Yɩɩ yàá fwi ʋ lɩŋa kʋkʋn yɩrɩ
94
1 Ba-Yígúrə́-Jə-Tiu, Yɩɩ tə nə fwi lɩŋa!Yɩɩ tə nə fwi lɩŋa, bà nan n bɩrɩ n dun tə!
2 Yɩɩ tə nə bʋ̀rɩ̀ lʋʋ bʋra, zàn yɩɩ nə,
n ŋwɩ́n fwìə́ lɩ̀à tə ndə kʋ nə mɛ də ba nətʋ!
3 Ba-Yígúrə́-Jə-Tiu, wʋlʋnyɩna wá ya yáá, kʋ dán kʋ mɛ nətə?
Ba wá jwɛ kʋ dán kʋ mɛ nətə?
4 Ba yàá fwa fwiə,
ba swɩ̀n ləyiri sʋ̀ràn.
Ba mʋ̀ yolwafwana tə mama yàá zɩ̀n ba tɩ̀àn yɩɩ nə.
5 Ba-Yígúrə́-Jə-Tiu, ba yàá tɩtaga n lɩ̀à tə,
ba ga fɩfɩn lɩ̀à tə nə yɩ n mʋ̀ nə tɩ.
6 Ba gwɩ kadənu də lìù tə nə twá ʋ jə̀ə́,
ba ga lɩ bitara mɩɩ.
7 Ba yàá swɩ̀n, ba wʋ́:
«Ba-Yígúrə́-Jə-Tiu ba yoo mama na,
Zwakɔbə Yɩɩ tə ba yoo mama jələ!
8 Á zurə á yɩra ləyirən ba,
ləbənən ba, máŋá kwà wa nə á wá ja pubʋŋa?
9 Ʋ mʋ̀ Yɩɩ tə nə fwa zɩɩn,
ʋ ba yoo nə̀ń naaa?
Ʋ mʋ̀ Yɩɩ tə ʋ nə fwa yii,
ʋ ba lá na naaa?
10 Ʋ mʋ̀ Yɩɩ tə ʋ nə kəni dwíə́ nəkaran* tə cwəŋə wa,
ʋ wàrɩ̀ ba nii nə ʋ càgà naaa?
Ʋ mʋ̀ Yɩɩ nə pɩn yənu ləzwənə nə.
11 Ba-Yígúrə́-Jə-Tiu yə̀ə́ ləzwənə pubʋŋa yìə̀n,
ʋ ga yə̀ə́ də tə yɩ tʋtʋ.
12 Ba-Yígúrə́-Jə-Tiu, pupwən lìù nə yɩ lìù tə
n nə kəni cwəŋə wa,
n ga twá n nii yìə̀n* tə nə, n ma kàrɩ̀ wá,
13 sə ʋ wànɩ́ ʋ ya sìə́ wa càn dɩɩn nə,
sə ba ga kʋ̀ wʋlʋnyɩna mʋ̀ bʋʋ.
14 Cɩ́gá, Ba-Yígúrə́-Jə-Tiu ba ʋ lɩ̀à tə vɩ,
ʋ ba lɩ̀à tə ʋ nə tɩ vɩ ʋ dʋga.
15 Cɩ́gá, bʋra wá pìí ka twá cɩ́gá cwəŋə nə,
yá lɩ̀à tə mama ba bɩcanɩ nə yɩ mənəmənə wá twá ka nə.
16 Wàà nə wá zɩgɩ à jɩrɩmʋ wʋlʋnyɩna yáá con?
Wàà nə wá san nə ʋ zɩgɩ yolwafwana ba tə nə?
17 Ba-Yígúrə́-Jə-Tiu yà nə wà nə san,
sɩ́ʋ́n nə də à yà wulə bwálɩ́ tə wa kʋ nə yɩ səgisəgi.
18 Máŋá tə à nə swɩ̀n, à wʋ́:
«À wá sɩrɩ à tʋ»,
n wʋywaŋʋ* tə yàá ya à yiziə bwálɩ́, Ba-Yígúrə́-Jə-Tiu!
19 Máŋá tə à bɩcan nə súə́ də twara,
n yàá dàn à jɩɩn, n ga pa à jə̀rə́ tə jwɛ.
20 N də lɩ̀à tə nə bʋ̀rɩ̀ kʋkʋn bʋra,
ba ga túŋə́ coŋi ba ma gwɩ lɩ̀à,
wá kə nii nədʋ naaa?
21 Ba yàá kə nimarʋ, ba zɩga cɩ́gá tíú nə,
ba ga pɩn bʋra janɩ lìù tə nə wà yoo cʋ̀gʋ̀!
22 Yá Ba-Yígúrə́-Jə-Tiu yɩ à dɩ̀àn dəkuu bwálɩ́.
À tíú Yɩɩ yɩ ndə à pɩ̀ʋ̀ kòlú nə,
à nə zwɩ à kwálɩ́ à yuu kʋ wa!
23 Ʋ yàá pa ba yolwan tə pìí kʋ tʋ ba yuu wa.
Ʋ yàá pa ba wʋlʋŋʋ tə pìí kʋ cʋ̀gʋ̀ ba tətə.
Ba-Yígúrə́-Jə-Tiu ʋ nə yɩ nə Yɩɩ tə wá pa ba nyʋn lá.