Ba-Yígúrə́-Jə-Tiu yə̀ə́ kʋ tə mama à nə yɩ
139
1 Gwàgá yáá tíú gwaran. Davidə gwaran.
Ba-Yígúrə́-Jə-Tiu, n zəən à bɩcan tə, n ga yə̀ə́ nə!
2 N mʋ̀ yə̀ə́ máŋá tə à nə jəni, də máŋá tə à nə zaŋa,
n nə wulə yiŋʋnɩ də, n tə yə̀ə́ à pubʋŋa!
3 N yə̀ə́ máŋá tə à nə vəli, də máŋá tə à nə pə̀ní,
n yə̀ə́ à napɩrɩ vəli mama nə yɩ nətʋ!
4 N mʋ̀ Ba-Yígúrə́-Jə-Tiu yàá dí yáá
n yə̀ə́ sʋgʋ tə, à nə wá swɩ̀n,
də kʋ tə wà à nii wa twi.
5 N wulə à kwa con, n wulə à yáá con,
n kɩkarɩ nə tɩa mama,
n jɩɩn tə ga fwa zəni à yɩra.
6 Nətʋ tə n nə yə̀ə́ nə yɩ yogwarʋ nəfarʋ kʋ pa nə,
kʋ ga dwə won tə mama à nə wàá kʋ də̀ń à nì.
7 Yə̀n nə à wá va, sə à ya yiŋʋnɩ də n Siŋu tə?
Yə̀n nə à wá dəri à va, à səgə yiŋʋnɩ, n yáá nə?
8 À nə dɩ̀gà baan lanworu tə wa, n wulə lá!
À nə vəli à tígə́ ciru* nə, nə̀ń n nə, n wulə lá!
9 À nə à twá tɩbɩlakʋnʋ nə,
à va à wulə mʋʋ kwa con,
10 lá də, n jɩɩn tə tə wá kə nə cwəŋə wa,
n jɩzən tə ga ja nə.
11 À nə swɩ̀n, à wʋ́: «Yikunu wàá à yuu nə kʋ pwí,
tɩtɩn yàá jì poni kʋ kɩkarɩ nə.
12 N mʋ̀ con nə, yikunu tətə tà yikunu,
tɩtɩn yàá pɩ̀rɩ̀ ndə tɩpʋrɩ nə,
yá yikunu yàá jì ndə poni nə.
13 N mʋ̀ nə dɩga nə,
n mʋ̀ nə ma nə à nuu pùə́ wa.
14 À bwɩ n nə, à nə yɩ yomɩlʋ n fwa yɩrɩ.
N tʋ̀tʋ̀nán tə yɩ yomɩlan,
yá à jə̀rə́ tə yə̀ə́ kʋ nətʋ tə zəni.
15 Máŋá tə n nə fwa nə, yisəgə bwálɩ́ tə wa,
à yɩra tə yà wà səgə n yáá nə, tɩa tə də̀ń nə.
16 Máŋá tə à yà nə yɩ won,
kʋ máŋá nə wàrɩ̀ kʋ maŋa, n yà na nə.
N yà dí yáá n pʋ́pʋ́nɩ́ n sagɩ tə wa,
dɩan tə mama n nə tanɩ, n pa nə,
də tə dɩɩn nədʋ tətə tə wà sinti.
17 À mʋ̀ con nə, à tíú Yɩɩ, n pubʋŋɩ tə də̀ń wàrɩ̀ tə lwarɩ,
yá tə ga dáá zənzən!
18 À nə gàlɩ̀ tə, tə dwə kasɩlʋ bɩ̀á.
À nə zàn dwiən nə, nə̀ń à nə, à tə wulə də mʋ́.
19 Ooo, à tíú Yɩɩ, də n yà nə sɛ̀, sə n gʋ wʋlʋnyɩna!
Á mʋ̀ lagʋra ba, á vələ yiŋʋnɩ, á yá nə!
20 N jarɩduən swɩ̀n n yoo ba ma gɩgarɩ lɩ̀à,
ba boŋə n yɩrɩ tə ba ma tʋŋa yolwana!
21 Ba-Yígúrə́-Jə-Tiu, kʋ wà mɛ sə à culi lɩ̀à tə nə culi mʋ́ naaa?
Kʋ wà mɛ sə à waa nan lɩ̀à tə nə zàn ba zɩga n nə naaa?
22 À culi ba cɩ́gá cɩ́gá,
ba jìgə̀ à də dʋŋa.
23 À tíú Yɩɩ, balɩ nə, n na à bɩcan tə!
Dídə́n nə, n lwarɩ à pubʋŋa!
24 Ywàń n jə́n, à nə wulə cwəŋə kʋkwɩʋn wa,
sə n kə nə cwəŋə tə wa, ka nə wulə máŋá mama wuuu!