Bà san nəba, nə dɩ̀àn zwɛ̀
79
1 Asafə gwaran.
Ooo à tíú Yɩɩ,
dwíə́ nəkaran* tə dí dɩ̀àn n lʋʋ nii tə yuu wa.
Ba ken durən n wúlú bwálɩ́ tə wa.
Ba pɩn Zwerizalɛmə jì kapana púlí.
2 Ba gʋa n tʋ̀tʋ̀nà tə, ba pa lanworu zuŋi də́,
ba pɩn ganaŋa də́ n lɩ̀à tə, ba nə zìlí n nii.
3 Ba lwá n lɩ̀à tə jana,
ba ja kɩkarɩ Zwerizalɛmə ndə nɩ́á nə,
lìù ga tə̀lə́ ʋ gùrì ba.
4 Nə jənduən twɩn nəba,
ba tə nə kɩkarɩ nəba fʋfʋlɩ nəba, də ba mʋŋa.
5 Ba-Yígúrə́-Jə-Tiu, n lɩŋa tə wá zàn nə yuu wa
máŋá mama, kʋ dán kʋ mɛ nətə?
N sɩsabaan tə wá zàn ndə mən nə kwé naaa?
6 N dàń pa n lɩŋa tə pupwin dwíə́ nəkaran tə yuu wa,
ba nə yəri mʋ́.
Pa tə zàn payun tə yuu wa,
ba nə ba boŋə ba kəni n yɩrɩ tə nə!
7 Cɩ́gá, ba cʋ̀gʋ̀ Zwakɔbə dwíí tə,
ba ga ta ʋ sàń tə ba də́.
8 Dàn ká zɩgɩ nə nə,
nə nɩbara-ba cʋna tə yɩrɩ.
Dəri nə yinəgə,
n bà nə con lala.
Cɩ́gá, nə dɩ̀àn zwɛ̀.
9 N mʋ̀ Yɩɩ tə n nə yɩ nə jonu,
bà san nəba, n yɩrɩ nə mɛ də dun yɩrɩ.
Jon nəba, n ga sɩn nə cʋna tə n lɩ, n tətə yɩrɩ.
10 Bɛ̀ɛ̀ nə pɩn n ma yá,
sə dwíə́ nəkaran tə swɩ̀n, ba wʋ́:
«Ba Yɩɩ tə wulə yə̀n?»
Bɩrɩ ba n pa nə na nətʋ,
n nə fwi n lɩŋa tə,
n tʋ̀tʋ̀nà tə yɩrɩ, ba nə gʋa!
11 Cʋgʋ kʋ tə bandiə lɩ̀à tə nə lòrì n con.
Twá n vàn dɩ̀àn tə nə,
n ma jon lɩ̀à tə,
ba nə pɩ̀à ba gʋ!
12 Yuu-Tiu, pa dwíə́ tə nə yɩ nə jənduən tə ŋwɩ́n nɛɛ barpɛ,
tʋran tə yɩrɩ ba nə twɩn mʋ́!
13 Yá nə mʋ̀ n dwíí tə nə yɩ ndə pee nə, n yɩ̀rɩ̀,
wá kə n lɛ̀ɛ̀, máŋá mama wuuu.
Nə wá bʋ n nə máŋá də máŋá mama wuuu.