Banɩa nii sagɩ
Ləzwənə yàá nyʋn lá, Yɩɩ ga wulə wuuu
90
1 Yɩɩ tʋtʋnʋ Moyizə yɩjʋnɩ.
Yuu-Tiu, n yɩn nə yisəgə bwálɩ́ máŋá də máŋá mama wuuu.
2 N yɩ Yɩɩ máŋá də máŋá, ka nə ba zwɛ̀,
də n tə wà pɛɛn fwa,
də n tə wà tɩa də lʋʋ fwa.
3 N pɩn ləzwənə pìí ʋ jì tɩa pùrú.
Cɩ́gá, n swɩ̀n, n wʋ́:
«Adamə nɩ̀án ba, á pìrə́ á jì tɩa pùrú!»
4 N mʋ̀ con nə, bɩna mʋ̀rʋ̀ yɩ ndə dɩ̀ɩ̀n dɩɩn tə nə, kʋ nə kɛ̀ń,
nə à yə̀ə́ ndə tɩtɩn nədʋ nə, kʋ nə kɛ̀ń.
5 N yàá jon ba mɩɩ tə,
kʋ pa ba lʋʋ wúlú yɩ ndə dwiən mancɩn nə.
Ba yàá yɩ ndə gaʋ nə pɛ́n jɩjʋ nə,
6 kʋ bori, kʋ fwa punə,
yá didəni nə, kʋ yàá pɩ̀nɩ̀, kʋ kʋ̀.
7 N lɩŋa tə yàá cʋ̀gʋ̀ nəba tə zwɛ̀,
n lɩŋa nəfarʋ tə yàá pa nə vɩvaga.
8 N ywàŋá nə yolwana tə n yáá con,
n poni tə ga pɩ̀rɩ̀ nə yìə̀n tə mama,
nə nə səgə n yáá nə.
9 N lɩŋa tə pɩn nə mɩɩ ba dánɩ́,
nə siŋu yɩ naa nədʋ, də nə mɩɩ zwɛ̀.
10 Nə mɩɩ tə wàá bɩna sapwɩtwa də fugə kʋ yí,
nə à yə̀ə́ bɩna sapwɩnɩa, də nə nə jə dɩ̀àn.
Yá kʋ yí wʋwalʋ də càn nə yàá yí nəba.
Nə mɩɩ tə yàá zwɛ̀ lala, nə ga zàn nə kɛ̀ń.
11 Wàà nə yə̀ə́ n lɩŋa tə nə jə dɩ̀àn nətʋ?
Lìù nə dəri n fən zənzən,
ʋ wá lwarɩ n lɩŋa nəfarʋ tə də̀ń.
12 Bɩrɩ nəba nətʋ, nə nə mɛ sə nə gàlà nə bɩna nii,
yá nə bɩcan dàń wá sú də wʋbʋŋa.
13 Pìí n bà Ba-Yígúrə́-Jə-Tiu!
Kʋ wá dán kʋ mɛ nətə...?
Dəri nə mʋ̀ n tʋ̀tʋ̀nà tə yinəgə.
14 Pa n wʋywaŋʋ* tə sú nəba jɩjʋ mama,
yá nə dàń wá mà pupwən cə̀rí nə lʋʋ wúlú mama wa.
15 Pa nə jwɛ nə kə dɩan tə bʋʋ wa,
n nə ken nəba càn wa,
də bɩna tə bʋʋ wa, n nə pɩn lɛɛ yí nəba.
16 Pa n tʋ̀tʋ̀nà tə na kʋ tə n nə tʋŋa,
sə ba bɩ̀á də ga na n dun tə!
17 Yuu-Tiu, nə tíú Yɩɩ, fwa n pubwanʋ tə nə yɩra!
Pa nə tʋ̀tʋ̀nán tə ja dɩ̀àn,
awoo, pa nə tʋ̀tʋ̀nán tə ja dɩ̀àn!