À wulə sə à man kʋ tə Ba-Yígúrə́-Jə-Tiu nə tʋn
118
1 Á bwɩa Ba-Yígúrə́-Jə-Tiu nə, cɩ́gá, ʋ ziən,ʋ wʋywaŋʋ* tə ga wulə máŋá mama wuuu!
2 Yɩzərayɛlə lɩ̀à-ba, á swɩan, á wʋ́:
«Ʋ wʋywaŋʋ tə wulə máŋá mama wuuu!»
3 Aron dìə̀ lɩ̀à-ba, á swɩan, á wʋ́:
«Ʋ wʋywaŋʋ tə wulə máŋá mama wuuu!»
4 Á mʋ̀ lɩ̀à tə nə dəri Ba-Yígúrə́-Jə-Tiu fən, á swɩan, á wʋ́:
«Ʋ wʋywaŋʋ tə wulə máŋá mama wuuu!»
5 À bon à kə Ba-Yígúrə́-Jə-Tiu nə, à jɩgwarʋ máŋá wa,
yá Ba-Yígúrə́-Jə-Tiu le nə, ʋ ga jon nə ʋ dʋgʋ.
6 Ba-Yígúrə́-Jə-Tiu wulə də nə,
à ba won mama fən dəri.
Bɛ̀ɛ̀ nə ləzoni wàá nə ba fwa?
7 Ba-Yígúrə́-Jə-Tiu wulə də nə, ʋ saŋa nə,
yá à wá ja wʋdɩʋ, à ma jəri lɩ̀à tə nə culi nə.
8 Lìù nə səgə Ba-Yígúrə́-Jə-Tiu con,
kʋ́kwà ʋ nə jələ ləzoni yuu wa!
9 Lìù nə səgə Ba-Yígúrə́-Jə-Tiu con,
kʋ́kwà ʋ nə jələ ləzwənfaran yuu wa!
10 Dwíə́ nəkaran* tə mama yà kɩkarɩ nə,
yá à cʋ̀gʋ̀ ba, də Ba-Yígúrə́-Jə-Tiu yɩrɩ tə.
11 Ba yà kɩkarɩ nə, ba kə ba titəŋi wa,
yá à cʋ̀gʋ̀ ba, də Ba-Yígúrə́-Jə-Tiu yɩrɩ tə.
12 Ba yà kɩkarɩ nə, ndə twɩɩn nə,
yá ba nyʋan lá, ndə casʋran mən nə dəŋi.
À cʋ̀gʋ̀ ba, də Ba-Yígúrə́-Jə-Tiu yɩrɩ tə.
13 N yà yigu nə də dɩ̀àn, sə n dɩ,
yá Ba-Yígúrə́-Jə-Tiu san nə.
14 Ba-Yígúrə́-Jə-Tiu yɩ à dɩ̀àn, də à nuŋə!
Ʋ mʋ̀ nə joŋə nə!
15 Pupwən də dɩ̀àn diŋə cə̀rí súə́
cɩ́gá tɩ̀án tə gansilə wa, ba swɩ̀n, ba wʋ́:
«Ba-Yígúrə́-Jə-Tiu jɩzən vàn tə dí dɩ̀àn!
16 Ba-Yígúrə́-Jə-Tiu zɩ̀n ʋ jɩzən vàn tə yɩɩ nə.
Ba-Yígúrə́-Jə-Tiu jɩzən vàn tə dí dɩ̀àn!»
17 À bá tɩ, à wá ya lʋʋ wa,
à man Ba-Yígúrə́-Jə-Tiu tʋ̀tʋ̀nán tə à bɩrɩ.
18 Cɩ́gá, Ba-Yígúrə́-Jə-Tiu van à zɩɩn nə,
yá ʋ wà nə tɩan jɩɩn wa ken.
19 Á súrə́ cɩ́gá cwəŋə mimien á pa nə,
à wá zʋ ka wa, à bʋ Ba-Yígúrə́-Jə-Tiu nə.
20 Mimii təntə nə vəli Ba-Yígúrə́-Jə-Tiu con:
Mə lá nə cɩ́gá tɩ̀án twá ba zwɩ!
21 À bwɩ n nə, n nə le nə,
n ga jon nə yɩrɩ.
22 Kapan tə, də̀lwə̀rə́ tə yà nə vɩga ba dʋgʋ vàn nə,
nə pìí kʋ jì dìə̀ nigwancɩɩn wárɩ́, kʋ yoo nə cà.
23 Kʋ nətʋ tə yɩ kʋ nan Ba-Yígúrə́-Jə-Tiu con:
Kʋ yɩ yomɩlʋ nə yɩ́á wa.
24 Kʋ yɩ dɩɩn tə Ba-Yígúrə́-Jə-Tiu nə fwa:
Nə jwɩa, nə ga fwa pupwən!
25 Ba-Yígúrə́-Jə-Tiu, nə lòrì sə n jon nəba!
Ba-Yígúrə́-Jə-Tiu, nə lòrì sə n pa nə də́ dɩ̀àn!
26 Yɩɩ wá fwa zəni lìù tə yɩra,
ʋ nə bɩ̀àn Ba-Yígúrə́-Jə-Tiu yɩrɩ yuu wa!
Nə zɩga Ba-Yígúrə́-Jə-Tiu dìə̀ tə wa,
nə lòrì sə Yɩɩ fwa zəni á yɩra.
27 Ba-Yígúrə́-Jə-Tiu yɩ Yɩɩ, ʋ pɩ̀rɩ̀ nəba də poni.
Á pwíə́ duən kwa də tɩ̀án vʋran á jɩɩn wa,
kʋ va kʋ yí Yɩɩ joŋi bwálɩ́ tə nyʋran nə.
28 N mʋ̀ nə yɩ à tíú Yɩɩ, yá à wá bʋ n nə!
À tíú Yɩɩ, à wá siən mʋ́!
29 Á bwɩa Ba-Yígúrə́-Jə-Tiu nə, cɩ́gá, ʋ ziən,
ʋ wʋywaŋʋ tə ga wulə máŋá mama wuuu!