Nə vələ Yɩɩ yáá con
95
1 Á bɩ̀àn nə mà jɩpwələ nə pa Ba-Yígúrə́-Jə-Tiu nə!Nə maga pupwən cə̀rí pɩ̀ʋ̀ tə yuu nə, kʋ nə jon nəba!
2 Nə vələ ʋ yáá con, nə kə ʋ lɛ̀ɛ̀,
nə baga gwaran nə ma cə̀rí ʋ yuu nə.
3 Cɩ́gá, Ba-Yígúrə́-Jə-Tiu yɩ Yɩɩ nəfarʋ,
ʋ yɩ pɩ̀ʋ́ nəfarʋ, ʋ wulə yɩa tə mama yuu wa.
4 Ʋ jə tɩa tə də̀ń ʋ jɩɩn wa,
pɛɛn tə yupara ga yɩ ʋ mʋ̀ nə tɩ.
5 Mʋʋ tə yɩ ʋ mʋ̀ nə tɩ, ʋ mʋ̀ nə fwa kʋ,
kʋ súrí tɩa tə nə, ʋ nə ma də ʋ jɩ̀àn.
6 Á bɩ̀àn nə kwá tɩa,
nə tòlì tɩa, nə tʋ nə nadwana yuu,
Ba-Yígúrə́-Jə-Tiu yáá con, ʋ nə fwa nəba, nə pa wá dun.
7 Cɩ́gá, ʋ yɩ nə Yɩɩ,
nə ga yɩ lɩ̀à tə ʋ nə kəni cwəŋə nə, ndə pee nə.
Zə̀n kʋ tə, də á nə nì ʋ kori,
8 á dànà ká tʋn zɩbaniu,
ndə á nɩbara-ba nə fwa nətʋ
Meribaa nə, Masab dɩɩn tə nə,
kasɔɔ lanworu tə wa.
9 Ba pɩ̀à à nii nə kʋ bwálɩ́ tə wa, ba dídə́n nə,
ba ga yɩ lɩ̀à tə ba nə dí yáá ba na kʋ tə à nə tʋn.
10 À waa nan dwíí təntə bɩna sapwɩlə.
Yá à swɩ̀n, à wʋ́: «Lalʋʋ kʋ tə yuu tə̀lə́!
Ba yəri à coŋi tə à nə tún.»
11 À lɩŋa dàń zàn, à ga dù à wʋ́:
«Ba bá zʋ à sìə́ bwálɩ́ tə wa!»