À pucʋnɩ dɩɩn nə à yàá bon à kə n nə
86
1 Davidə yɩjʋnɩ.
Ba-Yígúrə́-Jə-Tiu, guni n zɩɩn n kə à con, n le nə,
à nə yɩ zʋrʋ, à ga yɩ yinənyiən yɩrɩ.
2 À mʋ̀ pùə́ yɩ nədʋ də mʋ́, ywàń à yuu nə.
N mʋ̀ à tíú Yɩɩ, jon à mʋ̀ n tʋtʋnʋ tə,
à nə jələ n yuu wa.
3 À boŋə à kəni n nə dɩɩn mama,
dəri à yinəgə Yuu-Tiu.
4 Pa à mʋ̀ n tʋtʋnʋ tə jə̀rə́ tə jwɛ,
cɩ́gá, n mʋ̀ con nə, à zɩ̀n à jə̀rə́ tə à te.
5 N mʋ̀ Yuu-Tiu, n yɩ pubwanʋ tíú,
n wʋywaŋʋ tə dáá zənzən,
n ga kwɛn cʋna n lɩ n də lɩ̀à tə pwə́rə́ wa, ba nə boŋə ba kəni n nə.
6 Ba-Yígúrə́-Jə-Tiu guni n zɩɩn n cʋgʋ à yɩjʋnɩ.
À lòrì mʋ́ pwəpwə sə n cʋgʋ à kori.
7 Máŋá tə à nə wulə pucʋnɩ wa,
à yàá bon à kə n nə, n nə yàá le nə yɩrɩ.
8 Yuu-Tiu, yɩɩ tə̀lə́ yɩa tə wa ʋ nə yɩ ndə n nə.
N tʋ̀tʋ̀nán tə ba kamandon jə.
9 Dwíə́ tə mama n nə fwa wá bà,
tə tʋ tə nadwana yuu n mʋ̀ Yuu-Tiu yáá con,
tə pa mʋ́ dun.
10 Cɩ́gá, n dwə tə mɛ, n ga tʋŋa yomɩlan,
n mʋ̀ cɩcɩ nə yɩ Yɩɩ cɩ́gá cɩ́gá!
11 Ba-Yígúrə́-Jə-Tiu, bɩrɩ nə n cwəŋə tə,
sə à ya ka wa də n cɩ́gá tə.
Kə à bɩcan tə bwálɩ́ nədʋ,
sə à dəri n yɩrɩ tə fən.
12 Yuu-Tiu tə n nə yɩ à Yɩɩ,
à wá bʋ n nə də à waa mama,
à wá pa mʋ́ dun máŋá mama.
13 Cɩ́gá, n wʋywaŋʋ tə dáá zənzən kʋ pa nə,
n jon à jə̀rə́ tə ciru* cwəŋə wa.
14 Ooo à tíú Yɩɩ, fwìə́ lɩ̀à zàn ba zɩga à nə,
lagʋra púlí pɩ̀à ba lɩ à mɩɩ.
Ba lɩ̀à təntə yáá tə̀lə́ də mʋ́.
15 Yá n mʋ̀ Yuu-Tiu dəri lɩ̀à yinəgə,
n tʋŋa pubwanʋ lɩ̀à yɩra,
n lɩŋa ba lala zaŋa,
n yɩ wʋywanyiən,
à ga twá cɩ́gá nə, ndə kʋ nə mɛ nətʋ.
16 Vəvəri n ywàń à con, n ga fwa pubwanʋ à yɩra.
Pa n dɩ̀àn tə à mʋ̀ n tʋtʋnʋ tə nə,
n ga jon à mʋ̀ lìù tə nə yɩ n tʋtʋnbʋa bìú.
17 Pa nə mɩmɩnʋ kʋ nə bɩrɩ də à nɩ yuywaŋʋ n yáá con.
Cavɩra dàń wá ja à dʋŋa tə,
ba nə wá na də n mʋ̀ Ba-Yígúrə́-Jə-Tiu nə saŋa nə, n ga kòrì nə.