Pɩ̀ʋ́ yɩjʋnɩ
144
1 Davidə gwaran.
À bwɩ Ba-Yígúrə́-Jə-Tiu nə, ʋ nə yɩ à pɩ̀ʋ̀,
ʋ mʋ̀ nə kwè nə jaŋa,
ʋ ga bɩrɩ nə kʋ̀ʋ̀ tɛgʋ.
2 Ʋ mʋ̀ nə tʋŋa zəni à yɩra,
ʋ yɩ à dɩ̀àn dəkuu bwálɩ́,
ʋ yɩ yuu yikwala bwálɩ́, ʋ ga yɩ à jonu,
ʋ yɩ à natana, à nə kwálɩ́ à yuu ʋ con.
Ʋ mʋ̀ nə pɩn à lalʋʋ tə sɛ̀ à nii.
3 Ba-Yígúrə́-Jə-Tiu, ləzwənə yɩ bɛ̀ɛ̀,
n ma jələ wá?
Ləzoni bɩ̀á yɩ bɛ̀ɛ̀,
n ma bʋŋa ba yoo?
4 Ləzwənə yɩ ndə vʋʋ nə,
yá ʋ dɩan lʋʋ wa yɩ ndə yɩywara nə,
ka nə kɛ̀ń.
5 Ba-Yígúrə́-Jə-Tiu, guni n lanworu tə, n cú!
Dwen pɛɛn tə yɩra, sə tə kwé mən!
6 Pa dwà pɩpɩlɩ,
n ma laga à dʋŋa tə duən yáá nə.
Ta n cɩan tə,
n ma laga ba kwatara tə duən yáá nə.
7 Zɩgɩ lanworu tə wa, n te n jɩɩn, n jon nə.
Van nə n lɩ naluŋə wa,
jon nə dwíə́ nəkaran* jɩɩn wa.
8 Ba nii kʋ̀nɩ̀ kʋ̀nkʋ̀n,
ba jɩɩn ga tʋŋa gɩgɩrɩ yìə̀n.
9 Ooo à tíú Yɩɩ, à wá nun nundʋan,
à ma bʋ n nə,
à wá dɩ gwaran də bànʋ́,
kʋ nə jə ŋoni fugə, à ma siən mʋ́.
10 N mʋ̀ nə pɩn pɛ̀gá də́ dɩ̀àn,
n mʋ̀ nə joŋə n tʋtʋnʋ Davidə,
lagʋrɩ sɩ̀ʋ́ jɩɩn wa.
11 Jon nə,
van nə jon dwíə́ nəkaran jɩɩn wa.
Ba nii kʋ̀nɩ̀ kʋ̀nkʋ̀n,
ba jɩɩn ga tʋŋa gɩgɩrɩ yìə̀n.
12 Pa nə bibara ya ndə tɩ̀án nə,
ba bori zəni, ba zandʋan wa,
nə bwɩ̀ɩ́ ga ya bwankanɩ, q1 ndə wiən nə ba nə sə̀,
ba ma nàn padii!
13 Nə pulən súə́ tə pàlɩ̀ də wodirən yiri mama!
Nə vanmɩnɩ pùlì tə súrí mʋ̀rʋ̀ mʋ̀rʋ̀,
də mʋ̀rʋ̀ fugə fugə, nə kárɩ́ tə wa.
14 Nə nɩan tə jìgə̀ nəfaran,
bʋʋ kʋ́ʋ̀ tə̀lə́ nə biritaŋʋ tə wa,
yongaʋ vəlu kʋ́ʋ̀ tə̀lə́,
bubwiə kʋ́ʋ̀ tə̀lə́ nə tɩʋ tə kanporu wa!
15 Pupwən lɩ̀à nə yɩ lalʋʋ tə,
yìə̀n təntə mama nə wulə ba con!
Pupwən lɩ̀à nə yɩ lalʋʋ tə,
Ba-Yígúrə́-Jə-Tiu nə yɩ ba Yɩɩ!