Yɩɩ cɩcɩ nə mɛ də dun!
115
1 Ba-Yígúrə́-Jə-Tiu, kʋ tà nə mʋ̀,kʋ tà nə mʋ̀ nə mɛ də dun,
kʋ yɩ n mʋ̀ nə mɛ də dun,
n wʋywaŋʋ* tə də n cɩ́gá tə yɩrɩ!
2 Bɛ̀ɛ̀ nə pɩn dwíə́ nəkaran* tə ma bwe, ba wʋ́:
«Ba Yɩɩ tə wulə yə̀n nə?»
3 Nə tíú Yɩɩ wulə Yɩɩ sàń nə,
ʋ ga tʋŋa kʋ tə mama ʋ nə swə.
4 Ba woŋwanan tə yɩ wárʋ́,
nə à yə̀ə́ sɩ́án nə ba ma fwa tə,
tə yɩ ləzoni jɩɩn tʋtʋŋɩ.
5 Tə jə nii, yá tə wàrɩ̀ tə swɩ̀n,
tə jə yɩ́á, yá tə ba là na,
6 tə jə zɩan, yá tə ba nə̀ń,
tə jə mɩɩ, yá tə ba lwán nə̀ń,
7 tə jə jɩ̀àn, yá tə wàrɩ̀ won yɩra tə dwen,
tə jə nɛɛ, yá tə wàrɩ̀ tə vəli,
sʋgʋ nədʋ tətə wàrɩ̀ tə nii wa, kʋ naŋa!
8 Lɩ̀à tə nə fwa tə, də ba tə mama
nə jələ tə yuu wa, wá jì ndə tə nə!
9 Yɩzərayɛlə lɩ̀à-ba, á kənə á waa Ba-Yígúrə́-Jə-Tiu nə,
ʋ mʋ̀ nə yɩ á sáŋʋ́, də á natana!
10 Aron dìə̀ lɩ̀à-ba, á kənə á waa Ba-Yígúrə́-Jə-Tiu nə,
ʋ mʋ̀ nə yɩ á sáŋʋ́, də á natana!
11 Á mʋ̀ lɩ̀à tə nə dəri Ba-Yígúrə́-Jə-Tiu fən,
á kənə á waa Ba-Yígúrə́-Jə-Tiu nə,
ʋ mʋ̀ nə yɩ á sáŋʋ́, də á natana!
12 Ba-Yígúrə́-Jə-Tiu lìí nə yoo,
ʋ wá fwa zəni nə yɩra.
Ʋ wá fwa zəni Yɩzərayɛlə dwíə́ tə yɩra,
ʋ wá fwa zəni Aron dìə̀ lɩ̀à tə yɩra,
13 ʋ wá fwa zəni lɩ̀à tə yɩra,
ba nə dəri Ba-Yígúrə́-Jə-Tiu fən,
bìsɩ́ná də nəkwɩna mɛ.
14 Ba-Yígúrə́-Jə-Tiu wá pa á dwíí púlí,
ʋ ga pa á mʋ̀ də á bɩ̀á yìə̀n ja yáá!
15 Ba-Yígúrə́-Jə-Tiu wá fwa zəni á yɩra,
ʋ mʋ̀ nə fwa lanworu də tɩa!
16 Lanworu tə yɩ Ba-Yígúrə́-Jə-Tiu nə tɩ,
yá tɩa tə yɩ ʋ pɩn ləzoni nə.
17 Kʋ tà tɩga nə bwɩ Ba-Yígúrə́-Jə-Tiu nə,
kʋ tà lɩ̀à tə nə zʋa bwálɩ́ wa, kʋ nə yɩ səgisəgi.
18 Yá kʋ dàń nə yɩ nə mʋ̀,
nə mʋ̀ nə bwɩ Ba-Yígúrə́-Jə-Tiu nə,
kʋ nə mɛ zə̀n, kʋ ja vələ máŋá mama wuuu.
Á bwɩa Ba-Yígúrə́-Jə-Tiu nə!