Yɩɩ yɩ yisəgə bwálɩ́
91
1 Lìù nə wulə Baan Yɩɩ vàn də̀ń nə,kʋ tíú yɩ Yɩɩ tə nə wulə tə mɛ yuu wa nə ywàŋá ʋ yuu nə.
2 Ʋ yàá swɩ̀n Ba-Yígúrə́-Jə-Tiu con, ʋ wʋ́:
«N yɩ à yisəgə bwálɩ́, n ga cɩ̀ à nə,
n yɩ à Yɩɩ tə, à nə jələ n yuu wa!»
3 Kʋ yɩ ʋ mʋ̀ nə wá jon mʋ́
vɩvan tə wa, ba nə ken n yáá con,
də yayɩpwarʋ tə kʋ nə gwɩ jɩɩn wa.
4 Ʋ wá pú n yuu nə də ʋ vànà tə,
n ga wá na yisəgə bwálɩ́ ʋ con.
Ʋ nə yɩ pùə́ nədʋ tíú tə cɩ̀ n nə, ndə nàtànà nə.
5 N bá dəri tɩtɩn bɩcapuri,
nə à yə̀ə́ cɩɩn tə ba nə ta yɩcaʋ wa,
6 nə à yə̀ə́ tɩan yayɩpwarʋ tə kʋ nə wulə yikunu wa,
nə à yə̀ə́ càn tə nə cʋ̀gà lɩ̀à yɩcaʋ wa.
7 Lɩ̀à mʋ̀rʋ̀ nə tʋa ba tɩ n səpuni nə,
ba lɩ̀à mʋ̀rʋ̀ fugə ga tʋ ba tɩ n jɩzən vàn yuu,
yolwan mama bá yí mʋ́.
8 Ywàń də n yɩ́á cɩcɩ, yá n wá na nətʋ
Yɩɩ nə ŋwɩ́n wʋlʋnyɩna.
9 Cɩ́gá, n mʋ̀ Ba-Yígúrə́-Jə-Tiu nə yɩ à yisəgə bwálɩ́!
N nə ja Baan Yɩɩ n ma fwa n yisəgə bwálɩ́,
10 yolwan mama bá yí mʋ́,
càn mama bá bólí n dìə̀ yɩra.
11 Cɩ́gá, ʋ wá pa nii sə ʋ malɩkɛ
tə ywàń n yuu nə,
bwálɩ́ tə mama wa n nə wá va.
12 Malɩkɛ tə wá zɩn mʋ́ tə jɩɩn wa,
sə n naa dàn ká mà kapan nə.
13 N wá nɩŋa gəru,
nə à yə̀ə́ dəkwaa,
N wá nɩŋa gəbala, nə à yə̀ə́ dən, n tɩtaga, won ga ba mʋ́ fwa.
14 Yɩɩ swɩ̀n, ʋ wʋ́: «À wá jon wá, ʋ nə vwə ʋ tɩ̀àn à nə yɩrɩ,
à wá ywàń ʋ yuu nə, ʋ nə yə̀ə́ nə yɩrɩ.
15 Ʋ nə bon ʋ kə à nə, à wá le wá.
À wá ya də wá càn máŋá wa,
à wá jon wá, à ga wá pa ʋ na dun.
16 À wá pa wá mɩdarɩ,
à ga wá pa ʋ na də à mʋ̀ nə yɩ ʋ jonu.