À lɩ̀à tə yà nə cʋga à sʋgʋ
81
1 Gwàgá yáá tíú gwaran, ba nə nuŋə də Gatə tɩ̀án bànʋ́. Asafə gwaran.
2 Á maga pupwən cə̀rí Yɩɩ yuu nə, ʋ yɩ nə dɩ̀àn!
Á maga jɩpwələ á pa Zwakɔbə Yɩɩ tə nə!
3 Á dɩa gwaran á ma siən,
á dwiə gungwen,
də bànʋ́ kʋ kori nə ywàń, də kwànʋ́.
4 Á wurə nabwanʋ candʋan dɩɩn nə,
də canpoli máŋá wa, nə cànà diŋə dɩɩn nə!
5 Cɩ́gá, kʋ yɩ nii Yɩɩ nə pɩn ba pʋ́pʋ́nɩ́ ba tún,
ba pa Yɩzərayɛlə lɩ̀à nə.
Kʋ yɩ yoo Zwakɔbə Yɩɩ tə nə bɩrɩ, sə kʋ tʋn.
6 Kʋ yɩ cwəŋə ʋ tún ʋ pa Zʋzɛfə dwíí tə nə,
máŋá tə ʋ nə nan ʋ ta Ezwipətə lʋʋ nii tə.
À nə̀ń sʋgʋ à nə yəri:
7 À zʋrɩ zɩla tə yà nə wulə ʋ para wa,
yá ʋ dàń jon ʋ tɩ̀àn tʋtʋncaran tə jɩɩn wa.
8 Máŋá tə n nə bubwi n càn tə wa, à jon mʋ́.
À səgə dwà bagʋ wa, à le mʋ́.
À mɩlɩ mʋ́ Meriba nabuliyi tə nii nə. Zɩgɩ sìí bwálɩ́
9 À lɩ̀à ba, á cʋga à con, sə à bɩrɩ aba yoo.
Aaa! Yɩzərayɛlə lɩ̀à ba, á yà nə cʋga à con,
10 woŋwanʋ yà bá ya á con,
á yà bá tʋ á nadwana yuu woŋwanʋ yáá con, á pa kʋ dun.
11 Kʋ yɩ à mʋ̀ Ba-Yígúrə́-Jə-Tiu, à nə yɩ n Yɩɩ,
nə pɩn n nan Ezwipətə lʋʋ nii tə wa.
Súrí n nii zənzən, sə à pa kʋ sú.
12 Yá à lɩ̀à tə wà à kori cʋgʋ,
Yɩzərayɛlə lɩ̀à vɩga nə.
13 Yá à dàń yá ba, ba zɩbaniu tə wa,
sə ba tʋn ba fɩra yìə̀n.
14 Aaa! À lɩ̀à tə yà nə cʋga à con,
Yɩzərayɛlə lɩ̀à tə yà nə tì à coŋi tə,
15 à yà wá pa ba dʋŋa də́ cavɩra lala,
à ga mà ba jarɩduən tə!
16 Lɩ̀à tə nə culi Ba-Yígúrə́-Tiu dàń wá kòrì wa,
Yɩzərayɛlə lɩ̀à ga ya sìə́ wa máŋá mama wuuu.
17 À wá kʋna Yɩzərayɛlə lɩ̀à də mɩna mun nəzəŋu,
à ga pa ba də́ gaʋ tʋ̀ràn ba sú.