Lìù tə Yɩɩ nə jon tɩan jɩɩn wa yɩjʋnɩ
116
1 À swə Ba-Yígúrə́-Jə-Tiu,cɩ́gá, ʋ nə̀ń à kori, də à nə bon à kə ʋ nə.
2 Ʋ guni ʋ zɩɩn ʋ kə à con,
yá à wá bon à kə ʋ nə, à lʋʋ wúlú mama wa.
3 Tɩan jɩɩn yà zʋa nə tə zwɛ̀,
ciru* ŋoni yà vwə nə,
à ga wulə jɩgwarʋ də pucʋnɩ wa.
4 Yá à bon à kə Ba-Yígúrə́-Jə-Tiu yɩrɩ tə nə, à wʋ́:
«À lòrì mʋ́ Ba-Yígúrə́-Jə-Tiu, jon à mɩɩ tə n kə lʋʋ wa!»
5 Ba-Yígúrə́-Jə-Tiu yɩ pubwanʋ də cɩ́gá tíú,
nə tíú Yɩɩ tə dəri lɩ̀à yinəgə.
6 Ba-Yígúrə́-Jə-Tiu ywàŋá lalaŋa yuu nə.
À dɩ̀àn yà zwɛ̀ mɩ́ámɩ́án, yá ʋ jon nə.
7 À jə̀rə́, pìí n ya sìə́ wa!
Cɩ́gá, Ba-Yígúrə́-Jə-Tiu tʋn zəni n yɩra.
8 N jon à jə̀rə́ tə tɩan jɩɩn wa,
n mʋ̀rɩ́ à yinɩa,
n ga cɩ̀ à nə, à wà twɩ.
9 À wá va Ba-Yígúrə́-Jə-Tiu yáá con,
tɩa ka tə yuu wa, ləzwənəŋə titəŋi wa.
10 À ken à waa Yɩɩ nə,
máŋá tə wa à nə swɩ̀n, à wʋ́:
«À mʋ̀ yɩ yinənyiən cɩ́gá cɩ́gá!»
11 À yà viviə à ga swɩ̀n, à wʋ́:
«Ləzoni tə mama yɩ kʋ̀nkʋ̀na.»
12 Bɛ̀ɛ̀ nə à wá pa Ba-Yígúrə́-Jə-Tiu nə,
zəni tə mama yɩrɩ, ʋ nə tʋn à yɩra?
13 À wá zɩ̀n wùrú zʋŋa yɩɩ nə,
à ma kə Ba-Yígúrə́-Jə-Tiu lɛ̀ɛ̀,
ʋ nə jon nə yɩrɩ,
yá à wá bon à kə ʋ yɩrɩ tə nə.
14 À wá tʋn kʋ tə à nə kàn nii də Ba-Yígúrə́-Jə-Tiu,
à pa kʋ nii sú, ʋ lalʋʋ tə mama yáá con.
15 Kʋ jə bwàná kʋ pa Ba-Yígúrə́-Jə-Tiu nə,
də ʋ lɩ̀à tə nə yɩ pùə́ nədʋ tɩ̀án nə tɩ.
16 À lòrì mʋ́ Ba-Yígúrə́-Jə-Tiu, à yɩ n tʋtʋnʋ,
à yɩ n tʋtʋnʋ n tʋtʋnkan nə lɩrɩ!
N kʋ̀rɩ̀ nə à ŋoni tə wa.
17 À wá fwa jwii kənu joŋi*, à pa mʋ́,
à ga wá bon à kə Ba-Yígúrə́-Jə-Tiu yɩrɩ tə nə.
18 À wá tʋn kʋ tə à nə kàn nii də Ba-Yígúrə́-Jə-Tiu,
à pa kʋ nii sú, ʋ lalʋʋ tə mama yáá con,
19 Ba-Yígúrə́-Jə-Tiu dìə̀ dəwoo tə wa,
n mʋ̀ Zwerizalɛmə titəŋi wa!
Á bwɩa Ba-Yígúrə́-Jə-Tiu nə!