À wá bʋ Ba-Yígúrə́-Jə-Tiu nə də à waa mama
138
1 Davidə gwaran.
Ba-Yígúrə́-Jə-Tiu, à bwɩ n nə də à waa mama.
À səni mʋ́ yɩa tə yáá con.
2 À tʋa à nadwana yuu,
à te à yáá n wúlú bwálɩ́ tə con,
à ma bwɩ n yɩrɩ tə nə,
n wʋywaŋʋ tə də n cɩ́gá tə yɩrɩ.
Cɩ́gá, n tʋn n nikanɩ tə, n pa kʋ nii sú,
kʋ pa n yɩrɩ nan,
kʋ doni nətʋ tə, à yà nə nì n yoo.
3 Dɩɩn tə nə, à nə bon à kə n nə, n le nə,
n pɩn nə wʋdɩʋ, yá à jə̀rə́ tə dɩ̀àn pìí tə súrí.
4 Tɩa yuu pɛ̀gá tə mama bwɩa n nə, Ba-Yígúrə́-Jə-Tiu!
Cɩ́gá, ba nì n nii sʋ̀ràn tə.
5 Ba bwɩa Ba-Yígúrə́-Jə-Tiu coŋi tə nə,
ba swɩ̀n ba wʋ́: «Ba-Yígúrə́-Jə-Tiu dun tə dáá!»
6 Də Ba-Yígúrə́-Jə-Tiu wulə yɩɩ nə tə mɛ,
ʋ na lìù tə nə muŋə ʋ tɩ̀àn,
yá ʋ zɩga yiŋʋna, ʋ ga yə̀ə́ fwìə́ lɩ̀à swɩ́án.
7 Máŋá tə à nə wulə jɩgwarʋ wa,
n yàá te n jɩɩn, n ma cɩ̀ à dʋŋa lɩŋa yáá nə,
yá n jɩzən vàn tə yàá jon nə,
n pa à mɩɩ ya lʋʋ wa.
8 Ba-Yígúrə́-Jə-Tiu nə wá fwa won mama,
ʋ pa kʋ nii sú, ʋ pa nə.
Ba-Yígúrə́-Jə-Tiu, n wʋywaŋʋ tə wulə máŋá mama wuuu!
Dàn ká dʋgʋ n jɩɩn tʋ̀tʋ̀nán tə!