Ba-Yígúrə́-Jə-Tiu yɩ pɩ̀ʋ́, pupwən wulə bwálɩ́ mama wa
97
1 Ba-Yígúrə́-Jə-Tiu yɩ pɩ̀ʋ́, tɩa tə mama wá jwɛ,mʋʋ titəŋi lʋʋ níə́ kapʋpʋ wá fwa pupwən!
2 Bakwan də yikunu kɩkarɩ wá.
Kʋ tə nə yɩ cɩ́gá cwəŋə,
də kʋ tə nə yɩ mənəmənə nə yɩ ʋ pàrɩ̀ tə dəkuu.
3 Mən wulə ʋ yáá,
tə də́ ʋ dʋŋa tə bwálɩ́ mama wa.
4 Ʋ pɩpɩlʋ tə pɩ̀rɩ̀ lʋʋ tə mama,
tɩa tə nɩ tə, ka ga vɩvaga.
5 Pɛɛn tə nyɩnɩ ndə tʋ̀ràn maʋ nə,
Ba-Yígúrə́-Jə-Tiu yáá con,
Yuu-Tiu yáá con, ʋ nə tɩ tɩa tə mama.
6 Lanworu tə swɩ̀n ʋ cɩ́gá cwəŋə tə yoo kʋ bɩrɩ,
yá dwíə́ tə mama na ʋ dun tə.
7 Cavɩra wá yí lɩ̀à tə mama nə jʋnɩ woŋwanan,
ba ga fwa fwìə́ də kʋ̀nkʋ̀n yɩa.
Yɩa tə mama twɩ ʋ yáá con, tə pɩn wá dun.
8 Siyon tɩ̀án nì kʋ ba ga fwa pupwən.
Zwida tɩan tə làrɩ̀,
n mʋ̀ Ba-Yígúrə́-Jə-Tiu bʋra tə yɩrɩ!
9 Cɩ́gá, n mʋ̀ Ba-Yígúrə́-Jə-Tiu nə yɩ Baan Yɩɩ,
tɩa tə mama yuu wa.
N mʋ̀ nə dwə yɩa tə mama.
10 Á mʋ̀ lɩ̀à tə nə swə Ba-Yígúrə́-Jə-Tiu,
á mɛ sə á culi yolwan.
Ʋ mʋ̀ nə cɩ̀ ʋ lɩ̀à tə nə zìlí ʋ nii mɩɩ nə,
ʋ joŋə ba wʋlʋnyɩna jɩɩn wa.
11 Poni yàá pɩ̀rɩ̀ kʋ pa cɩ́gá tíú nə,
pupwən ga yɩ lìù tə
ʋ bɩcan nə yɩ mənəmənə nyiən.
12 Á mʋ̀ cɩ́gá tɩ̀án ba,
á jwɩ̀á Ba-Yígúrə́-Jə-Tiu yɩrɩ.
Á bwɩa ʋ yɩrɩ nə, cɩ́gá, ʋ yɩ parɩ.