Yɩɩ tə nə ywàŋá Yɩzərayɛlə yuu, cʋgʋ
80
1 Gwàgá yáá tíú gwaran, ba nə nuŋə də gwaran zɩla, ba nə sán də ŋoni. Azafə gwaran sagɩ tə wa gwaran.
2 Yɩɩ tə nə ywàŋá Yɩzərayɛlə lɩ̀à yuu ndə payɩrʋ nə,
n mʋ̀ Yɩɩ tə nə kəni Zʋzɛfə dwíí tə cwəŋə nə ndə pee nə,
guni n zɩɩn n cʋgʋ.
N mʋ̀ Yɩɩ tə nə də́ pàrɩ̀
Yɩɩ sàń wonəŋə* titəŋi wa,
bɩrɩ n dun tə.
3 Bɩrɩ n dɩ̀àn tə Efərayimə,
də Bɛnzwamɛn, də Manase dwíə́ tə wa,
n ga bà n jon nəba!
4 Ooo à tíú Yɩɩ, pa sə nə pìí nə bà!
Pa n yáá tə pɩpɩlɩ, n ga jon nəba!
5 Ba-Yígúrə́-Jə-Tiu tə nə yɩ kwatara Yɩɩ,
n lɩŋa tə wá zàn n lɩ̀à tə yɩjʋnɩ tə yuu wa,
kʋ dán kʋ mɛ nətə?
6 N pɩn ba yinɩa jì ba wodiu,
n pɩn ba nyʋn ba yinɩa ba gən.
7 N pɩn nə jənduən vaŋa duən nə yɩrɩ,
nə dʋŋa ga mʋŋa nəba.
8 Kwatara Yɩɩ, pa sə nə pìí nə bà!
Pa n yáá tə pɩpɩlɩ, n ga jon nəba!
9 N mùrí divɛn tɩ̀án kárá Ezwipətə nə,
n dɩŋɩ dwíə́ nəkaran*, n ga cwɛn ka.
10 N tanɩ bwálɩ́ n pa divɛn tɩ̀án kárá nə.
Yá divɛn tɩ̀án tə dàń tá ŋʋnan,
tə jon lʋʋ nii tə mama.
11 Tə yɩywara púə́ pɛɛn yuu nə,
tə nɛɛ ga dɩ̀ tə yí sɩsaban tɩ̀án tə nə dara yuu wa.
12 Tə nɛɛ yà vəli tə yí mʋʋ,
tə naywalan ga va tə yí mʋnaa.
13 Kʋ fwa nətə n ma pórí tə dabɔɔ tə,
n pa lɩ̀à tə mama nə kɛ̀ń pʋ̀rɩ́ tə bɩ̀á tə?
14 Gaʋ too yàá cʋ̀gà tə,
yá ganaŋa də ga də́ tə.
15 Kwatara Yɩɩ, pìí bà nə con!
Zɩgɩ lanworu tə wa n ywàń,
n jə́n kʋ tə nə bɩ̀àn,
n ga bà n jon divɛn tɩ̀án kárá təntə!
16 Cɩ̀ kʋ tə nə n tətə nə cwɛn,
bìú təntə n tətə nə pɩn wá dɩ̀àn.
17 Ba goŋi ka ba sʋ̀rɩ́.
Pa sə n lɩŋa tə pa lɩ̀à təntə nyʋn lá!
18 Tún n jɩɩn bɛɛ tə yuu wa,
ʋ nə jə̀ə́ n jɩzən vàn nə,
ləzwənə bìú təntə yuu wa,
n tətə nə pɩn ʋ jə dɩ̀àn!
19 Nə kʋ́ʋ̀ bá va yiŋʋnɩ nə yá mʋ́,
pa nəba mɩɩ,
yá nə wá bon nə kə n yɩrɩ tə nə.
20 Ba-Yígúrə́-Jə-Tiu, kwatara Yɩɩ, pìí n ja nəba n bà!
Pa n yáá poli nə yuu wa, n ga jon nəba.