Yɩɩ lɩ̀à tə jʋn Yɩɩ ba dʋŋa nə fɩfɩn ba yɩrɩ
83
1 Nuŋə. Azafə gwaran.
2 Ooo à tíú Yɩɩ, dàn ká ya səgisəgi,
dàn ká pú n nii,
dàn ká cɩ́nɩ́ n ba yoo tʋŋa, ooo à tíú Yɩɩ!
3 Nə̀ń n dʋŋa tə kukuri,
lɩ̀à tə nə culi mʋ́ zɩ̀n ba yun yɩɩ nə.
4 Ba wulə ba vʋrɩ sə ba zɩgɩ n lɩ̀à tə nə.
Ba ken nii nədʋ sə ba zɩgɩ n lɩ̀à tə nə n nə ywàŋá ba yuu.
5 Ba swɩ̀n, ba wʋ́:
«Nə vələ nə pa ba dwíí tə nyʋn lá,
ba kʋ́ʋ̀ dàn ká bon Yɩzərayɛlə dwíí tə yɩrɩ!»
6 Ba vʋrɩ ba kə nii nədʋ.
Ba tún nimarʋ, ba ma zɩgɩ n nə.
7 Kʋ yɩ Edomə tɩ̀án də Yɩsəmayɛlə dwíí tə,
də Mʋabə tɩ̀án də Hagarə dwíí tə,
8 də Gebalə tɩ̀án, də Amon də Amalɛkə dwíə́ tə,
kʋ súrí Filisi də Tirə tɩ̀án nə.
9 Asiiri tɩ̀án də tətə súrí ba nə,
sə ba pa Lɔtə dwíí tə ja dɩ̀àn. Zɩgɩ sìí bwálɩ́
10 Kʋ tə n nə dí yáá n tʋn Madɩan,
də Sisera, də Yabɩn yɩra,
Kiswon nacoru tə nii nə,
tʋn kʋ ba də yɩra.
11 Ba gʋa ba Eyin-Dɔrə nii nə,
ba tɩga tə ga jì pùrú tɩa yuu wa.
12 Kʋ tə n nə dí yáá n tʋn Orɛbə də Zɛbə yɩra,
tʋn kʋ ba lʋʋ nii yáá tɩ̀án tə də yɩra,
n ga tʋn kʋ ba pàbɩ̀á tə də mama yɩra,
ndə n nə dí yáá n tʋn kʋ Zeba də Saləmuna yɩra nətʋ.
13 Lɩ̀à təntə yà swɩ̀n, ba wʋ́:
«Nə joŋə bwálá tə nə yɩ Yɩɩ nə tɩ!»
14 À tíú Yɩɩ, pa ba yɩyarɩ ndə kuli nə,
nə à yə̀ə́ ndə gaʋ nə, vʋʋ nə jànɩ̀.
15-16 Pa n dwavʋʋ nəfarʋ tə pú ba kwa,
ndə mən nə yàá də́ pún nətʋ,
nə à yə̀ə́ ndə mənvwə nə yàá də́ pɛɛn yuu gaʋ nətʋ,
n ga pa n dwà bagʋ tə fən gən ba.
17 Pa ba də́ cavɩra zənzən,
sə ba pɩ̀à n mʋ̀ Ba-Yígúrə́-Jə-Tiu yɩrɩ tə!
18 Pa cavɩra ja ba,
sə fən ga gən ba máŋá mama.
Pa ba də́ cavɩra, ba tɩ ba jɛ̀ń!
19 Pa ba lwarɩ də n mʋ̀ Ba-Yígúrə́-Jə-Tiu cɩcɩ nə yɩ Baan Yɩɩ!