Ba-Yígúrə́-Jə-Tiu dɩ̀àn tə yoo
147
1 Á bwɩa Ba-Yígúrə́-Jə-Tiu nə!Cɩ́gá, kʋ ziən sə nə siən nə tíú Yɩɩ,
kʋ jə fɩra, kʋ ga ziən, sə nə bʋ ʋ nə!
2 Ba-Yígúrə́-Jə-Tiu pìí ʋ lwà Zwerizalɛmə,
yá ʋ pɩn Yɩzərayɛlə lɩ̀à tə,
ba nə ja va yongaʋ,
pìí ba bà duən yáá.
3 Ʋ kòrì ba tə, ba pwìí nə cʋ̀gʋ̀,
ʋ ga ywarɩ ba nʋran.
4 Ʋ mʋ̀ nə gàlɩ̀ kacɩlacwɛɛ tə,
ʋ ga dɩ ka nədʋa mama yɩrɩ.
5 Nə Yuu-Tiu dáá, ʋ dɩ̀àn dáá,
ʋ pubʋŋa tə ba yígúrə́ jə.
6 Ba-Yígúrə́-Jə-Tiu saŋa lɩ̀à tə nə,
ba nə muŋə ba tɩ̀àn,
yá ʋ muŋə wʋlʋnyɩna,
ʋ pɩn ba cwí ba yí tɩa.
7 Á dɩa gwaran
á ma kə Ba-Yígúrə́-Jə-Tiu lɛ̀ɛ̀,
á sənə nə tíú Yɩɩ də bànʋ́!
8 Ʋ pɩn bakwan piri lanworu tə nə,
ʋ tanɩ dwà, ʋ pɩn ka nɩ̀ tɩa yuu wa,
yá ʋ pɩn gaʋ pɛ́n pɛɛn yuu wa.
9 Ʋ pɩn wodiu vàná nə,
ʋ pɩn wodiu batɩankanan bɩ̀á nə,
máŋá tə wa tə nə kwi.
10 Ʋ ba səsən dɩ̀àn jələ,
ʋ ma ba bɛɛ vagoo ywàŋá.
11 Yá Ba-Yígúrə́-Jə-Tiu swə lɩ̀à tə nə dəri ʋ fən,
də lɩ̀à tə nə ken ba yala ʋ wʋywaŋʋ* tə nə.
12 Zwerizalɛmə, pa dun Ba-Yígúrə́-Jə-Tiu nə!
Siyon tɩʋ, bʋ n tíú Yɩɩ tə nə!
13 Cɩ́gá, ʋ pɩn n bwə̀rə̀n boruswaran jə dɩ̀àn,
ʋ fwa zəni n bibara tə yɩra, n titəŋi wa.
14 Ʋ pɩn sìə́ wulə n lʋʋ nii tə wa,
ʋ pɩn mʋ́ mɩna mun nəzəŋu, n də́ n swí.
15 Ʋ pɩn nii kʋ bà tɩa yuu wa,
yá ʋ nii sʋgʋ tə vəli lala.
16 Ʋ pɩn nyʋ̀nʋ̀ vwa tɩa, ndə gunən nə,
ʋ ga pa fun pú tɩa yáá nə, ndə tʋntʋnan nə.
17 Ʋ pɩn dwakafɩna lwa.
Wàà nə wàá tə zuni tə ʋ pɩ́nɩ́?
18 Yá ʋ nə zə́n ʋ pa nii, tə yàá nyɩan.
Ʋ nə pɩn vʋʋ fuli, nɩ́á yàá dəri.
19 Ʋ pɩn Zwakɔbə nì ʋ sʋ̀ràn tə,
ʋ pɩn ʋ yìə̀n tə ʋ nə pɩn
tə pʋ́pʋ́nɩ́ tə tún, sə ba twá tə nə,
də ʋ yìə̀n tə ʋ nə pɩn nii
sə tə tʋn, Yɩzərayɛlə lɩ̀à nə.
20 Ʋ wà yoo təntə yiri tʋn
ʋ pa dwíə́ nəkaran* tə mama nə,
kʋ pa ba yəri ʋ yìə̀n tə,
ʋ nə pɩn nii sə tə tʋn.
Á bwɩa Ba-Yígúrə́-Jə-Tiu nə!