Ba-Yígúrə́-Jə-Tiu yɩ yisəgə bwálɩ́
142
1 Davidə gwaran. Yɩjʋnɩ tə Davidə nə fwa máŋá tə wa, ʋ nə wulə paan bʋʋ wa.
2 À bubwi à kəni Ba-Yígúrə́-Jə-Tiu nə,
à bubwi à kəni Ba-Yígúrə́-Jə-Tiu nə,
à lòrì wá.
3 À tún à yojanʋ tə à bɩrɩ wá,
à swɩ̀n à jɩgwarʋ tə yoo ʋ con.
4 Máŋá tə à jɩ̀àn nə gwàrɩ̀,
n mʋ̀ yə̀ə́ bwálɩ́ tə à nə vəli.
Ba ken nyalɩ cwəŋə tə wa à nə vəli.
5 Ywàń jɩzən vàn yuu n jə́n:
Lìù mama kʋ́ʋ̀ yəri nə!
À kʋ́ʋ̀ ba yisəgə bwálɩ́ mama jə,
yá à mɩɩ tə yoo ba lìù mama jə!
6 À bubwi à kəni n mʋ̀ Ba-Yígúrə́-Jə-Tiu nə, à wʋ́:
«N mʋ̀ nə yɩ à yisəgə bwálɩ́,
n mʋ̀ nə yɩ à tori tɩa ka tə yuu wa,
ləzwənəŋə titəŋi wa.
7 Cʋgʋ à bubwiə tə zəni!
Cɩ́gá à dɩ̀àn zwɛ̀.
Jon nə lɩ̀à tə jɩɩn wa,
ba nə dɩŋɩ à kwa.
Cɩ́gá, ba dɩ̀àn dwə nə.
8 Pa sə à nan à bandiə tə wa,
sə à bʋ n yɩrɩ tə nə!
Cɩ́gá tɩ̀án wá bà ba kɩkarɩ nə,
máŋá tə wa, n nə wá tʋn zəni à yɩra.