À mɩɩ bwə́lə́ sə kʋ zwɛ̀
88
1 Nuŋə. Kore bɩ̀á gwaran. Gwàgá yáá tíú gwaran, ba nə nuŋə də wúə́. Heman ʋ nə yɩ Zera dwíí bʋra.
2 Ba-Yígúrə́-Jə-Tiu n nə yɩ Yɩɩ tə n nə joŋə nə,
à bubwi à kəni n nə, yɩcaʋ də tɩtɩn.
3 Pa à yɩjʋnɩ tə dɩ̀ kʋ yí n con,
guni n zɩɩn n cʋgʋ à bubwiə tə.
4 Cɩ́gá, càn dáá à yuu wa zənzən,
yá à mɩɩ wulə lʋʋ də ciru* pwə́rə́ wa.
5 Ba jələ nə ba kəni lɩ̀à tə wa,
ba nə kəni libəri wa,
à kʋ́ʋ̀ ba dɩ̀àn jə.
6 À bwálɩ́ dàń yɩ kʋ wulə tɩga titəŋi wa,
ndə tɩga tə nə ba nə tún libəri wa.
N kʋ́ʋ̀ ba ba yoo lìí,
n kʋ́ʋ̀ ba yoo tʋŋa n pɩn ba.
7 N ken nə bʋʋ nəfarʋ wa, kʋ də̀ń nə lu,
kʋ nə yɩ yikunu bwálɩ́ tɩa tə də̀ń nə.
8 N lɩŋa nəfarʋ tə pɩn à də́ càn zənzən,
yá tə yɩ ndə nakulə nə,
tə mama nə twá à yuu wa. Zɩgɩ sìí bwálɩ́
9 N pɩn à ləyənə va yiŋʋnɩ ba yá nə.
N pɩn à jì lìù tə ba waa nə nan nə.
Ba sún à nii nə, à wàrɩ̀ à naŋa.
10 Càn tə pɩn à yɩ́á ba tɩa na.
Ba-Yígúrə́-Jə-Tiu, à boŋə mʋ́ máŋá mama,
à te à jɩɩn n con.
11 N bá tʋn yomɩlʋ n pa tɩga nə.
Tɩga tə bá pìí ba zàn ba bʋ n nə.
12 Ba bá swɩ̀n n wʋywaŋʋ tə yoo libəri wa.
Ba bá swɩ̀n də n yɩ pùə́ nədʋ tíú ciru nə.
13 Ba wàrɩ̀ n yogwaran tə ba lwarɩ yikunu wa.
Swɩa lʋʋ nii tə wa ba wàrɩ̀ ba lìí də n yoo
tì cɩ́gá cwəŋə.
14 Yá à mʋ̀ boŋə à kəni n mʋ̀ Ba-Yígúrə́-Jə-Tiu nə,
jɩjʋ nə à yɩjʋnɩ tə manwarɩ kʋ wulə n yáá con.
15 Ba-Yígúrə́-Jə-Tiu, bɛ̀ɛ̀ nə pɩn
n ma yigə à jə̀rə́ tə, n kəni kwa,
n ga səgə à yáá nə?
16 Kʋ nə zɩgɩ à zandʋan mama nə, à yɩ yinənyiən,
à ga ba dɩ̀àn jə.
N pɩn n fən jə nə zənzən,
kʋ pa à jwə̀rí.
17 N lɩŋa tə yɩ ndə mən nə twá à yuu con,
fən ga pa à nyʋn lá.
18 Dɩɩn mama n lɩŋa tə kɩkarɩ nə ndə nɩ́á nə,
tə ga pɩrɩ à yuu nə bwálɩ́ mama wa.
19 N pɩn à twaduən də à dabara va yiŋʋnɩ ba yá nə.
Yikunu cɩcɩ nə yɩ à twadon.