Á nuŋə nundʋan á ma bʋ Ba-Yígúrə́-Jə-Tiu nə
96
1 Á nuŋə nundʋan á ma bʋ Ba-Yígúrə́-Jə-Tiu nə.Tɩa yuu ləzoni-ba, á mama nuŋə q1 á ma bʋ Ba-Yígúrə́-Jə-Tiu nə!
2 Á nuŋə á ma pa dun Ba-Yígúrə́-Jə-Tiu nə,
á bwɩa ʋ yɩrɩ tə nə.
Dɩɩn mama, á swɩ̀án á bɩrɩ də ʋ yɩ jonu.
3 Á swɩ̀án ʋ dun tə yoo á bɩrɩ dwíə́ nəkaran* tə nə,
á ga man ʋ yomɩlan tə, á bɩrɩ dwíə́ tə mama nə.
4 Cɩ́gá, Ba-Yígúrə́-Jə-Tiu wulə tə mɛ yuu wa,
yá ʋ mɛ də bʋra.
Ʋ mɛ sə ba dəri ʋ fən,
ba doni yɩa tə duən tə mama.
5 Cɩ́gá, dwíə́ nəkaran tə yɩa tə mama yɩ kʋ̀nkʋ̀n yɩa,
yá Ba-Yígúrə́-Jə-Tiu nə fwa lanworu.
6 Pàrɩ̀ də dun wulə ʋ yáá con.
Dɩ̀àn də dun súə́ ʋ wúlú bwálɩ́ tə.
7 Dwíə́ tə mama lʋʋ wa,
á pɩan dun Ba-Yígúrə́-Jə-Tiu nə.
Á swɩ̀án ʋ dun tə də ʋ dɩ̀àn tə yoo á bɩrɩ.
8 Á pɩan dun Ba-Yígúrə́-Jə-Tiu nə!
Á jana á pupwən jwəŋə á bà,
á zʋ ʋ dəwoo tə wa.
9 Á twɩa á nadwana yuu ʋ yáá con,
á pa wá dun,
máŋá tə wa ʋ nə bɩrɩ ʋ dun tə.
Á á vɩvaga ʋ yáá con,
á mʋ̀ lʋʋ ləzoni tə mama!
10 Á swɩ̀án dwíə́ nəkaran tə titəŋi wa,
də Ba-Yígúrə́-Jə-Tiu nə yɩ pɩ̀ʋ́.
Tɩa tə jə dɩ̀àn, ka ba sʋsʋga.
Ʋ bʋrɩ dwíə́ nəkaran tə bʋra, kʋ twá cɩ́gá nə.
11 Lanworu tə fwàá pupwən,
sə tɩa tə ga jwɛ!
Mʋʋ tə pupwin, də kʋ wa wiən tə mama!
12 Kasɔɔ tə làrɩ̀, də kʋ wa wiən tə mama!
Pún tɩ̀án tə mama maga jɩpwələ,
13 Ba-Yígúrə́-Jə-Tiu yáá con.
Cɩ́gá, ʋ bɩ̀àn.
Cɩ́gá, ʋ bɩ̀àn sə ʋ bʋ̀rɩ̀ tɩa tə bʋra.
Ʋ wá bʋ̀rɩ̀ lʋʋ tə bʋra,
kʋ twá cɩ́gá cwəŋə nə,
ʋ ga bʋ̀rɩ̀ dwíə́ tə bʋra,
ʋ nə yɩ pùə́ nədʋ tíú yɩrɩ.