Ba-Yígúrə́-Jə-Tiu parɩ tə ba yígúrə́ jə
145
1 Davidə gwaran.
À tíú Yɩɩ, à pɩ̀ʋ́, à wá siən mʋ́,
à ga wá bʋ n yɩrɩ tə nə, máŋá mama wuuu.
2 À wá pa mʋ́ dun, dɩɩn mama,
à wá bʋ n yɩrɩ tə nə,
máŋá də máŋá mama wuuu.
3 Ba-Yígúrə́-Jə-Tiu dáá,
ʋ ga mɛ də bʋra zənzən,
lìù wàrɩ̀ ʋ dánɩ́ tə máŋá ʋ maŋa.
4 Máŋá də máŋá mama wuuu,
ba wá bʋ n tʋ̀tʋ̀nán tə nə,
ba ga man n dɩ̀àn tʋ̀tʋ̀nán tə yoo, ba bɩrɩ.
5 À wá swɩ̀n n pàrɩ̀ tə, də n dun tə,
də n nə jə fɩra nətʋ yoo,
à ga man yomɩlan tə yoo à bɩrɩ.
6 Ba wá swɩ̀n n dɩ̀àn tə yoo,
tə nə ba kamandon jə,
yá à mʋ̀ wá man n tʋtʋnfaran tə à bɩrɩ.
7 Ba wá man n pubwanʋ tə nə dáá nətʋ ba bɩrɩ,
ba ga wá mà pupwən cə̀rə́, n cɩ́gá cwəŋə tə yɩrɩ.
8 Ba-Yígúrə́-Jə-Tiu fwa pubwanʋ lɩ̀à yɩra,
ʋ dəri lɩ̀à yinəgə, ʋ lɩŋa ba lala zaŋa,
yá ʋ yɩ wʋywanyiən* zənzən.
9 Ba-Yígúrə́-Jə-Tiu ziən ʋ pa lɩ̀à tə mama nə,
ʋ pubwanʋ tə ga wulə wiən tə mama yɩrɩ, ʋ nə fwa.
10 Ba-Yígúrə́-Jə-Tiu, wiən tə mama n nə fwa wá bʋ n nə,
n lɩ̀à tə nə yɩ pùə́ nədʋ tɩ̀án wá siən mʋ́.
11 Ba wá swɩ̀n n pàrɩ̀ tə nə jə dun nətʋ,
ba ga wá swɩ̀n n dɩ̀àn tə yoo,
12 sə ba ma pa ləzoni yəni n dɩ̀àn tʋ̀tʋ̀nán tə,
də n pàrɩ̀ tə dun tə nə jə fɩra nətʋ.
13 N pàrɩ̀ tə yɩ pàrɩ̀ kʋ nə wulə máŋá mama wuuu,
n payuu tə ga wulə máŋá də máŋá mama wuuu.
14 Ba-Yígúrə́-Jə-Tiu saŋa lɩ̀à tə mama nə, ba nə tʋa,
ʋ ga pìí ʋ kwànɩ́ lɩ̀à tə mama nə gori.
15 Lɩ̀à tə mama viviri ba yáá ba te n con də yala,
sə n pa ba wodiu máŋá tə wa ba nə pɩ̀à kʋ.
16 N mʋ̀ nə yàá súrí n jɩɩn,
n pa mɩɩ mama də́ wodiu kʋ sú.
17 Ba-Yígúrə́-Jə-Tiu yɩ cɩ́gá tíú ʋ coŋi tə mama wa,
ʋ ga yɩ wʋywanyiən ʋ tʋ̀tʋ̀nán tə mama wa.
18 Ba-Yígúrə́-Jə-Tiu bwə́lə́ də lɩ̀à tə mama,
ba nə boŋə ba kəni ʋ nə,
ʋ bwə́lə́ lɩ̀à tə mama yɩra,
ba nə boŋə ba kəni ʋ nə də cɩ́gá.
19 Ʋ yàá pa lɩ̀à tə nə dəri ʋ fən,
pubʋŋa yìə̀n jì.
Ʋ nə̀ń ba bubwiə, ʋ ga joŋə ba.
20 Ba-Yígúrə́-Jə-Tiu cɩ̀ lɩ̀à tə mama nə,
ba nə swə wá,
yá ʋ cʋ̀gà wʋlʋnyɩna tə mama.
21 À nii wá siən Ba-Yígúrə́-Jə-Tiu,
yá won tə mama nə siŋə wá bʋ ʋ yɩrɩ tə nə,
kʋ nə yɩ parɩ, máŋá də máŋá mama wuuu!