Á maga jɩ̀àn á pa Ba-Yígúrə́-Jə-Tiu nə
98
1 Gwaran.
Á nuŋə nundʋan,
á ma bʋ Ba-Yígúrə́-Jə-Tiu nə,
cɩ́gá, ʋ tʋn yomɩlan.
Ʋ jɩzən tə də ʋ vàn tə kʋ nə yɩ parɩ,
pɩn ʋ də́ dɩ̀àn.
2 Ba-Yígúrə́-Jə-Tiu pɩn ba yəni də ʋ yɩ jonu,
ʋ pɩn dwíə́ nəkaran* tə lwarɩ ʋ cɩ́gá cwəŋə tə.
3 Ʋ lìí ʋ wʋywaŋʋ* tə yoo,
ʋ nə jə ʋ pa Yɩzərayɛlə lɩ̀à nə,
də nətʋ ʋ nə yɩ pùə́ nədʋ tíú də ba.
Lʋʋ yígúrə́ bwálɩ́ mama nɩ də
nə tíú Yɩɩ tə dí dɩ̀àn.
4 Tɩa yuu ləzoni-ba, á mama maga
pupwən cə̀rí Ba-Yígúrə́-Jə-Tiu yuu nə.
Á maga jɩpwələ,
á ga dɩ gwaran á ma siən wá!
5 Á dwiə bànʋ́ á ma siən Ba-Yígúrə́-Jə-Tiu!
Á sənə wá də bànʋ́ də gwaran!
6 Á wurə nabwanan də nabwanvunu,
á maga pupwən cə̀rí
Ba-Yígúrə́-Jə-Tiu yuu nə, ʋ nə yɩ pɩ̀ʋ́!
7 Mʋʋ tə mɛ sə kʋ baa,
də kʋ wa wiən tə mama,
sə lʋʋ tə də baa, də kʋ wa lɩ̀à tə!
8 Mʋnɛɛ tə maga jɩ̀àn,
sə tə də pɛɛn kə duən,
tə cə̀rí də pupwən,
9 Ba-Yígúrə́-Jə-Tiu yáá con.
Cɩ́gá, ʋ bɩ̀àn!
Ʋ bɩ̀àn sə ʋ bʋ̀rɩ̀ tɩa tə bʋra.
Ʋ wá bʋ̀rɩ̀ lʋʋ tə bʋra,
kʋ twá cɩ́gá cwəŋə nə,
ʋ ga bʋ̀rɩ̀ dwíə́ nəkaran tə bʋra,
ʋ pa ka ya mənəmənə.