Cwəvələ tə nə yí Zwerizalɛmə gwaran
84
1 Gwàgá yáá tíú gwaran, ba nə nuŋə də Gatə tɩ̀án bànʋ́. Kore bɩ̀á gwaran.
2 Ba-Yígúrə́-Jə-Tiu, n nə yɩ kwatara Yɩɩ,
à swə n dìə̀ tə tamʋ!
3 À dànɩ̀ də bɩbarʋ sə à zʋ n dəwoo tə wa.
À bɩcan tə də à yatana tə mà pupwən cə̀rí
tə kəni Yɩɩ tə nə, ʋ nə nəŋə.
4 Zunbiə tətə yàá na bwálɩ́ lá, ka zʋ,
kalɩnlara də yàá fwa ka pwalʋ,
ka lwe ka càlà, n jwəŋə bwálá tə səpuni nə.
Ba-Yígúrə́-Jə-Tiu, n nə yɩ kwatara Yɩɩ,
n yɩ à pɩ̀ʋ́, n ga yɩ à Yɩɩ!
5 Pupwən lɩ̀à nə yɩ lɩ̀à tə nə wulə n dìə̀ tə wa,
ba bwɩ n nə máŋá mama wuuu. Zɩgɩ sìí bwálɩ́
6 Pupwən lɩ̀à nə yɩ lɩ̀à tə ba dɩ̀àn nə wulə n con,
ba ga sɛ̀ ba twá n nə də ba bɩcan mama.
7 Máŋá tə ba nə twá yinɩa vara tə wa ba kɛ̀ń,
ba yàá pa ka jì nabuliyii bwálɩ́,
síí dwà ga na ka kwɛn kʋ.
8 Ba yàá vəli ba dɩ̀àn ga súrí,
sə ba va ba yí Yɩɩ yáá con Siyon wa.
9 Ba-Yígúrə́-Jə-Tiu n nə yɩ kwatara Yɩɩ, cʋgʋ à yɩjʋnɩ,
guni n zɩɩn n kə à con Zwakɔbə Yɩɩ. Zɩgɩ sìí bwálɩ́
10 Ooo à tíú Yɩɩ, ywàń, n mʋ̀ nə yɩ nə natana!
Ywàń pɩ̀ʋ́ tə n nə kúrí* yáá wa.
11 N dəwoo tə wa yanʋ dɩɩn nədʋ
kʋ́kwà dɩan mʋ̀rʋ̀ bwálɩ́ don nə.
À tíú Yɩɩ, à kúrí à tì sə à zɩgɩ n dìə̀ tə mimii nə,
à ba swə sə à ya wʋlʋnyɩna dìə̀ wa.
12 Cɩ́gá, Ba-Yígúrə́-Jə-Tiu Yɩɩ yɩ yɩcaʋ, ʋ yɩ natana,
ʋ pɩn pubwanʋ də dun.
Ba-Yígúrə́-Jə-Tiu ba vɩ sə ʋ pa
ba tə nə yɩ təgətəgə ya ywanɩ wa.
13 Ba-Yígúrə́-Jə-Tiu n nə yɩ kwatara Yɩɩ,
pupwən lìù nə yɩ lìù tə ʋ nə ken ʋ waa n nə!