Ba-Yígúrə́-Jə-Tiu yɩ labwana cɩ̀rʋ́
146
1 Á bwɩa Ba-Yígúrə́-Jə-Tiu nə!À jə̀rə́, bʋ Ba-Yígúrə́-Jə-Tiu nə!
2 À wá bʋ Ba-Yígúrə́-Jə-Tiu nə,
máŋá tə mama à mɩɩ nə wá ya lʋʋ wa,
à wá dɩ gwaran à ma siən à tíú Yɩɩ,
máŋá tə mama à nə wá ya lʋʋ wa.
3 Dànà ká jələ ləzwənfaran yuu wa,
dànà ká jələ ləzoni yuu wa,
ba wàrɩ̀ lìù ba joŋə.
4 Ba də mɩɩ wá zwɛ̀,
ba pìí ba zʋ tɩa pùrú wa,
yá kʋ dɩɩn tə nə,
ba pubʋŋa yìə̀n zwɛ̀ nətʋ.
5 Pupwən lìù nə yɩ lìù tə
nə jələ Zwakɔbə Yɩɩ tə yuu wa,
ʋ ga kəni ʋ yala Ba-Yígúrə́-Jə-Tiu nə,
ʋ nə yɩ ʋ Yɩɩ!
6 Ʋ mʋ̀ nə fwa lanworu də tɩa, də mʋʋ,
də wiən tə mama nə wulə tə wa.
Ʋ mʋ̀ nə jə cɩ́gá máŋá mama wuuu.
7 Ʋ yàá bʋ̀rɩ̀ ʋ pɩn lɩ̀à tə nə, ba nə fɩfɩn ba,
ʋ ga pɩn wodiu lɩ̀à tə nə, niən nə jə ba.
Ba-Yígúrə́-Jə-Tiu yàá lɩ bandiə lɩ̀à ʋ dʋgʋ.
8 Ba-Yígúrə́-Jə-Tiu pori lilirən yɩ́á,
Ba-Yígúrə́-Jə-Tiu yàá pìí ʋ kwɩ̀án lɩ̀à tə nə gori,
Ba-Yígúrə́-Jə-Tiu swə cɩ́gá tɩ̀án tə.
9 Ba-Yígúrə́-Jə-Tiu ywàŋá vərə yuu,
ʋ saŋa bɩtarʋ də kadənu nə,
yá ʋ ba yá ʋ pɩn wʋlʋnyɩna pubʋŋa yìə̀n jì.
10 Ba-Yígúrə́-Jə-Tiu wá də́ pàrɩ̀,
máŋá də máŋá mama wuuu.
Ooo Siyon tɩʋ, ʋ yɩ n Yɩɩ,
máŋá də máŋá mama wuuu!
Á bwɩa Ba-Yígúrə́-Jə-Tiu nə!