Ba-Yígúrə́-Jə-Tiu yɩ pɩ̀ʋ́, ʋ cɩcɩ ga nə yɩ Yɩɩ
99
1 Ba-Yígúrə́-Jə-Tiu yɩ pɩ̀ʋ́, dwíə́ tə vɩvaga.Ʋ jə̀ə́ Yɩɩ sàń wonəŋə* yuu, tɩa ga vɩvaga.
2 Ba-Yígúrə́-Jə-Tiu nə wulə tə mɛ yuu wa, Siyon wa,
ʋ ga wulə dwíə́ tə mama yuu wa.
3 Ba bwɩa n yɩrɩ tə nə,
n mʋ̀ Yɩɩ nə wulə tə mɛ yuu wa,
n ga ba kamandon jə.
Cɩ́gá, n yɩ parɩ!
4 Ba bwɩa n dɩ̀àn tə nə,
n mʋ̀ pɩ̀ʋ́ tə n nə swə kʋ tə nə yɩ mənəmənə.
N mʋ̀ nə tún nətʋ nə nə mɛ sə nə ya də duən.
N mʋ̀ nə tún cɩ́gá cwəŋə,
də kʋ tə nə yɩ mənəmənə, Yɩzərayɛlə wa.
5 Á bwɩa Ba-Yígúrə́-Jə-Tiu nə,
ʋ nə yɩ nə tíú Yɩɩ.
Á twɩa á nadwana yuu, á pa wá dun,
ʋ naa tuŋu bwálɩ́ tə yáá con!
Ʋ yɩ parɩ!
6 Moyizə də Aron yà wulə ʋ joŋwana tə wa,
yá Samiyɛlə də yà wulə lɩ̀à tə wa,
ba nə boŋə ba kəni ʋ yɩrɩ tə nə.
Ba bon ba kə Ba-Yígúrə́-Jə-Tiu nə,
yá ʋ le ba.
7 Ʋ yà wulə bakwan kuli wa, ʋ ma swɩ̀n ba con.
Ba zìlí ʋ yìə̀n tə ʋ nə pɩn nii tə yuu wa,
sə ba twá tə nə, də nii tə ʋ nə pɩn ba.
8 Ba-Yígúrə́-Jə-Tiu n nə yɩ nə tíú Yɩɩ,
n tətə nə yàá le ba.
N yɩn Yɩɩ tə n nə jɩn pɩ́nʋ́ də ba,
yá n yàá kə ba càn wa, ba cʋna tə yɩrɩ.
9 Á zɩan Ba-Yígúrə́-Jə-Tiu, nə tíú Yɩɩ yuu yɩɩ nə.
Á twɩa á nadwana yuu, á pa wá dun,
ʋ paan tə yáá con, ka nə yɩ parɩ!
Cɩ́gá, Ba-Yígúrə́-Jə-Tiu, nə tíú Yɩɩ yɩ parɩ.