Ba-Yígúrə́-Jə-Tiu, ywàń à nii sʋ̀ràn tə yuu nə
141
1 Davidə gwaran.
Ba-Yígúrə́-Jə-Tiu, à boŋə mʋ́,
bà à con lala!
Cʋgʋ à kori,
máŋá tə à nə boŋə à kəni n nə!
2 Pa à yɩjʋnɩ tə dɩ̀ kʋ yí mʋ́,
ndə wusənə nə, ba nə sʋ̀rɩ́,
sə à jɩ̀àn tə à nə zɩ̀n yɩɩ nə,
ya ndə zìlə́ won nə,
ba nə ma fwa didəni nii joŋi,
ba pa mʋ́!
3 Ba-Yígúrə́-Jə-Tiu, cɩ̀ à nii tə nə,
ywàń à nii sʋ̀ràn tə yuu!
4 Dàn ká pa à bɩcan guni
kʋ va yolwan con,
sə kʋ pa à twá lɩ̀à tə
nə tʋŋa yolwana nə,
à tʋn wʋlʋŋʋ tʋ̀tʋ̀nán.
Cɩ̀ à nə, à dàn ká tʋn ba fɩra yìə̀n tə!
5 Cɩ́gá tíú nə mà nə,
kʋ yɩ yuywaŋʋ kʋ pa nə,
ʋ nə caga à nii nə,
kʋ yɩ ndə nʋga nə,
ʋ nə lwá à yuu wa,
yá à bá vɩ kʋ nətʋ tə.
Yá à dàń nə wá jʋn Yɩɩ máŋá mama,
à zɩgɩ wʋlʋnyɩna tʋtʋnɛɛ tə mʋ̀ nə.
6 Pa ba yigu ba lɩ̀à tə nə bʋ̀rɩ̀ bʋra,
ba dɩ pɩ̀ʋ̀ yuu wa,
yá ba dàń wá cʋgʋ à sʋ̀ràn tə,
tə nə jə fɩra yɩrɩ.
7 Nə kurən laga duən wa, ciru* mimii nə,
ndə ba nə vàrɩ̀ tɩa,
ba tún lulwərən ka yuu wa.
8 À zɩ̀n à yáá à te n mʋ̀ Yuu-Tiu
Ba-Yígúrə́-Jə-Tiu con.
N mʋ̀ con nə à kwálɩ́ à yuu,
dàn ká yá n pa yoo yí nə!
9 Cɩ̀ à nə də nyalɩ tə ba nə ken,
sə ba ma ja nə,
də vɩnvan tə yolwafwana nə ken.
10 Pa wʋlʋnyɩna tʋ ba tətə gəgəlu tə wa,
sə à mʋ̀ ga jon à tɩ̀àn ba jɩɩn wa!