Ba-Yígúrə́-Jə-Tiu mɛ də bʋra
148
1 Á bwɩa Ba-Yígúrə́-Jə-Tiu nə!Á bwɩa Ba-Yígúrə́-Jə-Tiu nə lanworu tə wa!
Á bwɩa ʋ nə lanworu tə wa, baan baan!
2 Á bwɩa ʋ nə, á mʋ̀ ʋ malɩkɛ tə mama!
Á bwɩa ʋ nə, á mʋ̀ ʋ kwatara púlə́ tə mama!
3 Yɩcaʋ tə də cànà tə bwɩa ʋ nə!
Kacɩlacɛɛ tə mama nə tùŋə̀, bwɩa ʋ nə!
4 Baan baan lanworu tə də kʋ dánɩ́ tə mama bʋ ʋ nə!
Nɩ́á tə nə wulə lanworu tə yuu con, bwɩa ʋ nə!
5 Tə bwɩa Ba-Yígúrə́-Jə-Tiu yɩrɩ tə nə!
Cɩ́gá, ʋ mʋ̀ nə pɩn nii, tə ma bà lʋʋ.
6 Ʋ pɩn tə wulə máŋá də máŋá mama wuuu,
ʋ tún coŋi, tə nə ba lwànɩ́.
7 Á bwɩa Ba-Yígúrə́-Jə-Tiu nə, tɩa yuu wa:
Á mʋ̀ mʋʋ wojijirən tə,
də bʋran nəfaran tə mama, tə də̀ń nə lu,
8 də mən də dwakafɩna, də nyʋ̀nʋ̀ də fun,
də dwavʋʋ tə nə yɩ ʋ sʋgʋ tə tʋtʋnʋ,
9 də pɛɛn tə də dədwələn tə mama,
də tɩ̀án tə nə zɩŋa lənə,
də sɩsaban tɩ̀án tə mama,
10 də ganaŋa tə də sàń vàná tə mama,
də wiən tə nə vəli tə pùə́ baan,
də zuŋi tə nə jə vànà tə piri,
11 də tɩa yuu pɛ̀gá tə də dwíə́ tə mama,
də pàbɩ̀á tə də lɩ̀à tə mama nə bʋ̀rɩ̀ bʋra tɩa yuu wa,
12 də balandʋra tə də á mʋ̀ kacɩan tə də,
də bazʋnan tə də bìsɩ́ná tə!
13 Bwɩa Ba-Yígúrə́-Jə-Tiu yɩrɩ tə nə!
Cɩ́gá, ʋ cɩcɩ yɩrɩ tə nə wulə tə mɛ yuu wa,
ʋ dun tə wulə tɩa də lanworu yuu wa.
14 Ʋ pɩn ʋ lalʋʋ tə dɩ̀àn súrí,
kʋ pa ʋ lɩ̀à tə nə yɩ pùə́ nədʋ tɩ̀án pɩn wá dun,
yá Yɩzərayɛlə dwíí tə ʋ nə swə bwɩ ʋ nə.
Á bwɩa Ba-Yígúrə́-Jə-Tiu nə!