Nikana tə Yɩɩ nə kàn ʋ pa Davidə nə wulə yə̀n?
89
1 Etan ʋ nə yɩ Zera dwíí bʋra.
2 À wá nun n wʋywaŋʋ* tə yoo dɩɩn mama Ba-Yígúrə́-Jə-Tiu.
Máŋá də máŋá mama wuuu, à wá swɩ̀n
də n yɩ pùə́ nədʋ tíú.
3 Cɩ́gá, à swɩ̀n də n wʋywaŋʋ tə wulə dɩɩn mama,
n tún n nə yɩ pùə́ nədʋ tíú tə lanworu tə wa.
4 N swɩ̀n kʋ n wʋ́: «À tún nimarʋ də à
tʋtʋnʋ Davidə à nə kúrí,
à kàn nikanɩ də wá à wʋ́:
5 À wá tún n dwíí tə wa lìù
máŋá mama sə ʋ ya pɩ̀ʋ́.
Yá à wá pa n pàrɩ̀ tə ya lá máŋá də máŋá mama wuuu. Zɩgɩ sìí bwálɩ́
6 Ba-Yígúrə́-Jə-Tiu, lanworu tə bwɩ n yogwaran tə,
də n nə yɩ pùə́ nədʋ tíú n lɩ̀à tə púlí wa nə.
7 Cɩ́gá, wàà nə wulə lanworu tə wa, ʋ nə ja ʋ tɩ̀àn ʋ maŋa də n mʋ̀ Ba-Yígúrə́-Jə-Tiu?
Yɩa tə wa yɩɩ kʋ́kwà nə nyən də n mʋ̀ Ba-Yígúrə́-Jə-Tiu?
8 Ba dəri ʋ fən malɩkɛ tə púlí tə titəŋi wa.
Ʋ bá kamandon jə wiən tə mama wa tə nə kɩkarɩ wá.
9 Ba-Yígúrə́-Jə-Tiu n nə yɩ kwatara Yɩɩ, wàà nə dà ndə n nə?
Ba-Yígúrə́-Jə-Tiu jə dɩ̀àn, n cɩ́gá tə kɩkarɩ mʋ́.
10 Kʋ yɩ n mʋ̀ nə jə dɩ̀àn mʋʋ tə fwìə́ tə yuu wa.
Máŋá tə kʋ nakulə nə zàn, n mʋ̀ nə yàá pa tə pìí tə tʋ.
11 Kʋ yɩ n mʋ̀ nə tɩtaga wojijiru Rahavə,
n ga laga n dʋŋa tə də n vàn dɩ̀àn.
12 Lanworu tə yɩ n mʋ̀ nə tɩ,
tɩa tə də ga yɩ n mʋ̀ nə tɩ.
N mʋ̀ nə fwa lʋʋ də kʋ wa wiən mama.
13 N mʋ̀ nə fwa jɩzən saparʋ də jɩgwiə saparʋ.
Tabɔrə paan tə də Hɛrəmon paan tə bubwi n yɩrɩ tə də pupwən.
14 N mʋ̀ nə jə vagoo,
n jɩɩn tə jə dɩ̀àn zənzən,
n jɩzən tə zɩ̀n yɩɩ nə.
15 Cɩ́gá cwəŋə də kʋ tə nə yɩ mənəmənə, nə yɩ n pàrɩ̀ tə dəkuu.
Wʋywaŋʋ də cɩ́gá wulə n yáá con.
16 Ba-Yígúrə́-Jə-Tiu, pupwən lɩ̀à nə yɩ lɩ̀à tə,
ba nə yə̀ə́ ka cə̀rí n yuu nə də pupwən.
Ba wá va n yáá poni tə wa.
17 N yɩrɩ tə pɩn ba wulə pupwən wa máŋá mama.
Ba zɩ̀n ba tɩ̀àn yɩɩ nə n cɩ́gá cwəŋə tə yɩrɩ.
18 Cɩ́gá, n yɩ ba dɩ̀àn də ba dun,
kʋ twá də n sáŋʋ́, nə ma zɩ̀n nə yuu yɩɩ nə.
19 Cɩ́gá, Ba-Yígúrə́-Jə-Tiu yɩ nə natana,
Yɩzərayɛlə lɩ̀à Yɩɩ tə nə yɩ parɩ yɩ nə pɩ̀ʋ́.
20 Dɩɩn don nə n swɩ̀n n lɩ̀à tə con nɩʋn wa, n wʋ́:
«À pɩn à sáŋʋ́ kwatarʋ babɩʋ nə.
À kúrí balandʋrʋ lalʋʋ tə wa à kə yáá.
21 À nɩ à tʋtʋnʋ Davidə,
à twɛ́n à dun nʋga* tə ʋ yuu wa.
22 À jɩɩn tə dɩ̀àn wá san wá,
à vàn tə wá pa ʋ ja dɩ̀àn.
23 Dʋŋʋ tə bá wànɩ́ ʋ də́ dɩ̀àn ʋ yuu wa,
lìù tə nə vɩ nii bá wànɩ́ ʋ kə wá cavɩra.
24 À wá tɩtaga ʋ jarɩduən tə ʋ yáá con,
à wá mà lɩ̀à tə nə culi wá.
25 À wá ya də wá də pùə́ nədʋ, à ga tʋn wʋywaŋʋ ʋ yɩra,
à mʋ̀ nə wá pa ʋ dɩ̀àn súrí wuuu.
26 À wá pa wá dɩ̀àn mʋʋ yuu wa,
ʋ jɩzən vàn tə dɩ̀àn ga wá ya mʋnɛɛ tə yuu wa.
27 Ʋ mʋ̀ nə wá bon nə ʋ wʋ́:
“À nyɩna! À tíú Yɩɩ! Pɩ̀ʋ̀ tə kʋ nə pɩn nə mɩɩ!”
28 Yá à də wá pa ʋ jì à bikwɩa.
Ʋ wá ya tɩa yuu pɛ̀gá tə yuu wa.
29 À wá fwa wʋywaŋʋ ʋ yɩra máŋá mama,
à ga zìlí à də wá nimarʋ tə nii də pùə́ nədʋ.
30 À wá pa ʋ dwíí tə bìú də́ pàrɩ̀ tə máŋá mama,
ʋ pàrɩ̀ tə ga wá ya lá máŋá tə mama lanworu nə wá ya lá.
31 Ʋ bɩ̀á tə nə vɩga à nii tə
ba nə kʋ́ʋ̀ ba coŋi tə à nə tún nə twá,
32 ba nə cʋ̀gʋ̀ yìə̀n tə à nə pʋ́pʋ́nɩ́ sə ba tʋn,
ba nə ba yìə̀n tə zìlí, à nə pɩn nii tə yuu wa,
33 à wá mà ba də dadɩlʋ.
Ba nə vɩga nii tə yɩrɩ,
mà nə wá yí ba ba yolwan tə yɩrɩ.
34 Yá à nə bá vwəŋə ba à wʋywaŋʋ tə,
à bá pìí à kwɩ̀án à nikanɩ tə.
35 À bá pìí à cʋ̀gʋ̀ nə nimarʋ* tə,
à bá pìí à kwɩ̀án sʋgʋ tə nə nan à nii wa.
36 À dùə̀ də à tətə yɩrɩ tə naa nədʋ,
à swɩ̀n də à bá gɩgarɩ Davidə abada!
37 Ʋ dwíí tə wá ya lá máŋá mama,
ʋ pàrɩ̀ tə ga wá ya à yáá con wuuu ndə yɩcaʋ nə wulə nətʋ,
38 nə à yə̀ə́ ndə cànà tə nə yɩ dansɩa
lanworu tə wa máŋá mama nətʋ.»
Zɩgɩ sìí bwálɩ́ \qs*
39 Yá n mʋ̀ nə fʋfʋlɩ pɩ̀ʋ́ tə n nə kúrí, n ga vɩ wá n dʋgʋ.
N pɩn n lɩŋa zàn ʋ yuu wa.
40 N pìí n kwɩ̀án n də n tʋtʋnʋ tə nimarʋ tə,
n pa ʋ payupuu tə tʋ tɩa kʋ jì durən.
41 N ken lulwərən ʋ bírí tə mama yɩra,
n ga gwɛrɩ ʋ biritaŋan tə.
42 Lɩ̀à tə mama nə kɛ̀ń yàá vɩrɩ wá,
ʋ jìgə̀ ʋ jənduən tə mama mʋmʋn lìù.
43 N pɩn ʋ dʋŋa də́ dɩ̀àn ʋ yuu wa,
n pɩn ʋ jarɩduən pwìí poli.
44 N pɩn ʋ kwatarɩ zɩla tə pìí tə də́ ʋ tətə,
n wà wá san kʋ̀ʋ̀ tə wa.
45 N pɩn ʋ dun tə nyʋn lá,
n ga viviri ʋ padaʋ tə yáá n pú tɩa.
46 N gwəŋə ʋ zandʋan máŋá tə wa,
n pa ʋ də́ cavɩra zənzən. Zɩgɩ sìí bwálɩ́
47 Ba-Yígúrə́-Jə-Tiu, n wá səgə kʋ dán kʋ mɛ nətə?
N lɩŋa tə wá zàn ndə mən nə, kʋ dán kʋ mɛ nətə?
48 Lìí n tɩ̀àn də à mɩɩ tə ba dara!
N fwa ləzoni sə n pa ba pìí ba nyʋn lá!
49 Wàà nə wàá lá ʋ yanɩ ʋ ba tɩ?
Wàà nə wàá ciru* vəlu yáá nə ʋ jɛ́n? Zɩgɩ sìí bwálɩ́
50 Yuu-Tiu, n fuən wʋywaŋʋ yìə̀n tə wulə yə̀n nə?
Nikana tə n nə kàn də pùə́ nədʋ n pa Davidə nə wulə yə̀n nə?
51 Yuu-Tiu, lìí n tɩ̀àn cavɩra tə yoo,
n tʋ̀tʋ̀nà tə nə wulə tə wa.
Lìí n tɩ̀àn də lalʋʋ kʋ tə mama yɩ à yuu zɩlɩ.
52 Ba-Yígúrə́-Jə-Tiu, n dʋŋa tə fʋfʋlɩ pɩ̀ʋ́ tə n nə tún,
ba kəni cavɩra ʋ nə bwálɩ́ tə mama wa, ʋ nə vəli.
53 À bwɩ Ba-Yígúrə́-Jə-Tiu nə máŋá mama wuuu!
Amɩɩna! Amɩɩna!