Ba-Yígúrə́-Jə-Tiu, dàn ká bʋ̀rɩ̀ à bʋra
143
1 Davidə gwaran.
Ba-Yígúrə́-Jə-Tiu, cʋgʋ à yɩjʋnɩ tə,
guni n zɩɩn n cʋgʋ à lòrí tə!
Le nə, n nə yɩ pùə́ nədʋ tíú yɩrɩ,
n nə yɩ cɩ́gá tíú yɩrɩ.
2 Dàn ká bʋ̀rɩ̀ à mʋ̀ n tʋtʋnʋ tə bʋra,
cɩ́gá, ləzwənə tə̀lə́, ʋ nə yɩ cɩ́gá tíú n yáá con.
3 À dʋŋʋ dɩŋɩ à jə̀rə́ tə kwa,
ʋ dɩga nə tɩa, ʋ tɩtaga.
Ʋ pɩn à wulə yikunu wa,
ndə lɩ̀à tə nə, ba nə tɩga fuən mama.
4 À jɩ̀àn gwàrɩ̀,
à ga kʋ́ʋ̀ ba dɩ̀àn jə,
sə à tʋn won mama.
5 À pìí à lìí dɩan tə nə kɛ̀ń yoo,
à zəŋə n tʋ̀tʋ̀nán tə mama yuu wa,
à bʋŋa n jɩɩn tʋ̀tʋ̀nán tə yoo.
6 À te à jɩɩn n con,
à jə̀rə́ tə wulə n yáá con, ndə tɩkʋrʋ nə. Zɩgɩ sìí bwálɩ́
7 Bà le nə lala, Ba-Yígúrə́-Jə-Tiu!
À jɩ̀àn gwàrɩ̀ mɩ́ámɩ́án.
Dàn ká viviri n kwa n ma sà nə,
kʋ nə tà nətʋ, à wá jì ndə lɩ̀à tə nə,
ba nə kəni libəri wa.
8 Jɩjʋ mama, sə n pa à na n wʋywaŋʋ* tə.
Cɩ́gá, à n mʋ̀ yuu wa nə à jələ!
Pa à yəni cwəŋə tə à nə mɛ sə à tì.
Cɩ́gá, à viviri à yáá à te n con.
9 Jon nə à dʋŋa tə jɩɩn wa, Ba-Yígúrə́-Jə-Tiu!
N mʋ̀ con nə à səgə à tɩ̀àn.
10 Bɩrɩ nə, sə à tʋn n fɩra!
Cɩ́gá, n mʋ̀ nə yɩ à Yɩɩ.
Pa n Siŋu nəzəŋu tə ja nə,
kʋ va tɩa wa, ka nə mɛ duən!
11 Ba-Yígúrə́-Jə-Tiu, taa n tətə yɩrɩ,
n pa à mɩɩ ya lʋʋ wa.
Twá n cɩ́gá cwəŋə tə nə, n lɩ nə jɩgwarʋ wa.
12 N wʋywaŋʋ tə yɩrɩ, n wá pa à dʋŋa tə nyʋn lá,
yá n wá pa à jarɩduən tə mama tɩ ba zwɛ̀!
Cɩ́gá, à yɩ n tʋtʋnʋ.