Kʋ ziən sə ba bʋ Ba-Yígúrə́-Jə-Tiu nə
92
1 Gwaran. Sìə́ dɩɩn* nuŋə.
2 Kʋ ziən sə ba bʋ Ba-Yígúrə́-Jə-Tiu nə,
ba ga dɩ gwaran ba ma siən n mʋ̀ Baan Yɩɩ!
3 Jɩjʋ nə, ba mɛ sə ba bòrì n wʋywaŋʋ tə yoo ba bɩrɩ,
ba ga swɩ̀n də n yɩ pùə́ nədʋ tíú tɩtɩn nə,
4 də banan ba nə san də ŋoni fugə,
də kwànán kwərə.
5 Ba-Yígúrə́-Jə-Tiu, à jwɛ kʋ tə yɩrɩ n nə tʋn!
À cə̀rí də pupwən n tʋ̀tʋ̀nán tə yɩrɩ.
6 Ba-Yígúrə́-Jə-Tiu, n tʋ̀tʋ̀nán tə yɩ nəfaran,
n pubʋŋɩ tə də̀ń ga lu!
7 Ləyiru yəri won mama,
ləbibənu ga ba won mama lwarɩ.
8 Wʋlʋnyɩna yàá twè ndə gaʋ nə,
yolwafwana ga nə̀ń ba nywánɩ́,
yá ba wá cʋ̀gʋ̀, ba nyʋn lá mɩ́ámɩ́án.
9 Yá n mʋ̀ Ba-Yígúrə́-Jə-Tiu wulə won mama yuu wa,
máŋá mama wuuu!
10 Cɩ́gá, nə̀ń n dʋŋa tə Ba-Yígúrə́-Jə-Tiu,
n dʋŋa tə wá tɩ,
yá yolwafwana tə mama wá laga duən yáá nə.
11 N pɩn nə dɩ̀àn ndə ganaʋ dɩ̀àn nə,
n ga twɛ́n nʋga ka lwán nə ywán à yuu wa.
12 À yɩ́á na à jarɩduən tə,
à zɩan ga nə̀ń ba tə kori,
ba nə zɩga à nə, də wʋlʋŋʋ.
13 Cɩ́gá tíú yàá twà ndə kʋra nə,
ʋ ga bori ndə Liban lʋʋ nii sɩsaban tɩ̀ʋ́ nə.
14 Ʋ yɩ ndə tɩ̀ʋ́ nə,
ba nə cwɛn Ba-Yígúrə́-Jə-Tiu dəwoo wa,
ʋ ga bori nə tíú Yɩɩ wúlú bwálɩ́ tə wa.
15 Kʋ nə swə kʋ kwɩn, kʋ tə yàá zɩn lənə.
Kʋ tə yàá nəŋə, kʋ vʋran ga yɩ vʋlɩran.
16 Kʋ nətʋ bɩrɩ də Ba-Yígúrə́-Jə-Tiu yɩ cɩ́gá tíú,
ʋ ga yɩ à pɩ̀ʋ̀ bʋʋ, kʋkʋn yoo tə̀lə́ ʋ con.