Lìù tə ba nə dí tɩjaŋa ʋ də̀ń nə, yɩjʋnɩ
140
1 Gwàgá yáá tíú gwaran. Davidə gwaran.
2 Ba-Yígúrə́-Jə-Tiu, jon nə ləzwənlwana jɩɩn wa!
Cɩ̀ à nə də lɩ̀à tə nə tʋŋa dɩ̀àn lɩ̀à yɩra!
3 Ba yɩ lɩ̀à tə ba nə bʋŋa lwanɩ ba bɩcanɩ wa,
ba ga zɩ̀n kʋ̀ʋ̀ dɩɩn mama!
4 Ba deri ba nandələ ndə dən nə,
ba nii ga jə cwan ndə dəkwaa nə. Zɩgɩ sìí bwálɩ́
5 Ba-Yígúrə́-Jə-Tiu, cɩ̀ à nə də wʋlʋnyɩna tə!
Cɩ̀ à nə də lɩ̀à tə nə tʋŋa dɩ̀àn lɩ̀à yɩra,
ba tanɩ sə ba pa à tʋ!
6 Fwìə́ lɩ̀à ken nyalɩ à yáá con,
ba ken ŋoni də gəgəlu sə ba ma ja nə.
Ba ken vɩnvan à cwəŋə wa. Zɩgɩ sìí bwálɩ́
7 À swɩ̀n Ba-Yígúrə́-Jə-Tiu con, à wʋ́: «N yɩ à Yɩɩ.
Ba-Yígúrə́-Jə-Tiu, cʋgʋ à lòrí tə, à nə lòrì pwəpwə!
8 Yuu-Tiu Ba-Yígúrə́-Jə-Tiu, dɩ̀àn tə nə joŋə nə,
n pwí à yuu nə kʋ̀ʋ̀ dɩɩn nə.
9 Ba-Yígúrə́-Jə-Tiu, dàn ká yá n pa wʋlʋnyiən fɩra nii sú.
Dàn ká yá n pa ʋ pubʋŋa yìə̀n nii sú,
kʋ nə tà nətʋ, ʋ wá zɩ̀n ʋ tɩ̀àn yɩɩ nə! Zɩgɩ sìí bwálɩ́
10 Pa lɩ̀à tə nə kɩkarɩ nə
nii sʋlwana tə pìí tə ja ba tətə!
11 Pa məncala lwá ba yuu wa!
Pa ba dɩlɩ ba mən wa,
bʋʋ wa kʋ də̀ń nə lu,
ba nə bá pìí ba nan kʋ wa!
12 Pa tɩjanyiən dàn ká ya lʋʋ nii tə wa,
n ga pa càn yí lìù tə nə tʋŋa dɩ̀àn lɩ̀à yɩra, máŋá mama.
13 À yə̀ə́ də Ba-Yígúrə́-Jə-Tiu wá bʋ̀rɩ̀ ʋ pa yinənyɩna nə,
ʋ ga tʋn kʋ tə nə yɩ mənəmənə zʋra yɩra.
14 Awoo, cɩ́gá tɩ̀án wá bʋ n yɩrɩ tə nə,
yá lɩ̀à tə nə yɩ mənəmənə wá ya n yáá con.