Zweremi
Pucʋnɩ sʋ̀ràn
Cɩ́gá, ʋ yɩ pùə́ nədʋ tíú zənzən!» (3:22-23)
Zwida lʋʋ lɩ̀à tə yà ja sʋ̀ràn təntə ba ma dɩ gwaran, ba nuŋə ba yɩjʋnɩ máŋá wa, ba ma lìí Zwerizalɛmə də Yɩɩ dìə̀ tə yoo, Babɩlɔnə tɩ̀án nə cʋ̀gʋ̀, bɩna 586 bɩnɩ tə wa, də Zwezi-Kərisə tə wà lʋʋ twi. Kʋ máŋá tə wa, Babɩlɔnə tɩ̀án jɩn Zwida lʋʋ lɩ̀à duən ba ja va yongaʋ, Babɩlɔnə nə.
Sagɩ tə sʋyun
Təntən pucʋnɩ sʋ̀ràn: Ba vɩga Zwerizalɛmə tɩʋ tə ba dʋgʋ (swapitərə 1)
Bələ nii pucʋnɩ sʋ̀ràn: Ba-Yígúrə́-Jə-Tiu yà yɩ ndə Yɩzərayɛlə lɩ̀à dʋŋʋ nə (swapitərə 2)
Batwa nii pucʋnɩ sʋ̀ràn: Yala tə wulə (swapitərə 3)
Banɩa nii pucʋnɩ sʋ̀ràn: Dʋŋa cʋ̀gʋ̀ Zwerizalɛmə tɩʋ tə (swapitərə 4)
Bonu nii pucʋnɩ sʋ̀ràn: Zwerizalɛmə tɩ̀án lòrì Ba-Yígúrə́-Jə-Tiu pubwanʋ tə (swapitərə 5).
Ba vɩga Zwerizalɛmə tɩʋ tə ba dʋgʋ
Pucʋnɩ sʋ̀ràn, Zwerizalɛmə tɩʋ tə yɩrɩ
1
1 Haya! Zwerizalɛmə tɩʋ tə nə,ba vɩga kʋ ba dʋgʋ, kʋ cɩcɩ,
tɩʋ təntə, kʋ yà nə súə́ də lɩ̀à!
Kʋ yɩrɩ yà nan lʋʋ dwíə́ tə wa,
yá nə̀ń kʋ nə, kʋ jìgə̀ ndə kadənu nə!
Kʋ yà yɩ ndə pabʋa nə,
kʋ də́ pàrɩ̀ nagwanɛɛ tə yuu wa,
yá kʋ dàń nə, kʋ jìgə̀ yoŋu.
2 Tɩtɩn nə, kʋ yàá kwi zənzən,
kʋ yɩnɩa dəri kʋ pɩparɩ yuu.
Lɩ̀à tə mama yà nə swə kʋ,
lìù mama ba kʋ kòrì.
Kʋ dabara mama tʋn pwìí bələ yoo kʋ yɩra,
kʋ pa ba jì kʋ dʋŋa.
3 Ba ja Zwida lʋʋ lɩ̀à tə ba va yongaʋ,
ba fʋfʋlɩ ba,
ba ga kə ba ywə́n tʋ̀tʋ̀nán wa zənzən.
Ba wulə dwíə́ nəkaran* tə titəŋi wa,
yá ba bá sìə́ jə.
Lɩ̀à tə mama yà nə panɩ ba nə,
jɩɩn dàń zʋa ba, ba jɩgwarʋ tə wa.
4 Siyon* tɩʋ tə coŋi tə wulə pucʋnɩ wa.
Cɩ́gá, ba kʋ́ʋ̀ ba tə twá ba ma twi,
ba də́ cànɩ̀ tə.
Tɩʋ tə mimiena tə mama cʋ̀gʋ̀,
lɩ̀à kʋ́ʋ̀ ba lá naŋa ba jəni.
Kʋ joŋwana tə kwi ba sisigə,
kʋ kacɩan tə wulə pucʋnɩ wa,
yá kʋ tətə dàń wulə pucʋnɩ wa.
5 Kʋ jarɩduən dí dɩ̀àn kʋ yuu wa,
kʋ dʋŋa yɩra zuri.
Cɩ́gá, Ba-Yígúrə́-Jə-Tiu ken càn kʋ nə,
kʋ cʋna kapʋpʋ tə yɩrɩ.
Kʋ bìsɩ́ná yɩn kʋ jarɩduən yáá,
ba ja va yongaʋ.
6 Siyon bʋ̀áb tə kwɩ̀n ʋ dun tə mama nə.
Kʋ tʋ̀tʋ̀nán yun tɩ̀án tə jìgə̀ ndə
bɩnɩ mama ka pɛ́n nyʋʋ nə,
tə nə kʋ́ʋ̀ ba gaʋ na tə də́,
yá tə ba dɩ̀àn jə, sə tə dəri tə jɛ́n,
twanbɛɛ yáá nə.
7 Máŋá tə wa dʋŋa nə fʋfʋlɩ Zwerizalɛmə tɩʋ tə,
ba pa kʋ ywaŋa,
kʋ pìí kʋ lìí kʋ wiən tə mama yoo,
tə nə jɩn funə tə pa kʋ, fuən nə.
Máŋá tə kʋ lalʋʋ tə nə tʋa kʋ jarɩduən jɩɩn wa,
yá lìù tə̀lə́ sə ʋ jon ba,
kʋ jarɩduən tə nɩ kʋ,
yá ba mʋn kʋ, kʋ nə cʋ̀gʋ̀ yɩrɩ.
8 Zwerizalɛmə tʋn cʋna kapʋpʋ,
kʋ mʋ̀ nə pɩn kʋ ma jì durən.
Lɩ̀à tə mama yà nə bwɩ kʋ nə,
dàń yɩ ba fʋfʋlɩ kʋ,
ba nə na də kʋ yɩ swələ yɩrɩ.
Kʋ tətə dàń yɩ kʋ kwi, kʋ sisigə,
kʋ ga pìí kʋ kəni kʋ kwa.
9 Kʋ durən tə wulə kʋ ganzwɩdarʋ nə.
Kʋ wà yoo tə nə wá yí kʋ jwɩan nə yoo bʋ́n,
kʋ pa kʋ tʋrɩ tə dɩ kʋ yuu,
yá lìù mama wà kʋ kòrì.
Kʋ swɩ̀n, kʋ wʋ́:
«Ba-Yígúrə́-Jə-Tiu, ywàń ba nə fʋfʋlɩ nə nətʋ!
Cɩ́gá, dʋŋʋ tə dí dɩ̀àn!»
10 Jarɩdon tə te ʋ jɩɩn,
ʋ jon Zwerizalɛmə wiən tə mama nə jə funə.
Kʋ nɩ dwíə́ nəkaran tə,
də ba zʋa Yɩɩ wúlú bwálɩ́* tə wa,
yá Yɩɩ yà dùə̀ súú ba nii nə,
sə ba dàn ká zʋ ʋ púlí tə wa.
11 Kʋ lalʋʋ tə mama də́ càn,
ba ma pɩ̀à wodiu.
Ba ja ba wiən tə nə jə funə,
ba ma lárɩ́ wodiu,
sə ba mɩɩ ma wànɩ́ kʋ ya lʋʋ wa.
Kʋ swɩ̀n, kʋ wʋ́:
«Ba-Yígúrə́-Jə-Tiu, ywàń n jə́n
ba nə fʋfʋlɩ nə nətʋ!»
12 Kʋ dàn ká ya nətʋ,
kʋ pa á mʋ̀ lɩ̀à tə mama nə,
á nə twá Zwerizalɛmə wa, á kɛ̀ń!
Á ywàŋá á jə́n,
càn wulə tə nə nyən ndə à càn tə nə,
tə nə nyən ndə càn tə nə, ba nə ken à nə!
Ba-Yígúrə́-Jə-Tiu ken càn à nə,
ʋ lɩŋa nəfarʋ tə dɩɩn nə.
13 Ba-Yígúrə́-Jə-Tiu zɩgɩ lanworu tə wa,
ʋ pa mən cú à kurən wa.
Ʋ ken gəgəlu à nɛɛ də̀ń nə,
ʋ pa à tʋ à kwa yara.
Ʋ vɩga nə ʋ dʋgʋ, à cɩcɩ,
yá à də́ càn dɩɩn mama.
14 Ʋ ken à cʋna tə mama duən nə, ʋ pɩan,
ʋ tì ʋ kə à bɩan nə.
Tə kàŋɩ̀ à kələru nə,
tə pa à dɩ̀àn zwɛ̀.
Yuu-Tiu ken nə lɩ̀à jɩɩn wa,
à nə wàrɩ̀ à tɩ̀àn à joŋə.
15 Yuu-Tiu vɩga à kwatara babɩran tə mama,
ba yà nə wulə də nə, ʋ dʋgʋ.
Ʋ bon púlí, ʋ pú duən nə, à yɩrɩ,
sə ʋ ma cʋ̀gʋ̀ à ləzwəndʋn tə.
Yuu-Tiu nɩŋɩ Zwida bʋ̀á kacɩɩn tə,
ndə ba nə nɩŋɩ divɛn tɩ̀án bɩ̀á, gwàlʋ́ wa nətʋ.
16 Kʋ mʋ̀ yɩrɩ nə à kwi,
à yɩ́á sú də yinɩa.
Cɩ́gá, lìù tə nə wàá nə ʋ kòrì,
ʋ pɩn à lʋʋ wulu yanɩ zəni,
ŋʋ́ná də nə.
À bɩ̀á tə wulə pucʋnɩ wa,
dʋŋʋ tə nə dí dɩ̀àn yɩrɩ.
17 Siyon tɩ̀án te ba jɩ̀àn,
yá lìù mama wà ba kòrì.
Ba-Yígúrə́-Jə-Tiu pɩn nii
sə Zwakɔbə dwíí tə jarɩduən tə nə kɩkarɩ ba,
zɩgɩ ba nə.
Zwerizalɛmə tɩʋ tə jìgə̀ durən won, ba titəŋi wa.
18 Ba-Yígúrə́-Jə-Tiu nə yɩ cɩ́gá tíú.
Cɩ́gá à wà ʋ yìə̀n tə,
ʋ nə pɩn nii tə yuu wa nii zìlí.
Á mʋ̀ lʋʋ dwíə́ tə mama cʋga,
á ywàŋá à càn tə.
Ba jɩn à bwɩ̀ɩ́ kacɩan,
də à balandʋra ba va yongaʋ.
19 À bon lɩ̀à tə ba yà nə swə nə,
yá ba gɩgarɩ nə.
À Yɩɩ joŋwana də à nəkwɩna* mɩɩ zwɛ̀ tɩʋ tə wa.
Ba yà twarɩ wodiu,
sə ba mɩɩ ma wànɩ́ kʋ ya lʋʋ wa.
20 Ba-Yígúrə́-Jə-Tiu, ywàń à jɩgwarʋ tə nyɩɛn!
À lʋran wiri,
à pùə́ cʋ̀gʋ̀ zənzən.
Cɩ́gá mama, à wà nii sɛ̀.
Kàrá con, kwatara sɩ̀ʋ́ pɩn à kwɩ̀n à bɩ̀á nə,
yá dìə̀ waa yɩ ndə tɩan tətə nə.
21 Ba nì də à kwi, à sisigə,
yá lìù mama wà nə kòrì.
À dʋŋa mama nì à lɛɛ tə yoo,
ba ga jwɛ, n nə pɩn tə yí nə yɩrɩ.
N pɩn dɩɩn tə n nə swɩ̀n kʋ yoo tə bà.
Pa sə ba də jì ndə à nə.
22 Kə ba wʋlʋŋʋ tə mama n yáá con,
n ga tʋn kʋ tə n nə tʋn à yɩra,
à cʋna tə mama yɩrɩ, ba də yɩra.
Cɩ́gá à súrə́ tə dáá zənzən,
kʋ pa à bɩcan yɩ̀.