wà ʋ nɛɛ yituŋə bwálɩ́ tə yoo lìí,
ʋ lɩŋa tə dɩɩn nə!
2 Yuu-Tiu ʋ cʋ̀gʋ̀ Zwakɔbə dwíí lʋʋ nii tə mama,
ʋ wà kʋ yinəgə dəri.
Ʋ lɩŋa tə nə pupwin pɩn,
ʋ gwɛrɩ Zwida bʋ̀á*b tə dɩ̀àn dəkuu bwálá tə,
ʋ lwá tɩa,
ʋ ga kə payuu tə də kʋ pàbɩ̀á tə durən wa.
3 Ʋ lɩŋa nəfarʋ tə wa,
ʋ cʋ̀gʋ̀ Yɩzərayɛlə dɩ̀àn tə mama.
Ʋ wà sɛ̀ ʋ jon ʋ lɩ̀à tə nə,
máŋá tə wa dʋŋʋ tə nə twi ʋ ta ba.
Ʋ sʋ̀rɩ́ mənvwə Zwakɔbə dwíí tə wa,
tə də́ tɩa mama.
4 Ʋ dɩ̀gà ʋ twan ndə dʋŋʋ nə,
ʋ jɩzən ga kə tɛgʋ sírí ndə jarɩdon nə.
Ʋ gʋa kʋ tə mama jə fɩra yii wa.
Ʋ fwi ʋ lɩŋa tə nə pupwin ndə mən nə,
Siyon bʋ̀ác gansili tə yuu wa.
5 Yuu-Tiu jìgə̀ ndə dʋŋʋ nə,
ʋ pɩn Yɩzərayɛlə lʋʋ nii tə nyʋn lá.
Ʋ pɩn kʋ padii tə mama nyʋn lá,
ʋ cʋ̀gʋ̀ kʋ dɩ̀àn dəkuu bwálá tə.
Ʋ pɩn ŋʋŋwɩan də pucʋnɩ sʋ̀ràn dáá
Zwida lʋʋ lɩ̀à tə wa.
6 Ʋ gwɛrɩ ba dəwoo bírə́ tə, ndə dabɔɔ nə,
ʋ ga cʋ̀gʋ̀ ʋ də ʋ púlí tə jə́rə́ bwálɩ́ tə.
Ba-Yígúrə́-Jə-Tiu pɩn ba swɛ̀ɛ́ cànɩ̀ tə,
də sìə́ dɩɩn* tə yoo, Siyon tɩʋ tə wa.
Yá ʋ lɩŋa tə nə zàn zənzən tə pɩn,
ʋ kə cavɩra pɩ̀ʋ́ tə də Yɩɩ joŋwana tə nə.
7 Yuu-Tiu vɩga ʋ joŋi bwálɩ́ tə ʋ dʋgʋ,
ʋ waa nan ʋ wúlú bwálɩ́ tə.
Ʋ ken Siyon padii tə bírí tə dʋŋʋ jɩɩn wa.
Yá zizigu yɩn dánɩ́ zənzən
Ba-Yígúrə́-Jə-Tiu dìə̀ tə wa,
ndə jə́rə́ nəfarʋ dɩɩn nə.
8 Ba-Yígúrə́-Jə-Tiu kúrí ʋ tì,
sə ʋ cʋ̀gʋ̀ Siyon bʋ̀á tə biritaŋʋ tə.
Ʋ tɩɩn dìlwə̀rə́ ŋwənə,
yá ʋ wà pìí ʋ kʋ̀rɩ́ ʋ jɩɩn,
ʋ kori ʋ cʋ̀gʋ̀ ka mɩ́ámɩ́án.
Ʋ ken biritaŋʋ də bírə́ pucʋnɩ wa,
tə mama gwɛrɩ.
9 Tɩʋ tə bòrə̀n tə mʋ̀rɩ̀ tə zʋ tɩa,
ʋ nyʋnyʋgʋ kʋ boruswaran tə.
Kʋ pɩ̀ʋ́ tə də kʋ tʋ̀tʋ̀nán yun tɩ̀án tə wulə dwíə́ nəkaran* tə wa.
Yɩɩ nii yìə̀n* kʋ́ʋ̀ tə̀lə́,
Yɩɩ nii sʋ̀sʋ̀nà tə də tətə kʋ́ʋ̀ ba nɩʋn na,
kʋ nə nan Ba-Yígúrə́-Jə-Tiu con.
10 Siyon bʋ̀á tə nəkwɩna* tə jə̀ə́ tɩa,
ba pú ba níə́.
Ba pɛ̀ pùrə́n ba lwá ba yuu wa,
ba ga zʋ ganlwaran.
Zwerizalɛmə kacɩan tə ziri ba yuu tɩa.
*
11 À kwi, à yɩ́á ŋʋ̀nɩ̀,
à lʋran wiri,
à jɩ̀àn gwàrɩ̀,
cʋcʋran tə yɩrɩ, tə nə yí à lɩ̀à tə tɩzəŋu.
Cɩ́gá, bìsɩ́ná də bìsɩ̀nɩ́ mɩɩ zwɛ̀,
tɩʋ tə kanpwərən tə wa.
12 Bìsɩ́ná tə bwe ba ninə con, ba wʋ́:
«Wodiu də divɛn wulə yə̀n nə?»
Ba mɩɩ zwɛ̀ ndə lɩ̀à nə ba nə caŋɩ,
tɩʋ tə kanpwərən tə wa,
ba ga kori ba ninə jɩ̀àn wa.
*
13 Bɛ̀ɛ̀ nə à kʋ́ʋ̀ wá swɩ̀n n con?
Wàà nə à wá ma man də mʋ̀?
Nətə nə à wá kòrì mʋ́, Siyon bʋ̀á kacɩɩn?
Cɩ́gá, cʋcʋran tə ba nə cʋ̀gʋ̀ n wa,
dáá zənzən ndə mʋʋ nə:
Wàà nə wàá mʋ́ yazurə ʋ pɩn?
14 N Yɩɩ nii sʋ̀sʋ̀nà tə yɩ kʋ̀nkʋ̀n nɩʋn,
də yìə̀n tə nə ba də̀ń jə nə ba nɩ ba bɩrɩ.
Ba wà n yolwan tə swɩ̀n ba bɩrɩ mʋ́,
sə kʋ jon mʋ̀ n yongaʋ tə vəlu jɩɩn wa.
Kʋ yɩ kʋ̀nkʋ̀n nɩʋn də gɩgara sʋ̀ràn nə ba nɩ,
ba swɩ̀n n con.
15 Lɩ̀à tə mama nə twá yəbə ba kɛ̀ń,
mà ba jɩ̀àn n yɩrɩ,
ba cʋcwɩ, də ba vuvugə ba yuu,
Zwerizalɛmə tɩzəgu tə yɩrɩ,
kʋ nə yɩ ndə kacɩɩn nə,
ba ga swɩ̀n, ba wʋ́:
«Mə tɩʋ tə nə, ba nə boŋə tɩʋ tə nə jə fɩra,
kʋ ga pɩn pupwən tɩa yuu mama wa nə nətən?»
16 N dʋŋa tə mama swɩ̀n ba zɩga n nə,
ba fɩlɩ fɩla, də ba nyɩn ba yelə,
ba ga swɩ̀n, ba wʋ́:
«Nə jɩɩn zʋa wá!
Dɩɩn kʋ tə nə, nə yà dànɩ̀,
yá nə yí kʋ, nə na kʋ!»
17 Ba-Yígúrə́-Jə-Tiu tʋn kʋ tə,
ʋ yà nə kúrí ʋ tì sə ʋ tʋn.
Ʋ tʋn yoo tə ʋ yà nə kàn nii fuən mama,
də ʋ wá tʋn, ʋ pa kʋ nii sú.
Ʋ cʋ̀gʋ̀, ʋ wà yinəgə dəri:
Ʋ pɩn n jì n dʋŋʋ pupwən won,
ʋ súrí n jarɩduən dɩ̀àn.
*
18 Zwerizalɛmə tɩ̀án bubwi ba kə Yuu-Tiu nə.
Siyon bʋ̀á biritaŋʋ,
pa n yinɩa lwá ndə nacoru nə, yɩcaʋ də tɩtɩn.
Dàn ká sìí, dàn ká pa n yinɩa warɩ n yɩ́á wa.
19 Zàn n mà bubwiə tɩtɩn tə mama.
Lwá kʋ tə nə wulə n bɩcan wa,
Yuu-Tiu yáá con, ndə nɩ́á nə.
Zɩ̀n n jɩ̀àn n te ʋ con,
sə ʋ jon n bìsɩ́ná tə mɩɩ ʋ kə lʋʋ,
niən nə wulə tə lɩ ba mɩɩ,
coŋi tə mama yuu wa yɩrɩ.
*
20 Ywàń n jə́n Ba-Yígúrə́-Jə-Tiu,
wàà yɩra nə n dí yáá n tʋn kʋ tə yiri!
Kʋ yà mɛ sə kana də́ ba kwíə́ də̀ń bɩ̀á,
bisɩmabii tə ba nə swə zənzən naaa?
Kʋ yà mɛ sə ba gʋ Yɩɩ joŋwana,
də Yɩɩ nii sʋ̀sʋ̀nà Yuu-Tiu wúlú bwálɩ́ tə wa naaa?
21 Ləzwəndʋn də bazʋnan tʋa,
ba larɩ tɩa coŋi tə yuu.
Kwatara sɩ̀ʋ́ gʋa à bwɩ̀ɩ́ kacɩɩan də à balandʋra.
N gʋa ba n lɩŋa tə dɩɩn nə,
n ken sɩ̀ʋ́ ba bɩan nə, n wà ba yinəgə dəri.
22 n bon à jənduən tə nə kəni fən à waa,
n kə à nə,
n pɩn ba nan bwálá tə mama,
ba bà à nə, ndə cànà dɩɩn nə.
Ba-Yígúrə́-Jə-Tiu lɩŋa tə dɩɩn nə,
lìù mama wà wànɩ́ ʋ dəri ʋ jɛ́n,
nə à yə̀ə́ ʋ jon ʋ mɩɩ.
Ba tə à nə sóní zənzən, à ga kʋ̀nà ba,
à dʋŋʋ tə cʋ̀gʋ̀ ba.