Yɩɩ nii tə yosəgu də kʋ yomɩlʋ
119
1 Pupwən lɩ̀à nə yɩ lɩ̀à tə nə yɩ təgətəgə,ba ga twá kʋ tə nə Yɩɩ nə swə,
yá ba twá Ba-Yígúrə́-Jə-Tiu nii yìə̀n* tə nə.
2 Pupwən lɩ̀à nə yɩ lɩ̀à tə nə zìlí ʋ yìə̀n tə, ʋ nə tún sə ba twá tə nə,
ba ga pɩ̀à wá də ba waa mama!
3 Ba mʋ̀ lɩ̀à təntə ba yogugwələn tʋŋa,
ba yɩ ba twá ʋ coŋi tə nə.
4 N mʋ̀ nə tún yìə̀n tə, n nə pɩn nii tə yuu wa,
sə ba twá tə nə zəni zəni.
5 À swə sə à ja à tɩ̀àn zəni, à ma zìlí yìə̀n tə,
n nə pɩn tə pʋ́pʋ́nɩ́ tə tún, sə ba twá tə nə.
6 Yá cavɩra bá ja nə,
də à nə bʋ́n n yìə̀n tə mama yoo,
n nə pɩn nii tə yuu wa.
7 À wá kàrɩ̀ à tɩ̀àn də n cɩ́gá coŋi tə, n nə tún,
à ga bʋ n nə, də bɩcan kʋ nə yɩ mənəmənə.
8 À swə sə à zìlí n yìə̀n tə,
n nə pɩn tə pʋ́pʋ́nɩ́ tə tún, sə ba twá tə nə.
Dàn ká vɩ nə n dʋgʋ mɩ́ámɩ́án!
9 Nətə nə ləzwəndʋn wá fwa,
sə ʋ cwəŋə ma ya zəni?
Kʋ yɩ ʋ nə zìlí n sʋgʋ tə nii!
10 À pɩ̀à mʋ́ də à waa mama!
Dàn ká yá nə, sə à yori à yá n yìə̀n tə,
n nə pɩn nii tə yuu wa.
11 À cɩ̀gà n sʋgʋ tə à kə à bɩcan wa,
sə à dàn ká tʋn cʋna à zɩgɩ n nə.
12 Ba-Yígúrə́-Jə-Tiu, à bwɩ n nə!
Kàrɩ̀ nə n yìə̀n tə,
n nə pɩn tə pʋ́pʋ́nɩ́ tə tún, sə ba twá tə nə.
13 À nii yàá gàlà yìə̀n tə mama,
n nii nə bɩrɩ sə tə tʋn.
14 À jə pupwən, sə à ma twá n yìə̀n tə nə,
n nə pɩn nii, sə ba twá tə nə.
Ka yɩ ndə à jə lʋʋ jɩjə tə mama.
15 À pɩ̀à sə à bʋ́n n yìə̀n tə yuu wa,
n nə pɩn nii, sə ba twá tə nə,
à ga kə à yɩ́á n coŋi tə yuu wa.
16 À jwɛ n yìə̀n tə yɩrɩ,
n nə pɩn tə pʋ́pʋ́nɩ́ tə tún, sə ba twá tə nə,
à ga ba n sʋgʋ tə swɛ̀ɛ́.
17 Fwa zəni à mʋ̀ n tʋtʋnʋ tə yɩra, q1 sə à mɩɩ ya lʋʋ wa, à ga zìlí n sʋgʋ tə nii!
18 Súrí à yɩ́á, sə à balɩ
n nii yìə̀n tə yomɩlan tə.
19 À yɩ vee tɩa yuu wa,
dàn ká səgə nə n yìə̀n tə,
n nə pɩn nii tə yuu wa.
20 N yìə̀n tə n nə bɩrɩ sə tə tʋn,
jə fɩra tə pa à jə̀rə́ nə zənzən.
21 N fɩfaga jɩfʋa fwìə́ lɩ̀à nii nə,
zɩra nə wulə ba yuu wa,
ba nə jɛ́n ba va yiŋʋnɩ, ba yá n yìə̀n tə,
n nə pɩn nii tə yuu wa.
22 Jon nə cavɩra də fʋfʋlʋ jɩɩn wa,
Cɩ́gá, à zìlí n yìə̀n tə, n nə tún sə ba twá tə nə.
23 Pɛ̀gá nə swə ba jə̀ə́ ba swɩ̀n ba zɩga à nə,
à mʋ̀ n tʋtʋnʋ tə bʋŋa n yìə̀n tə yuu wa,
n nə pɩn tə pʋ́pʋ́nɩ́ tə tún, sə ba twá tə nə.
24 N yìə̀n tə, n nə tún sə ba twá tə nə,
jə fɩra tə pa nə, tə ga pɩn nə kwìə̀.
25 À wulə tɩa pùrú wa,
pa nə mɩɩ, ndə n sʋgʋ tə nə swɩ̀n nətʋ.
26 À man à napɩrɩ vəli nə yɩ nətʋ, à bɩrɩ mʋ́, yá n le nə.
Kàrɩ̀ nə n yìə̀n tə, n nə pɩn tə pʋ́pʋ́nɩ́ tə tún, sə ba twá tə nə!
27 Pa sə à yəni n yìə̀n tə,
n nə pɩn nii, sə ba twá tə nə, coŋi tə,
yá à wá bʋ́n n yomɩlan tə yuu wa.
28 Pucʋnɩ pɩn à jə̀rə́ tə yinɩa lwɛ́,
pìí n zɩ̀n nə yɩɩ nə, ndə n sʋgʋ tə nə swɩ̀n nətʋ.
29 Lɩ nə kʋ̀nkʋ̀n yìə̀n wa,
n ga fwa pubwanʋ à yɩra,
n pa à zìlí n nii yìə̀n tə.
30 À kúrí à tì sə à twá n cwəŋə tə, ka nə yɩ cɩ́gá,
à zìlí n yìə̀n tə, n nə bɩrɩ sə tə tʋn.
31 À vwə à tɩ̀àn n yìə̀n tə nə,
n nə tún sə ba twá tə nə,
Ba-Yígúrə́-Jə-Tiu, dàn ká pa cavɩra yí nə!
32 À wulə à dəri à twá n yìə̀n tə nə,
n nə pɩn nii tə yuu wa.
Cɩ́gá, n pɩn à bɩcan jə sìə́.
33 Ba-Yígúrə́-Jə-Tiu, kə nə cwəŋə tə wa,
ka nə yɩ n yìə̀n tə, n nə pɩn tə pʋ́pʋ́nɩ́ tə tún, sə ba twá tə nə,
yá à wá zìlí tə nii, à va à yí kʋ yígúrə́.
34 Pa nə pubʋŋa, sə à zìlí n nii yìə̀n tə,
yá à wá zəən tə, də à waa mama.
35 Kə nə cwəŋə tə wa, ka nə yɩ n yìə̀n tə,
n nə pɩn nii tə yuu wa!
Cɩ́gá, tə jə fɩra tə pa nə.
36 Guni à bɩcan n kə n yìə̀n tə con,
n nə tún sə ba twá tə nə,
sə à ga yá nywarɩ wiən pɛrʋ nə!
37 Vəvəri à yáá n kə kwa,
n yá wiən tə nə ba nywarɩ jə nə,
n ga pa à ya n cwəŋə tə wa.
38 Tʋn n nikanɩ tə, n nə kàn də lɩ̀à tə nə dəri n fən,
n pa kʋ nii sú, kʋ pa à mʋ̀ n tʋtʋnʋ tə nə.
39 Cɩ̀ à nə də cavɩra tə, à nə dəri tə fən.
Cɩ́gá, n yìə̀n tə n nə bɩrɩ sə tə tʋn, ziən.
40 Awoo, n yìə̀n tə n nə pɩn nii,
sə ba twá tə nə, jə fɩra tə pa nə.
À lòrì sə n pa à ya n cɩ́gá cwəŋə tə wa.
41 Ba-Yígúrə́-Jə-Tiu, fwa n wʋywaŋʋ tə à yɩra,
n ga jon nə, ndə n nə kàn nii nətʋ.
42 Yá à wá wànɩ́ à le lɩ̀à tə nə twɩn nə.
Cɩ́gá, à jələ n sʋgʋ tə yuu wa.
43 Dàn ká lɩ cɩ́gá sʋgʋ tə à nii wa.
Cɩ́gá, à ken à yala n bʋra tə nə.
44 À zìlí n nii yìə̀n tə,
máŋá də máŋá mama wuuu, kʋ nə ba zwɛ̀.
45 À wá va də bɩcan sìə́,
à nə pɩ̀à n yìə̀n tə,
n nə pɩn nii, sə ba twá tə nə yɩrɩ.
46 N yìə̀n tə, n nə tún sə ba twá tə nə,
à wá swɩ̀n tə yoo pɛ̀gá yáá con, yá cavɩra bá ja nə.
47 À fwa pupwən n yìə̀n tə yɩrɩ,
n nə pɩn nii tə yuu wa,
à ga swə tə zənzən.
48 À zɩ̀n à jɩɩn à te n yìə̀n tə con,
n nə pɩn nii tə yuu wa.
À swə tə, à ga wá bʋ́n n yìə̀n tə yuu wa,
n nə pɩn tə pʋ́pʋ́nɩ́ tə tún, sə ba twá tə nə.
49 Lìí sʋgʋ tə yoo n nə swɩ̀n n tʋtʋnʋ tə con,
kʋ nə pɩn à jə yala.
50 Kʋ daŋa à jɩɩn à yinəgə máŋá wa.
Cɩ́gá, n nikanɩ tə pɩn nə mɩɩ.
51 Fwìə́ lɩ̀à fʋfʋlɩ nə zənzən,
yá à wà yori à yá n nii yìə̀n tə.
52 Ba-Yígúrə́-Jə-Tiu, à lìí n nə bʋ̀rɩ̀ bʋra nətʋ fuən nə,
yá kʋ daŋa à jɩɩn.
53 Lɩŋa yàá jə nə wʋlʋnyɩna tə yɩrɩ,
ba nə vɩ n nii yìə̀n tə.
54 N yìə̀n tə n nə pɩn tə pʋ́pʋ́nɩ́ tə tún,
sə ba twá tə nə, yɩ à gwaran, dìə̀ tə wa, à nə yɩ vee.
55 Ba-Yígúrə́-Jə-Tiu, tɩtɩn nə à yàá lìí n yɩrɩ tə,
à ga zìlí n nii yìə̀n tə.
56 À nyiən nə yɩ, sə à zìlí n yìə̀n tə,
n nə pɩn nii, sə ba twá tə nə.
57 Ba-Yígúrə́-Jə-Tiu, à swɩ̀n də à tori nə yɩ,
sə à zìlí n sʋ̀ràn tə.
58 À lòrì mʋ́ də à waa mama,
sə fwa pubwanʋ à yɩra, ndə n nə kàn nii nətʋ!
59 À bʋ́n à napɩrɩ vəli tə yuu wa,
yá à wá pìí à twá n yìə̀n tə nə,
n nə tún sə ba twá tə nə.
60 À ba pɩ̀à sə kʋ dán,
à bɩbarɩ sə à zìlí n yìə̀n tə,
n nə pɩn nii tə yuu wa.
61 Wʋlʋnyɩna ken nyala ba kɩkarɩ nə,
yá à ba n nii yìə̀n tə yoo swɛ̀ɛ́.
62 À yàá zàn tɩtɩkwɩʋn nə, à bʋ n nə,
yìə̀n tə n nə bɩrɩ sə tə tʋn, nə tì cɩ́gá cwəŋə yɩrɩ.
63 À yɩ lɩ̀à tə mama nə dəri n fən,
də ba tə nə zìlí n yìə̀n tə,
n nə pɩn nii, sə ba twá tə nə, twadon.
64 Ba-Yígúrə́-Jə-Tiu, tɩa yuu súə́ də n wʋnywaŋʋ tə.
Kàrɩ̀ nə də n yìə̀n tə,
n nə pɩn tə pʋ́pʋ́nɩ́ tə tún, sə ba twá tə nə.
65 Ba-Yígúrə́-Jə-Tiu, n fwa zəni à mʋ̀ n tʋtʋnʋ tə yɩra,
ndə n sʋgʋ tə nə swɩ̀n nətʋ.
66 Kàrɩ̀ nə, sə à ja pubʋnzəŋu də yənu!
Cɩ́gá, à ken à waa n yìə̀n tə nə,
n nə pɩn nii tə yuu wa.
67 Máŋá tə fʋfʋlʋ yà nə wà nə yí, à yà jɛ́n,
yá sɩ́ʋ́n nə, à dàń zìlí n sʋgʋ tə nii.
68 N ziən, n ga fwa zəni.
Kàrɩ̀ nə də n yìə̀n tə,
n nə pɩn tə pʋ́pʋ́nɩ́ tə tún, sə ba twá tə nə.
69 Fwìə́ lɩ̀à ja kʋ̀nkʋ̀n ba ma cʋ̀gʋ̀ à yɩrɩ,
yá à ga zìlí n yìə̀n tə,
n nə pɩn nii, sə ba twá tə nə, də à waa mama.
70 Ba ba pɩ̀à sə ba yəni yoo mama ba bɩcanɩ wa,
yá à mʋ̀ fwa pupwən n nii yìə̀n tə yɩrɩ.
71 Kʋ ziən, ba nə fʋfʋlɩ nə,
sə kʋ pa à lwarɩ n yìə̀n tə,
n nə pɩn tə pʋ́pʋ́nɩ́ tə tún, sə ba twá tə nə.
72 N nii yìə̀n tə jə nywarɩ tə pa nə,
kʋ doni sɩ́án də wárʋ́ wiən mʋ̀rʋ̀.
73 N ma nə də n jɩ̀àn, n pa à jə dɩ̀àn!
Pa nə pubʋŋa, sə à ma kàrɩ̀ n yìə̀n tə,
n nə pɩn nii tə yuu wa!
74 Lɩ̀à tə nə dəri n fən na nə, ba ga jwɛ.
Cɩ́gá, à ken à yala n sʋgʋ tə nə.
75 Ba-Yígúrə́-Jə-Tiu, à yə̀ə́ də n bʋ̀rɩ̀ bʋra,
n pɩn ka twá cɩ́gá cwəŋə nə,
yá n jə cɩ́gá də n nə pɩn ba fʋfʋlɩ nə.
76 Pa n wʋywaŋʋ tə dàn à jɩɩn,
ndə n nə kàn nii də à mʋ̀ n tʋtʋnʋ tə nətʋ.
77 Dəri à yinəgə, yá à mɩɩ wá ya lʋʋ wa.
Cɩ́gá, n nii yìə̀n tə pɩn à na ywánɩ́.
78 Cavɩra wá yí fwìə́ lɩ̀à tə nə kʋ̀nɩ̀ kʋ̀nkʋ̀n ba kəni à nii nə.
À mʋ̀ bʋŋa n yìə̀n tə yuu wa, n nə pɩn nii, sə ba twá tə nə.
79 Lɩ̀à tə ba nə dəri n fən, bɩ̀án à con,
ba mʋ̀ lɩ̀à tə nə yə̀ə́ n yìə̀n tə, n nə tún sə tə tʋn.
80 À swə sə à bɩcan ya təgətəgə n yìə̀n tə wa,
n nə pɩn tə pʋ́pʋ́nɩ́ tə tún, sə ba twá tə nə,
sə cavɩra dàn ká yí nə.
81 À jə̀rə́ tə ken ka kajaŋa mama, ka ma pɩ̀à n sáŋʋ́,
à ken à yala n sʋgʋ tə nə.
82 À ywàń, à yɩ́á lee, à ma pɩ̀à n nikanɩ tə,
yá à bwe, à wʋ́:
«Máŋá kwà wa nə n wá dàn à jɩ̀àn?»
83 À yɩ ndə púrí nə, ba nə goli ŋwɩn wa,
yá à tə ba n yìə̀n tə, n nə pɩn tə pʋ́pʋ́nɩ́ tə tún,
sə ba twá tə nə, swɛ̀ɛ́.
84 À mʋ̀ n tʋtʋnʋ dɩan wá ya bagalɩ?
Dɩɩn kwà nə nə n wá bʋ̀rɩ̀ lɩ̀à tə nə fɩfɩn nə bʋra?
85 Fwìə́ lɩ̀à kʋa zanba gwàlán à nɛɛ də̀ń,
kʋ ga yɩ yoo kʋ nə zɩga Yɩɩ nii tə nə.
86 N yìə̀n tə mama, n nə pɩn nii tə yuu wa, yɩ cɩ́gá.
Ba fɩfɩn nə kʋ̀nkʋ̀n yìə̀n yɩrɩ! San nə!
87 Kʋ yà ga mancɩn, də ba pɩn à nɛɛ nyʋn tɩa,
yá à mʋ̀ wà n yìə̀n tə n nə pɩn nii,
sə ba twá tə nə, vɩ à dʋgʋ.
88 Pa nə mɩɩ, kʋ twá n wʋnywaŋʋ tə nə,
yá à wá zìlí n yìə̀n tə, n nə tún sə tə tʋn.
89 Ba-Yígúrə́-Jə-Tiu, n sʋgʋ tə wulə
lanworu tə wa, máŋá mama wuuu!
90 N yɩ pùə́ nədʋ tíú, máŋá də máŋá mama wuuu.
N dɩga tɩa tə dəkuu, ka ga jə dɩ̀àn.
91 Won mama wulə, ndə n nə pɩn nii sə kʋ ya lá nətʋ.
Cɩ́gá, wiən tə mɛ lʋʋ wa, yɩ n tʋ̀tʋ̀nà.
92 N nii yìə̀n tə nə pɩn à jwɛ yà nə tə̀lə́,
yinəgə yà wá gʋ nə.
93 À bá swɛ̀ɛ́ n yìə̀n tə,
n nə pɩn nii sə ba twá tə nə, abada.
Cɩ́gá, n twá tə nə n pa nə mɩɩ.
94 À yɩ n mʋ̀ nə tɩ, jon nə.
Cɩ́gá, à pɩ̀à n yìə̀n tə,
n nə pɩn nii, sə ba twá tə nə.
95 Wʋlʋnyɩna zɩga à nə, sə ba pa à nɛɛ nyʋn tɩa,
à mʋ̀ cʋga n yìə̀n tə zəni, n nə tún sə tə tʋn.
96 À nɩ də wozəŋu mama jə yígúrə́,
yá n yìə̀n tə n nə pɩn nii sə tə tʋn, ba yígúrə́ jə.
97 À swə n nii yìə̀n tə zənzən!
À bʋŋa tə yoo dɩɩn mama.
98 N yìə̀n tə n nə pɩn nii sə tə tʋn,
pɩn à jì wʋbʋnyiən, à doni à dʋŋa,
tə nə wulə də nə, máŋá mama wuuu yɩrɩ.
99 À jə wʋbʋŋa, à doni à karnyɩna ba mama,
à nə bʋŋa n yìə̀n tə yuu wa, n nə tún sə tə tʋn yɩrɩ.
100 À yə̀ə́ yoo də̀ń, à doni nəkwɩna,
à nə zìlí n yìə̀n tə n nə pɩn nii, sə ba twá tə nə yɩrɩ.
101 À vɩga sə à tì lwanɩ cwəŋə mama,
sə à wànɩ́ à zìlí n sʋgʋ tə nii.
102 À ba yori à yá n yìə̀n tə, n nə bɩrɩ sə tə tʋn.
Cɩ́gá, kʋ yɩ n mʋ̀ nə kàrɩ̀ nə.
103 N nikanɩ tə ywán à nipaa wa,
kʋ doni tʋ̀ràn, à nii wa.
104 N yìə̀n tə n nə pɩn nii, sə ba twá tə nə, pɩn à jə pubʋŋa,
yá kʋ nətʋ pɩn à culi kʋ̀nkʋ̀n yoo mama.
105 N sʋgʋ tə yɩ ndə cànʋ́ nə, kʋ nə pɩrɩ à nɛɛ,
kʋ ga yɩ poni à cwəŋə yuu.
106 À dùə̀ də à wá zìlí n cɩ́gá cwəŋə yìə̀n tə,
n nə bɩrɩ sə tə tʋn,
yá à wá pa à nikanɩ tə nii sú.
107 Ba fʋfʋlɩ nə zənzən!
Ba-Yígúrə́-Jə-Tiu, pa nə mɩɩ,
ndə n sʋgʋ tə nə swɩ̀n nətʋ.
108 Ba-Yígúrə́-Jə-Tiu, pa sə à yɩjʋnɩ tə,
à nə jʋnɩ mʋ́, ja fɩra n yáá con.
Kàrɩ̀ nə n yìə̀n tə, n nə bɩrɩ sə tə tʋn.
109 À mɩɩ wulə tɩan jɩɩn wa máŋá mama,
yá də kʋ mɛ, à ba n nii yìə̀n tə swɛ̀ɛ́.
110 Wʋlʋnyɩna ken nyalɩ sə kʋ ja nə,
yá də kʋ mɛ, à wà yori à yá n yìə̀n tə,
n nə pɩn nii sə ba twá tə nə.
111 N yìə̀n tə n nə tún sə tə tʋn
yɩ à mʋ̀ tori máŋá mama wuuu.
Cɩ́gá, tə kəni pupwən à bɩcan wa.
112 À kəni kajaŋa à tʋŋa n yìə̀n tə,
n nə pɩn tə pʋ́pʋ́nɩ́ tə tún, sə ba twá tə nə.
Tə mʋ̀ nə yɩ à ŋwɩ́rán, dɩɩn mama.
113 À culi pwìí bələ tɩ̀án,
yá à swə n nii yìə̀n tə mʋ̀.
114 N mʋ̀ nə yɩ à yisəgə bwálɩ́, n ga yɩ à natana.
À ken à yala n sʋgʋ tə nə.
115 Yolwafana-ba, á vələ kwa, á yá nə,
sə à zìlí à tíú Yɩɩ yìə̀n tə,
ʋ nə pɩn nii tə yuu wa!
116 San nə, ndə n nə kàn nii nətʋ,
yá à mɩɩ wá ya lʋʋ wa.
Dàn ká pa cavɩra yí nə, à yala tə yɩrɩ.
117 San nə, sə n jon nə,
yá máŋá mama, à wá bʋ́n n yìə̀n tə yoo,
n nə pɩn tə pʋ́pʋ́nɩ́ tə tún, sə ba twá tə nə.
118 N yigu lɩ̀à tə mama n kə kwa,
ba nə ba n yìə̀n tə nə twá,
n nə pɩn tə pʋ́pʋ́nɩ́ tə tún, sə ba twá tə nə.
Cɩ́gá, ba gɩgɩra tə yɩ tʋtʋ.
119 N yàá pa wʋlʋnyɩna nɛɛ nyʋn tɩa, ndə ywərən nə.
Kʋ mʋ̀ nə pɩn à swə n yìə̀n tə, n nə tún sə tə tʋn.
120 N fən jə nə, kʋ pa à yɩra vɩvaga,
yá nətʋ tə n nə bʋ̀rɩ̀ bʋra tə pɩn fən jə.
121 À tʋŋa kʋ tə nə yɩ mənəmənə, kʋ ga tì cɩ́gá cwəŋə!
Dàn ká vɩ nə n dʋgʋ lɩ̀à tə jɩɩn wa, ba nə fɩfɩn nə.
122 Kàn nii n pa à mʋ̀ n tʋtʋnʋ tə nə,
də à wá də́ ywánɩ́.
Dàn ká yá sə fwìə́ lɩ̀à fɩfɩn nə.
123 À ywàń, à yɩ́á lee, à ma pɩ̀à n sáŋʋ́,
də n cɩ́gá cwəŋə tə, n nə kàn ka nikanɩ də nə.
124 Tʋn n wʋywaŋʋ tə, à mʋ̀ n tʋtʋnʋ tə yɩra,
n ga kàrɩ̀ nə n yìə̀n tə,
n nə pɩn tə pʋ́pʋ́nɩ́ tə tún, sə ba twá tə nə!
125 À yɩ n tʋtʋnʋ! Pa nə pubʋŋa,
sə à yəni n yìə̀n tə, n nə tún sə tə tʋn!
126 Ba-Yígúrə́-Jə-Tiu, máŋá yí sə n tʋn!
Ba cʋ̀gʋ̀ n nii yìə̀n tə.
127 Kʋ mʋ̀ nə pɩn à swə n yìə̀n tə,
n nə pɩn nii tə yuu wa,
à doni sɩ́án, sɩ́án tə nə ba durən jə.
128 Kʋ mʋ̀ nə pɩn, à jələ n yìə̀n tə mama, n nə pɩn nii,
sə ba twá tə nə, də tə yɩ mənəmənə.
À culi kʋ̀nkʋ̀n yoo mama.
129 N yìə̀n tə n nə tún sə tə tʋn, jə fɩra,
kʋ mʋ̀ nə pɩn à jə̀rə́ zìlí tə nii.
130 Lìù nə nì n sʋgʋ tə də̀ń,
kʋ yàá pɩrɩ wá də poni,
kʋ ga pɩn lɩ̀à tə nə yɩ bʋ̀àbʋ̀à, cɩ̀ ba tɩ̀àn nə.
131 À súrí à nii à sìrì,
n yìə̀n tə n nə pɩn nii tə yuu wa, fɩra nə jə nə yɩrɩ.
132 Vəvəri n yáá n kə à con, n ga fwa pubwanʋ à yɩra,
ndə n nə yàá fwa kʋ nətʋ lɩ̀à tə yɩra, ba nə swə n yɩrɩ tə.
133 Pa sə n nikanɩ tə dàn à nɛɛ,
dàn ká yá n pa yolwan mama də́ dɩ̀àn à yuu wa.
134 Jon nə lɩ̀à tə jɩɩn wa, ba nə fɩfɩn nə,
sə à zìlí n yìə̀n tə n nə pɩn nii, sə ba twá tə nə.
135 Pa n yáá poli à mʋ̀ n tʋtʋnʋ tə yuu wa,
n ga kàrɩ̀ nə də n yìə̀n tə,
n nə pɩn tə pʋ́pʋ́nɩ́ tə tún, sə ba twá tə nə.
136 À yɩ́á pàlɩ̀ də yinɩa,
ba nə ba n nii yìə̀n tə zìlí yɩrɩ.
137 Ba-Yígúrə́-Jə-Tiu, n yɩ cɩ́gá tíú,
n ga bʋ̀rɩ̀ bʋra mənəmənə.
138 N yìə̀n tə n nə tún sə tə tʋn, twá cɩ́gá cwəŋə nə,
tə ga bɩrɩ də n yɩ pùə́ nədʋ tíú cɩ́gá cɩ́gá.
139 À yawala tə pɩn à yɩra wiri,
máŋá tə à jarɩduən tə nə swɛ̀ɛ́ n sʋ̀ràn tə.
140 À mɩ̀àn n nikanɩ tə zəni, à na kʋ cɩ́gá,
yá à mʋ̀ n tʋtʋnʋ tə swə kʋ.
141 À yɩ bisɩmaa, ba ba nə jələ,
yá à wà n yìə̀n tə swɛ̀ɛ́,
n nə pɩn nii sə ba twá tə nə.
142 N cɩ́gá cwəŋə tə wulə máŋá mama wuuu,
n nii yìə̀n tə ga yɩ cɩ́gá.
143 Jɩgwarʋ də pucʋnɩ jə nə,
yá n yìə̀n tə n nə pɩn nii tə yuu wa, pɩn nə pupwən.
144 N yìə̀n tə n nə tún sə tə tʋn,
yɩ cɩ́gá cwəŋə máŋá mama wuuu!
Pa à lwarɩ tə də̀ń, yá à mɩɩ wá ya lʋʋ wa!
145 À boŋə à kəni n nə, də à waa mama!
Le nə, Ba-Yígúrə́-Jə-Tiu, sə à zìlí n yìə̀n tə,
n nə pɩn tə pʋ́pʋ́nɩ́ tə tún, sə ba twá tə nə!
146 À boŋə à kəni n nə, jon nə,
sə à zìlí n yìə̀n tə, n nə tún sə tə tʋn!
147 À yàá zàn də tɩbɩlakʋnʋ wà yí, à bubwi à kəni n nə,
à ga kə à yala n sʋgʋ tə nə.
148 À yàá súrí à yɩ́á də tɩa tə wà pʋrɩ,
sə à bʋ́n n nikanɩ tə yuu wa.
149 Taa n wʋywaŋʋ tə yɩrɩ, n cʋgʋ à kori!
Ba-Yígúrə́-Jə-Tiu, pa nə mɩɩ,
kʋ twá n yìə̀n tə nə, n nə bɩrɩ sə tə tʋn!
150 Lɩ̀à tə nə cʋ̀gà culən nəfaran bwə́lə́ də nə,
yá ba ŋʋ́ná də n nii yìə̀n tə.
151 N mʋ̀ Ba-Yígúrə́-Jə-Tiu bwə́lə́!
N yìə̀n tə mama n nə pɩn nii tə yuu wa, yɩ cɩ́gá.
152 Fuən mama, à yəni də n yìə̀n tə n nə tún sə tə tʋn,
yɩ n tún sə tə ya lá, máŋá mama wuuu.
153 Ywàń à yinəgə tə, n ga jon nə!
Cɩ́gá, à ba n nii yìə̀n tə swɛ̀ɛ́.
154 Jon à yoo n zɩn, n ga jon nə,
n pa nə mɩɩ, ndə n nə kàn nii nətʋ!
155 Sáŋʋ́ ŋʋ́ná də wʋlʋnyɩna,
ba nə wà n yìə̀n tə n nə pɩn tə pʋ́pʋ́nɩ́ tə tún,
sə ba twá tə nə, twarɩ yɩrɩ.
156 Ba-Yígúrə́-Jə-Tiu, n dəri lɩ̀à yinəgə zənzən!
Pa nə mɩɩ, kʋ twá də n yìə̀n tə, n nə bɩrɩ sə tə tʋn!
157 Lɩ̀à tə nə fɩfɩn nə, də à jarɩduən dáá,
yá à wà yori à yá n yìə̀n tə, n nə tún sə tə tʋn.
158 À nɩ pwìí bələ tɩ̀án, à waa ga nan ba.
Cɩ́gá, ba wà n nikanɩ tə zìlí.
159 Ywàń nətʋ tə, à nə swə n yìə̀n tə, n nə bɩrɩ sə tə tʋn!
Ba-Yígúrə́-Jə-Tiu, taa n wʋywaŋʋ tə yɩrɩ, n pa nə mɩɩ!
160 N sʋgʋ dəkuu yɩ cɩ́gá cɩcɩ,
yá n cɩ́gá cwəŋə yoo mama, n nə bɩrɩ sə kʋ tʋn,
wulə máŋá mama wuuu.
161 Pɛ̀gá fɩfɩn nə tʋtʋ,
yá à bɩcan ba vɩvaga,
də kʋ nə tà n sʋgʋ tə yɩrɩ.
162 N nikanɩ tə pɩn à jwɛ,
ndə lìù nə ta jɩjə nəfarʋ ʋ jon.
163 À culi kʋ̀nkʋ̀n, à waa nan kʋ,
yá à swə n nii yìə̀n tə mʋ̀.
164 À jʋnɩ mʋ́ nɛɛ barpɛ, dɩɩn mama,
n cɩ́gá cwəŋə yìə̀n tə yɩrɩ, n nə bɩrɩ sə tə tʋn.
165 Bɩcan sìə́ wulə zənzən,
tə pa lɩ̀à tə nə, ba nə swə n nii yìə̀n tə,
yá yoo mama ba ba yáá nə cɩ̀.
166 Ba-Yígúrə́-Jə-Tiu, à jə sáŋʋ́ yala n con,
yá à dàń zìlí n yìə̀n tə, n nə pɩn nii tə yuu wa.
167 À jə̀rə́ zìlí n yìə̀n tə, n nə tún sə tə tʋn,
à ga swə tə zənzən.
168 À zìlí n yìə̀n tə, n nə pɩn nii sə ba twá tə nə,
də n yìə̀n tə n nə tún sə tə tʋn.
Cɩ́gá, n na à napɩrɩ vəli tə mama!
169 Ba-Yígúrə́-Jə-Tiu, pa à bubwiə tə dɩ̀ ka yí n con!
Pa sə à yəni yoo də̀ń, ndə n sʋgʋ tə nə swɩ̀n nətʋ!
170 Pa sə à lòrì tə yí n con,
n ga jon nə, ndə n nə kàn nii nətʋ!
171 À nii wá bʋ n nə!
Cɩ́gá, n kàrɩ̀ nə n yìə̀n tə,
n nə pɩn tə pʋ́pʋ́nɩ́ tə tún, sə ba twá tə nə.
172 À nəndəli wá dɩ gwaran, kʋ ma bʋ n nikanɩ tə nə!
Cɩ́gá, n yìə̀n tə mama n nə pɩn nii tə yuu wa, yɩ cɩ́gá cwəŋə!
173 Te n jɩɩn, n ma san nə,
à nə kúrí à tì sə à zìlí n yìə̀n tə,
n nə pɩn nii, sə ba twá tə nə yɩrɩ!
174 Ba-Yígúrə́-Jə-Tiu, à sìrì, à ma pɩ̀à n sáŋʋ́,
yá n nii yìə̀n tə pɩn nə pupwən!
175 Pa mɩɩ à jə̀rə́ tə nə, sə ka bʋ n nə,
n ga pa n yìə̀n tə, n nə pɩn nii tə yuu wa, san nə.
176 À yɩ à ywaŋa, ndə piə nə jɛ́n!
Bà n twarɩ à mʋ̀ n tʋtʋnʋ tə!
Cɩ́gá, à wà n yìə̀n tə swɛ̀ɛ́, n nə pɩn nii sə tə tʋn!